బీఈడీ ఫీజు గరిష్ఠంగా 47 వేలు

రాష్ట్రంలోని ఉపాధ్యాయ విద్యాశిక్షణా కోర్సుల కాలేజీల్లో ట్యూషన్‌ ఫీజులను ప్రభుత్వం ఖరారు చేసింది. ప్రైవేట్‌, అన్‌ ఎయిడెడ్‌ బీఈడీ, ఎంఈడీ, యూజీ -డీపీడీ, బీపీఈడీ, ఎంపీఈడీ కోర్సుల కాలేజీల్లో ఫీజులను నిర్ణయించింది.

• కనిష్ఠంగా 16,500గా నిర్ణయం
• ఎంఈడీకి గరిష్ఠంగా 36 వేలు, కనిష్ఠంగా రూ.10వేలు
• పలు కోర్సులకు ఫీజుల ఖరారు
• విద్యాశాఖ జీవో జారీ

హైదరాబాద్‌, ఆగస్టు 1 (నమస్తే తెలంగాణ) : రాష్ట్రంలోని ఉపాధ్యాయ విద్యాశిక్షణా కోర్సుల కాలేజీల్లో ట్యూషన్‌ ఫీజులను ప్రభుత్వం ఖరారు చేసింది. ప్రైవేట్‌, అన్‌ ఎయిడెడ్‌ బీఈడీ, ఎంఈడీ, యూజీ -డీపీడీ, బీపీఈడీ, ఎంపీఈడీ కోర్సుల కాలేజీల్లో ఫీజులను నిర్ణయించింది. బీఈడీ కోర్సు ఫీజు గరిష్ఠంగా రూ. 47వేలు కాగా, కనిష్ఠంగా రూ. 16,500గా వెల్లడించింది. ఎంఈడీ కోర్సుకు గరిష్ఠంగా రూ.36 వేలు, కనిష్ఠంగా రూ.10వేల ఫీజుగా పేర్కొన్నది. ఈ మేరకు విద్యాశాఖ కార్యదర్శి వాకాటి కరుణ మంగళవారం జీవో -110ని విడుదల చేశారు.

ఈ ఫీజులు 2022 -25 బ్లాక్‌ పీరియడ్‌కు అమల్లో ఉంటాయని స్పష్టంచేశారు. తెలంగాణ అడ్మిషన్స్‌ అండ్‌ ఫీజు రెగ్యులేటరీ కమిటీ (టీఏఎఫ్‌ఆర్‌సీ) గతంలోనే విచారణ జరిపి, ఫీజుల సవరణ ప్రతిపాదనలను ప్రభుత్వానికి పంపించింది. ఈ నేపథ్యంలోనే ఆయా కోర్సుల ఫీజులను ప్రభుత్వం ఖరారు చేసింది. రాష్ట్రంలో 212 బీఈడీ కాలేజీలుండగా అత్యధికంగా కాలేజీల్లో ఫీజులు రూ.25 వేల నుంచి 30 వేల వరకున్నాయి.

మిగతా కోర్సుల ఫీజులిలా..

• రాష్ట్రంలో యూజీ -డీపీఈడీ కాలేజీలు మూడు ఉండగా, రెండు కాలేజీల్లో ఫీజు రూ. 25వేలు, మరో కాలేజీలో రూ.30వేలుగా ఖరారు చేశారు.
• బీపీఈడీ కోర్సున్న 16 కాలేజీల్లో ఫీజు కనిష్ఠంగా రూ.17వేలుండగా, గరిష్ఠంగా రూ. 32 వేలుగా సవరించారు.
• ఎంపీఈడీ కోర్సున్న ఒక కాలేజీలో ఫీజు రూ.30 వేలు, మరో కాలేజీలో రూ.25 వేలుగా ఉన్నది.
• ఎంఈడీ కోర్సున్న 8 కాలేజీల్లో ఫీజు కనిష్ఠంగా రూ.10 వేలు, గరిష్ఠంగా రూ.40వేలుగా నిర్ణయించారు.