జీతాలు జమ కాలే.. పింఛన్లు పడలే!

ఉద్యోగులకు ప్రతినెలా ఒకటో తేదీనే వేతనాలిస్తామని ఎన్నికల్లో హామీనిచ్చిన కాంగ్రెస్‌ పార్టీ అధికారంలోకి వచ్చాక దానిని నిలబెట్టుకోవడంలో విఫలమైంది.

• హామీ నిలబెట్టుకోలేకపోయిన సర్కారు
• ఐదో తేదీ దాటినా పడని వేతనాలు
• ఎదురుచూస్తున్న ఉద్యోగులు

హైదరాబాద్‌, ఫిబ్రవరి 5 (నమస్తే తెలంగాణ): ఉద్యోగులకు ప్రతినెలా ఒకటో తేదీనే వేతనాలిస్తామని ఎన్నికల్లో హామీనిచ్చిన కాంగ్రెస్‌ పార్టీ అధికారంలోకి వచ్చాక దానిని నిలబెట్టుకోవడంలో విఫలమైంది. ఐదో తేదీ దాటినా చాలా సబ్‌ ట్రెజరీల్లో ఇప్పటి వరకు టీచర్లు, ఉద్యోగులకు వేతనాలు అందలేదు. ఒకటో తేదీన కొందరికి వేతనాలు వేసిన ప్రభుత్వం అందరికీ ఇచ్చినట్టు చెప్పుకున్నది. వాస్తవానికి ఇప్పటి వరకు పూర్తిస్థాయిలో వేతనాలు జమకాలేదు. పింఛన్లు కూడా పడకపోవడంతో లబ్ధిదారులు ఇక్కట్లు పడుతున్నారు. వేతనాల విషయంలో ప్రభుత్వం పక్కా వ్యూహంతో వెళ్తున్నట్టు అర్థమవుతున్నది. ఒక జిల్లాలో మూడు, నాలుగు సబ్‌ ట్రెజరీలుంటే ఒక ట్రెజరీలో జమచేసి జిల్లా అంతా ఇచ్చినట్టు ప్రచారం చేసుకుంటూ మిగతా ట్రెజరీల్లో వేతనాలు ఆలస్యంగా జమచేస్తున్నది.

వాస్తవ పరిస్థితి ఇలా

• సిద్దిపేట జిల్లాలో హుస్నాబాద్‌, గజ్వేల్‌ ఎస్టీవోలు మినహా సిద్దిపేట, తొగుట, దుబ్బాక, చేర్యాల ప్రాంత ఉద్యోగులు, టీచర్లకు ఇప్పటివరకు జీతాలు జమకాలేదు.
• జగిత్యాల జిల్లాలో మూడు ఎస్టీవోలుంటే మెట్‌పల్లి సబ్‌ట్రెజరీ పరిధిలో మాత్రమే జీతాలు జమయ్యాయి. మిగతా రెండు ట్రెజరీల్లో జీతాలు జమకాలేదు.
• ఖమ్మం జిల్లాలోని వైరా ఎస్టీవో పరిధిలోని ప్రభుత్వ లెక్చకర్లు, ఉద్యోగులకు ఇప్పటికీ వేతనాలు అందలేదు.
• కేజీబీవీల్లో పనిచేసే మహిళా ఉద్యోగులు, ఎస్‌ఎస్‌ఏ ఉద్యోగులకు డిసెంబర్‌, జనవరి రెండు మాసాల వేతనాలు అందలేదు. నవంబర్‌ నెల వేతనాలను యూనిఫాం వస్త్ర అడ్వాన్స్‌ను ఆపి చెల్లించారు.
• సంగారెడ్డి, ఖమ్మం, రంగారెడ్డి, హనుమకొండ జిల్లాల్లో పెన్షనర్లకు ఇంత వరకు పింఛన్లు అందలేదు. ఇదే అంశంపై అధికారులను ఆరా తీస్తే సోమవారం సాయంత్రం వేస్తామని చెప్పినప్పటికీ జమకాలేదు.