ఉపాధ్యాయులా? క్లర్కులా?

పిల్లలు బడికి రావాలి. ఉపాధ్యాయులు పాఠాలు చెప్పాలి. కానీ పిల్లలు బడికొస్తున్నా పాఠాలు చెప్పేందుకు సమయం ఉండటమే లేదని ఉపాధ్యాయులు వాపోతున్నారు. విలువైన ఆ బోధనా సమయాన్ని విద్యాశాఖ, జిల్లా యంత్రాంగం మింగేస్తున్నదని మండిపడుతున్నారు. రికార్డులు, నివేదికలు ఇచ్చేందుకే సగం సమయం పోతున్నదని, ఇక పాఠాలు చెప్పేదెప్పుడని వారంతా నిట్టూరుస్తున్నారు. అసలు బోధన నుంచి పక్కకు తప్పించారని, క్లరికల్‌ పనులకు వాడుతున్నారని వాపోతున్నారు.

• బోధన సమయాన్ని మింగేస్తున్న విద్యాశాఖ
• వృథాగా టీచర్ల విలువైన బోధనా సమయం
• రికార్డులు, నివేదికల కోసమే సగం సమయం
• పాఠాలు చెప్పేదెప్పుడంటూ టీచర్ల నిట్టూర్పు!
• పెద్దసార్లు మారాలి.. పాఠాలు చెప్పే వీలు కల్పించాలని వినతి

హైదరాబాద్‌, ఆగస్టు 9 (నమస్తే తెలంగాణ): పిల్లలు బడికి రావాలి. ఉపాధ్యాయులు పాఠాలు చెప్పాలి. కానీ పిల్లలు బడికొస్తున్నా పాఠాలు చెప్పేందుకు సమయం ఉండటమే లేదని ఉపాధ్యాయులు వాపోతున్నారు. విలువైన ఆ బోధనా సమయాన్ని విద్యాశాఖ, జిల్లా యంత్రాంగం మింగేస్తున్నదని మండిపడుతున్నారు. రికార్డులు, నివేదికలు ఇచ్చేందుకే సగం సమయం పోతున్నదని, ఇక పాఠాలు చెప్పేదెప్పుడని వారంతా నిట్టూరుస్తున్నారు. అసలు బోధన నుంచి పక్కకు తప్పించారని, క్లరికల్‌ పనులకు వాడుతున్నారని వాపోతున్నారు.

బడి మొదలైంది మొదలు.. ఫేషియల్‌ అటెండెన్స్‌, మధ్యాహ్న భోజనం, ఎఫ్‌ఎల్‌ఎన్‌, ఎఫ్‌ఏ మార్కుల అప్‌లోడింగ్‌, పుస్తకాలు, నోటుబుక్స్‌, వర్క్‌బుక్స్‌, మొక్కలు నాటే పనులు నిత్యకృత్యమయ్యాయి. ఇవేకాకుండా యూడైస్‌లో వంద వివరాలు, జూమ్‌ మీటింగ్స్‌, కాంప్లెక్స్‌ సమావేశాలు అంటూ కాలమే కరిగిపోతున్నది. ఈ దశలో పాఠాలు చెప్పేదెప్పుడని టీచర్లే ప్రశ్నిస్తున్నారు. కొందరు అధికారులు తమ పైస్థాయి అధికారుల మెప్పు కోసం అత్యుత్సాహం ప్రదర్శిస్తున్నారని, కొందరు కలెక్టర్లు శృతి మించుతున్నారన్న ఆరోపణలు ఉపాధ్యాయ వర్గాల నుంచి వినిపిస్తున్నాయి.

కంప్యూటర్‌ ఆపరేటర్లుగా సీఆర్పీలు

క్లస్టర్‌ రిసోర్స్‌ పర్సన్లను ఎమ్మార్సీ, కాంప్లెక్స్‌ స్కూళ్లల్లో కంప్యూటర్‌ ఆపరేటర్లుగా వాడుతున్నారు. నిజానికి సమాచార సేకరణకు, మానిటరింగ్‌కు వారిని వినియోగించుకోవాలి. ఎవరైనా టీచర్‌ సెలవు పెడితే సీఆర్పీలను ఆ బడికి పంపించాలి. కానీ వీరిని ఆపరేటర్లుగా మార్చేశారని టీచర్లు అంటున్నారు. ‘ఇప్పటికైనా పెద్ద సార్లు మారాలి. బోధనకు అడ్డుగా మారిన కాగితాలు, ఆన్‌లైన్‌ రిపోర్టుల నుంచి మాకు విముక్తి ఇవ్వాలి. పార్మాట్లు ఇవ్వకుండా పాఠాలు చెప్పే వీలు కల్పించండి’ అంటూ పలువురు ఉపాధ్యాయులు వేడుకుంటున్నారు.

ఇదీ టీచర్ల పరిస్థితి

• ఏడాదిలో బడి నడిచేదే 230 పనిదినాలు. కాంప్లెక్స్‌ సమావేశాల పేరిట ఏటా ఆరుసార్లు, ప్రతిసారి రెండురోజుల చొప్పున అంటే 12 రోజులు బడి బోధనకు దూరం.
• ఏవైనా రిపోర్టులు ఇవ్వాల్సి వస్తే అరపూట ఆన్‌డ్యూటీ.. యూనిఫాం కోసం ఒక మూడు పూటలు, పుస్తకాల కోసం ఒకసారి, నోట్‌బుక్స్‌ కోసం మరోసారి టీచర్‌ ఎమ్మార్సీకి వెళ్లాల్సి వస్తుంది.
• జూన్‌ 12న విద్యాసంవత్సరం ప్రారంభమైంది. గడిచిన 25 రోజుల్లో 18 సార్లు గూగుల్‌ ఫాం నింపాలని లింకు ద్వారా అధికారులు ఆదేశాలు ఇచ్చారు.
• పాఠశాల పనివేళల్లో ఓ జిల్లా డీఈవో నాలుగు సార్లు జూమ్‌ మీటింగ్‌ నిర్వహించారట. 9:30 గంటలకు (బోధన సమయంలో) పేరెంట్స్‌ మీటింగ్‌పై మరో డీఈవో సమావేశం పెట్టారు. దీనిపై కొందరు టీచర్లు అభ్యంతరం వ్యక్తంచేశారు.
• ఓ జిల్లాలో విద్యార్థులకు ఇచ్చిన బూట్లు, సాక్స్‌లు రోజూ వేసుకు వస్తున్నారా? లేదా అంటూ గూగుల్‌ ఫాం నింపమన్నారట. కొన్నిచోట్ల విద్యార్థులు బూట్లు, సాక్స్‌లు వేసుకురాకుంటే ఆ జిల్లా కలెక్టర్‌ ఏకంగా టీచర్లను మందలించడమే గాక మెమోలిచ్చారట.
• ఎఫ్‌ఆర్‌ఎస్‌ హాజరును నమోదు చేస్తున్నారు. ఫలానా టీచర్‌, ఫలానా బడిలో ఈ రోజు నమోదుకాలేదని సందేశం పంపుతున్నారు. వీరు ఈరోజు ఆలస్యంగా వచ్చారని, గైర్హాజరయ్యారని, జాబితాను గ్రూపుల్లో పోస్టు చేస్తున్నారు. దీని వల్ల ఏం లాభం.
• ఇటు మండలానికి, అటు రాష్ట్ర వెబ్‌సైట్‌కు రోజూ విద్యార్థుల నమోదు పంపించాల్సి వస్తున్నది. ఈ తల్లిదండ్రుల సమావేశం ఆహ్వానాలు, తల్లిదండ్రులను పిలవడం, డాక్యుమెంట్లు, ఫొటోలు, సాక్ష్యాధారాలను వైబ్‌సైట్‌లో నమోదుచేయాలి. వీటికే చాలా సమయం పడుతున్నది.
• కొన్ని జిల్లాల్లో సైకిళ్ల పంపిణీ కోసం ఓ ప్రొఫార్మాను పంపించారు. బాలికల, బాలుర వివరాలు కావాలని మళ్లీ అడిగారు. ఇదంతా ఇచ్చేందుకు టీచర్లు బోధన పక్కనబెట్టి తంటాలు పడాల్సి వచ్చింది.