మరో 10 ఎస్సీ గురుకులాల్లో ఫౌండేషన్‌ కోర్సులు

ఐఐటీ, నీట్‌ తదితర ప్రవేశ పరీక్షలకు ఫౌండేషన్‌ కోర్సును ఈ ఏడాది నుంచి మరో 10 ఎస్సీ గురుకులాల్లో ప్రవేశపెట్టనున్నారు. గౌలిదొడ్డి, కరీంనగర్‌ సీఈవో(సెంటర్‌ ఆఫ్‌ ఎక్స్‌లెన్స్‌) తరహాలోనే 10 గురుకులాలను తీర్చిదిద్దాలని నిర్ణయించినట్టు సొసైటీ సెక్రటరీ వర్షిణి బుధవారం వెల్లడించారు.

• 8వ తరగతి నుంచే ఐఐటీ, నీట్‌ పరీక్షలకు శిక్షణ
• ఎస్సీ గురుకుల సొసైటీ సెక్రటరీ వర్షిణి వెల్లడి

హైదరాబాద్‌, ఏప్రిల్‌ 2 (నమస్తే తెలంగాణ) : ఐఐటీ, నీట్‌ తదితర ప్రవేశ పరీక్షలకు ఫౌండేషన్‌ కోర్సును ఈ ఏడాది నుంచి మరో 10 ఎస్సీ గురుకులాల్లో ప్రవేశపెట్టనున్నారు. గౌలిదొడ్డి, కరీంనగర్‌ సీఈవో(సెంటర్‌ ఆఫ్‌ ఎక్స్‌లెన్స్‌) తరహాలోనే 10 గురుకులాలను తీర్చిదిద్దాలని నిర్ణయించినట్టు సొసైటీ సెక్రటరీ వర్షిణి బుధవారం వెల్లడించారు. ఈ గురుకులాల్లో 8వ తరగతి నుంచే ప్రవేశాలు కల్పిస్తామని తెలిపారు. ఎస్సీ గురుకులాల్లో చదివే వారికే రాతపరీక్ష నిర్వహించి, మెరిట్‌ ఆధారంగా ఎంపిక చేయనున్నట్టు పేర్కొన్నారు.

త్వరలోనే ఇంటర్‌ కాలేజీల్లో అడ్మిషన్లు

సొసైటీ పరిధిలోని ఇంటర్‌ కాలేజీల్లో ప్రవేశాలకు త్వరలో నోటిఫికేషన్‌ విడుదల చేయనున్నట్టు వర్షిణి తెలిపారు. 2025-26 విద్యా సంవత్సరానికి ఇంటర్‌లో ప్రవేశాలను టెన్త్‌ మార్కుల ఆధారంగా నిర్వహించనున్నట్టు వెల్లడించారు. పదోతరగతి పూర్తిచేసిన విద్యార్థులు ముందస్తుగానే కుల, ఆదాయ సర్టిఫికెట్లను సిద్ధం చేసుకోవాలని సూచించారు.