వచ్చే పదేండ్లలో విద్యుత్తు డిమాండ్‌ రెట్టింపు

రాష్ట్రంలో విద్యుత్తు అవసరాలు మరింతగా పెరుగుతాయిని, వచ్చే పదేండ్లలో పీక్‌ విద్యుత్తు డిమాండ్‌ రెట్టింపు అవుతుందని సెంట్రల్‌ ఎలక్ట్రిసిటీ అథారిటీ (సీఈఏ) వెల్లడించింది. ఈ మేరకు స్థాపిత విద్యుత్తు సామర్థ్యాన్ని పెంచాలని సూచించింది.

• ప్రస్తుతం 15వేల మెగావాట్ల డిమాండ్‌
• 2035 కల్లా 31 వేలకు పెరిగే అవకాశం
• ఏటా 4నుంచి 6% చొప్పున పెరిగే చాన్స్‌
• వినియోగం 5% పెరుగుతున్నట్టు అంచనా
• సెంట్రల్‌ ఎలక్ట్రిసిటీ అథారిటీ నివేదిక వెల్లడి

హైదరాబాద్‌, ఫిబ్రవరి 7 (నమస్తే తెలంగాణ): రాష్ట్రంలో విద్యుత్తు అవసరాలు మరింతగా పెరుగుతాయిని, వచ్చే పదేండ్లలో పీక్‌ విద్యుత్తు డిమాండ్‌ రెట్టింపు అవుతుందని సెంట్రల్‌ ఎలక్ట్రిసిటీ అథారిటీ (సీఈఏ) వెల్లడించింది. ఈ మేరకు స్థాపిత విద్యుత్తు సామర్థ్యాన్ని పెంచాలని సూచించింది. ప్రస్తుతం పీక్‌ డిమాండ్‌ 15వేల మెగావాట్ల విద్యుత్తు డిమాండ్‌ ఉండగా, 2034-35 కల్లా అది 31,809 మెగావాట్లకు చేరుతుందని సీఈఏ అంచనా వేసింది. 2027-28లో 20 వేలు, 2030-31లో 25 వేలు, 2033-34లో 30 వేల మెగావాట్లు దాటుతుందని అంచనా వేసింది. ఈ మేరకు ‘రిపోర్ట్‌ ఆన్‌ రిసోర్స్‌ అడిక్వసీ ప్లాన్‌ ఫర్‌ ది స్టేట్‌ తెలంగాణ’ నివేదికను సీఈఏ ఇటీవలే విడుదల చేసింది.

2024-25లో విద్యుత్తు పీక్‌ డిమాండ్‌ 16,877 మెగావాట్లు దాటుతుందని సీఈఏ అంచనా వేసింది. ఇలా ఏటా 4 నుంచి 6% చొప్పున డిమాండ్‌ పెరుగుతుందని స్పష్టంచేసింది. విద్యుత్తు వినియోగం ఏటా 5% చొప్పున పెరుగుతున్నట్టు సంస్థ స్పష్టంచేసింది. విశేషమేంటంటే ప్రతి రెండేండ్లకు 5,000 మెగావాట్ల చొప్పున అధికం కానున్నది. రాబోయే పదేండ్లలో 2,938 మెగావాట్ల విద్యుత్తు పీపీఏ గడువు ముగియనున్నది. దీంతోడిమాండ్‌ పెరిగి, పీపీఏల గడువు ముగిస్తే విద్యత్తు సమస్య తీవ్రమయ్యే అవకాశాలు ఉన్నాయి.

గడువు ముగియనున్న పీపీఏలు

• రాబోయే పదేండ్లలో 1,916 మెగావాట్ల థర్మల్‌, 807 గ్యాస్‌, 160 మెగావాట్ల న్యూక్లియర్‌, మరో 54 మెగావాట్ల ఇతర విద్యుత్తు పవర్‌ పర్చేజ్‌ అగ్రిమెంట్ల (పీపీఏ) గడువు ముగియనున్నది.
• అత్యధికంగా 2029-30లో 1,299 మోగావాట్లు, 2028-29లో 545, 2024-25లో 358 మెగావాట్ల చొప్పున పీపీఏల గడువు ముగుస్తుంది.
• వచ్చే పదేండ్లలో 4,400 మెగావాట్ల పవన, 18,500 మెగావాట్ల సోలార్‌, 5,004 మెగావాట్ల డిస్ట్రిబ్యూటెడ్‌ రెన్యువబుల్‌ చొప్పున మొత్తంగా 27,904 మెగావాట్ల విద్యుత్తు ఉత్పత్తిని పెంచాలి.
• యాదాద్రిలో రెండో యూనిట్‌ ప్రస్తుతం అందుబాటులోకి రాగా, మిగతా నాలుగు యూనిట్లు 2025-26లో అందుబాటులోకి రావాల్సి ఉన్నది.
• విద్యుత్తు వినియోగం 2026-27లో లక్ష మిలియన్‌ యూనిట్లు దాటనుండగా, 2034-35లో 1.5 లక్షల మిలియన్‌ యూనిట్లకు చేరుతుంది.