Congress-BJP | ‘అవిశ్వాస’ స్నేహబంధం.. బహిరంగంగానే కాంగ్రెస్‌-బీజేపీ చెట్ట్టపట్టాల్‌

స్నేహ బంధమూ.. ఎంత మధురమూ..’ అని పాడుకుంటున్నాయి కాంగ్రెస్‌-బీజేపీ. పెద్దసార్లే కలిసిపోగా లేనిది, మనకేమైందంటూ కిందిస్థాయి నేతలు కూడా చేతిలో చెయ్యేసి హాయిగా డ్యూయెట్లు పాడుకుంటూ బీఆర్‌ఎస్‌ను రాజకీయంగా దెబ్బకొట్టే ప్రయత్నం చేస్తున్నారు.

• మున్సిపాలిటీల్లో సంయుక్త అవిశ్వాసాలు
• కలిసి కుర్చీలు పంచుకుంటున్న నేతలు

Congress-BJP | హైదరాబాద్‌, మార్చి 8 (నమస్తే తెలంగాణ): ‘స్నేహ బంధమూ.. ఎంత మధురమూ..’ అని పాడుకుంటున్నాయి కాంగ్రెస్‌-బీజేపీ. పెద్దసార్లే కలిసిపోగా లేనిది, మనకేమైందంటూ కిందిస్థాయి నేతలు కూడా చేతిలో చెయ్యేసి హాయిగా డ్యూయెట్లు పాడుకుంటూ బీఆర్‌ఎస్‌ను రాజకీయంగా దెబ్బకొట్టే ప్రయత్నం చేస్తున్నారు. మున్సిపాలిటీల్లో జరుగుతున్న అవిశ్వాసాలే అందుకు అతిపెద్ద ఉదాహరణ. సిద్ధాంతాలు పట్టుకుని వేలాడితే పదవులు వస్తాయా? పాడా? అనుకుంటూ ఒకరికొకరు సహకరించుకుంటూ పదవుల పంపకాల్లో బిజీగా మారారు. అందులో భాగంగా బీఆర్‌ఎస్‌ చైర్మన్‌, వైస్‌ చైర్మన్లను పదవుల్లోంచి తొలగించేందుకు అవిశ్వాస తీర్మానాలు ప్రవేశపెడుతున్నారు.

అవిశ్వాసాలు ఇలా

• భువనగిరి మున్సిపాలిటీలో చైర్మన్‌, వైస్‌ చైర్మన్‌పై బీజేపీ, కాంగ్రెస్‌ కౌన్సిలర్లు సంయుక్తంగా అవిశ్వాస తీర్మానం ప్రవేశపెట్టి విజయం సాధించారు. ఖాళీ అయిన చైర్మన్‌ కుర్చీలో కాంగ్రెస్‌ నాయకుడు పోతంశెట్టి వెంకటేశ్వర్లు, వైస్‌ చైర్మన్‌ కుర్చీలో బీజేపీ నాయకుడు మాయ దశరథ్‌ కూర్చోవడం వారి స్నేహానికి అద్దం పడుతున్నది.
• నల్లగొండ మున్సిపాలిటీలో బీఆర్‌ఎస్‌ చైర్మన్‌ మందడి సైదిరెడ్డిపై అవిశ్వాస తీర్మానం పెట్టారు. కొత్త చైర్మన్‌గా కాంగ్రెస్‌కు చెందిన బుర్రి శ్రీనివాసరెడ్డికి అనుకూలంగా కాంగ్రెస్‌ కౌన్సిలర్లతోపాటు ఐదుగురు బీజేపీ కౌన్సిలర్లు కూడా మద్దతు తెలిపారు.
• జగిత్యాల మున్సిపల్‌ చైర్మన్‌ ఎన్నిక సందర్భంగా రెబల్‌ అభ్యర్థిగా బరిలోకి దిగిన అడువాల జ్యోతికి కాంగ్రెస్‌, బీజేపీ కలిపి మద్దతు పలికాయి.
• ఉమ్మడి ఆదిలాబాద్‌ జిల్లాలోని మంచిర్యాల, నస్పూర్‌, ఖానాపూర్‌ మున్సిపాలిటీ చైర్మన్‌, వైస్‌ చైర్మన్లపై అవిశ్వాస తీర్మానాలు ప్రవేశపెట్టగా, ఆయా మున్సిపాలిటీల్లో కాంగ్రెస్‌ కౌన్సిలర్లు చైర్మన్‌, వైస్‌ చైర్మన్లుగా గెలుపొందారు. నన్పూరులో ఓ బీజేపీ కౌన్సిలర్‌ కాంగ్రెస్‌ తీర్థం పుచ్చుకున్నారు.
• ఉమ్మడి మెదక్‌ జిల్లాలోని నారాయణఖేడ్‌లో అవిశ్వాస తీర్మానం పెట్టి కాంగ్రెస్‌ కౌన్సిలర్లను చైర్మన్‌, వైస్‌ చైర్మన్లుగా ఎన్నుకున్నారు.

ఇవి కొన్ని ఉదాహరణలు మాత్రమే. రాష్ట్రంలోని ప్రతి నియోజకవర్గం, మున్సిపాలిటీల్లోనూ కాంగ్రెస్‌, బీజేపీ మధ్య దోస్తీ బలపడుతూ వస్తున్నది. స్థానిక పరిస్థితుల నేపథ్యంలోనే ఇలా జరుగుతున్నదని ఇరు పార్టీల నేతలు చెబుతున్నా, అంతర్గతంగా మాత్రం రెండు జాతీయ పార్టీల మధ్య స్నేహం బలంగా పెనవేసుకుపోయిందని చెప్పుకుంటున్నారు. అసెంబ్లీ ఎన్నికల్లో కాంగ్రెస్‌ విజయం సాధించి ప్రభుత్వాన్ని ఏర్పాటు చేసిన తర్వాత కాంగ్రెస్‌, బీజేపీ మధ్య దోస్తీ మరింత బలపడింది. గతంలో జరిగిన ఉప ఎన్నికల్లో వీటి మధ్య సయోధ్య కనిపించింది. ఇప్పుడు బహిరంగమైపోయింది. మున్సిపాలిటీల్లో అవిశ్వాసాలు, కుర్చీల పంపకాలు అందులో భాగమేనన్న విమర్శలు వినిపిస్తున్నాయి.