సెంట్రల్‌ యూనివర్సిటీలకు ఫుల్‌ డిమాండ్‌

సెంట్రల్‌ యూనివర్సిటీలకు ఫుల్‌ డిమాండ్‌ పెరిగింది. ఈ వర్సిటీల్లో చదివేందుకు విద్యార్థులు క్యూ కడుతున్నారు. వీటిల్లో నాణ్యమైన విద్య, రిసెర్చ్‌ వంటి అత్యుత్తమ ప్రమాణాలను అందించడమే అందుకు కారణం.

• 13.99 లక్షల దరఖాస్తుల నమోదు
• గత ఏడాది 9.9 లక్షలు మాత్రమే
• సీయూఈటీ స్కోర్‌తో ప్రవేశాలు
• యూజీసీ చైర్మన్‌ మామిడాల జగదీశ్‌కుమార్‌ వెల్లడి

హైదరాబాద్‌, ఏప్రిల్‌ 4 (నమస్తే తెలంగాణ) :  వీటిల్లో నాణ్యమైన విద్య, రిసెర్చ్‌ వంటి అత్యుత్తమ ప్రమాణాలను అందించడమే అందుకు కారణం. సెంట్రల్‌ వర్సిటీల్లో ప్రవేశాలకు నిర్వహించే కామన్‌ యూనివర్సిటీ ఎంట్రెన్స్‌ టెస్ట్‌ (సీయూఈటీ) యూజీకి ఈ ఏడాది దరఖాస్తులు భారీగా పెరిగాయి. నిరుడు సీయూఈటీకి 9.9 లక్షల దరఖాస్తులు రాగా, ఈ ఏడాది 13.99 లక్షల దరఖాస్తులు నమోదయ్యాయి. గత ఏడాదితో పోల్చితే ఈసారి సీయూఈటీకి హాజరయ్యే విద్యార్థుల సంఖ్య 41శాతం పెరిగింది. యూనివర్సిటీ గ్రాంట్స్‌ కమిషన్‌ (యూజీసీ) చైర్మన్‌ మామిడాల జగదీశ్‌కుమార్‌ మంగళవారం ఆయా వివరాలను మీడియాకు వెల్లడించారు. సీయూఈటీ (యూజీ) దరఖాస్తుల స్వీకరణ ఫిబ్రవరి 9 నుంచి ప్రారంభమై, మార్చి 12న ముగిసింది. విద్యార్థుల విజ్ఞప్తి మేరకు మార్చి 30 వరకు పొడిగించాము. మొత్తం మీద ఈ 13.99 లక్షల మంది దరఖాస్తులు నమోదైనట్టు జగదీశ్‌కుమార్‌ తెలిపారు.

మరికొన్ని విశేషాలిలా..

• సీయూఈటీ (యూజీ) పరీక్ష ద్వారా ప్రవేశాలు కల్పించే వర్సిటీలు గతంతో పోల్చితే ఈసారి 152 అదనంగా ఏర్పాటయ్యాయి. 2022లో వీటి సంఖ్య 90 ఉండగా, 242కు పెరిగాయి.
• దరఖాస్తుదారుల్లో నిరుటితో పోల్చితే అబ్బాయిలు 34 శాతం, అమ్మాయిలు 50 శాతం పెరుగుదల నమోదైంది.
• నిరుడు ఎస్టీ విద్యార్థుల దరఖాస్తుల సంఖ్య 58,881 కాగా, ఈసారి 95,119కు చేరింది.
• ఈ ఏడాది ఎస్సీ విద్యార్థుల నుంచి 1,40,307 దరఖాస్తులు రాగా, వీటిని నిరుటితో పోల్చితే 35.3శాతం అధికం.
• ఈ సంవత్సరం ఓబీసీ ఎన్‌సీఎల్‌ (నాన్‌ క్రీమిలేయర్‌)కు చెందిన 4,61,022 మంది విద్యార్థులు, 6,42,413 మంది జనరల్‌ అన్‌ రిజర్వుడు, 6,061 ఈడబ్ల్యూఎస్‌ విద్యార్థులు దరఖాస్తు చేసుకొన్నారు.
• దక్షిణాది రాష్ర్టాలను తీసుకొంటే ఏపీ, కర్ణాటక, కేరళ మొదటి మూడు స్థానాల్లో ఉండగా, తెలంగాణ నాలుగు, ఆ తర్వాత తమిళనాడు ఉన్నది.
• గతేడాది 59 దేశాల నుంచి సీయూఈటీకి దరఖాస్తులు రాగా, ఈ ఏడాది 74 దేశాలకు పెరిగింది.