Visit:
Nirmal | ఖానాపూర్, నవంబర్ 30 : ప్రమాదవశాత్తు విద్యుత్ షాక్ తగిలి రైతు మృతి చెందిన ఘటన నిర్మల్ జిల్లా ఖానాపూర్ మండలంలోని సుర్జాపూర్ గ్రామంలో ఆదివారం చోటుచేసుకుంది. ఎస్ఐ రాహుల్ గైక్వాడ్ తెలిపిన వివరాల ప్రకారం.. సుర్జాపూర్ గ్రామానికి చెందిన రైతు పన్నెల వెంకట్రాములు (54) తన సొంత ఐదెకరాల వ్యవసాయ భూమిలో మూడు ఎకరాల వరి సాగు చేయగా.. రెండు ఎకరాల మక్కా పంటను సాగు చేస్తున్నాడు. శనివారం రాత్రి మక్క పంటకు నీరు పెట్టడానికి వెళ్లి తిరిగి రాకపోవడంతో ఆదివారం ఉదయం బంధువులు తన మిత్రులతో కలిసి వెళ్లి చూడగా వ్యవసాయ బావి వద్ద కరెంట్ షాక్ తగిలి అక్కడికక్కడే మృతి చెందాడు.
పోలీసులు పంచనామ నిర్వహించి మృతదేహాన్ని ఖానాపూర్ ప్రభుత్వ దవాఖానాకు తరలించారు. మృతుడికి భార్య కుమారుడు కుమార్తె ఉన్నారు. కుమారుడు నిషిత్ ప్రైవేట్ కంపెనీలు పని చేస్తుండగా.. కూతురు నిషితకు వివాహం చేసేందుకు సంబంధాలు చూస్తున్నారు. భార్య విజయ ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు. మృతుడు అయ్యప్ప దీక్షలో ఉండి ఆకస్మాతుగా మృతి చెందడంతో గ్రామస్తులు, కుటుంబీకులు కన్నీరు మున్నీరయ్యారు.
