కరోనా టెస్ట్‌ పేరుతో భూమి అక్రమ రిజిస్ట్రేషన్‌

వృద్ధురాలికి మాయమాటలు చెప్పి భూమి అక్రమంగా రిజిస్ట్రేషన్‌ చేయించుకోవడంపై నల్లగొండ జిల్లా కట్టంగూర్‌ మండలంలో కేసు నమోదైంది. పోలీసుల కథనం ప్రకారం.. కట్టంగూర్‌ మండలంలోని కల్మెర గ్రామానికి చెందిన బెల్లి ఎల్లమ్మ

కట్టంగూర్‌, ఫిబ్రవరి 19: వృద్ధురాలికి మాయమాటలు చెప్పి భూమి అక్రమంగా రిజిస్ట్రేషన్‌ చేయించుకోవడంపై నల్లగొండ జిల్లా కట్టంగూర్‌ మండలంలో కేసు నమోదైంది. పోలీసుల కథనం ప్రకారం.. కట్టంగూర్‌ మండలంలోని కల్మెర గ్రామానికి చెందిన బెల్లి ఎల్లమ్మ 20 రోజుల క్రితం జ్వరంతో ఇబ్బందిపడింది. ఈ సమయంలో ఆమె బంధువు బెల్లి వీరయ్య కరోనా టెస్టు పేరుతో ఎల్లమ్మను తాసిల్దార్‌ కార్యాలయానికి తీసుకెళ్లి ఆమె పేరిట ఉన్న 27 గుంటల భూమిని అతడి భార్య వాణి పేరిట గత నెల 19న రిజిస్ట్రేషన్‌ చేయించుకొన్నాడు. ఆలస్యంగా విషయం తెలుసుకొన్న ఆ వృద్ధురాలు ఈ నెల 16న ఎస్పీకి, 18న కట్టంగూర్‌ పోలీస్‌స్టేషన్‌లో ఫిర్యాదు చేసింది. నిందితుడు వీరయ్యను పోలీసులు అదుపులోకి తీసుకొన్నారు. కాగా, వీరయ్యను ఎస్సై విజయ్‌కుమార్‌ చితకబాదినట్టు సోషల్‌ మీడియాలో వైరలైంది. ఈ విషయమై ఎస్సైని వివరణ కోరగా బాధితురాలి ఫిర్యాదు మేరకు వీరయ్యను 18న సాయంత్రం స్టేషన్‌కు పిలిపించి విచారించినట్టు తెలిపారు. అనంతరం పెద్దల సమక్షంలో మాట్లాడుకుంటామని చెప్పడంతో పంపించామని స్పష్టంచేశారు..