స్కూళ్లో ప్రతి రోజు 90 శాతం హాజరు ఉండాల్సిందే.. ప్రతి నెలా మూడో శనివారం బ్యాగ్‌లెస్‌డే

రాష్ట్రంలోని బడుల్లో ప్రతి రోజు 90% విద్యార్థులు హాజరయ్యేలా చూడాలని విద్యాశాఖ ఆదేశించింది. ఈ నెల 12 నుంచి బడులు ప్రారంభంకానున్న నేపథ్యంలో 2025-26 విద్యాసంవత్సరం అకాడమిక్‌ క్యాలెండర్‌ను విద్యాశాఖ డైరెక్టర్‌ ఈవీ నర్సింహారెడ్డి సోమవారం విడుదలచేశారు. ఈ ఏడాదిలో బడులకు 230 పనిదినాలుగా ఖరారుచేశారు.

• రోజూ 5 నిమిషాలు యోగా, ధ్యానం

హైదరాబాద్‌, జూన్‌ 9 (నమస్తే తెలంగాణ) : రాష్ట్రంలోని బడుల్లో ప్రతి రోజు 90% విద్యార్థులు హాజరయ్యేలా చూడాలని విద్యాశాఖ ఆదేశించింది. ఈ నెల 12 నుంచి బడులు ప్రారంభంకానున్న నేపథ్యంలో 2025-26 విద్యాసంవత్సరం అకాడమిక్‌ క్యాలెండర్‌ను విద్యాశాఖ డైరెక్టర్‌ ఈవీ నర్సింహారెడ్డి సోమవారం విడుదలచేశారు. ఈ ఏడాదిలో బడులకు 230 పనిదినాలుగా ఖరారుచేశారు. పదో తరగతి సిలబస్‌ను 2026 జనవరి 10లోగా, 1- 9 తరగతుల సిలబస్‌ను ఫిబ్రవరి 28 లోగా పూర్తిచేయాలని గడువు విధించారు. ప్రతి రోజు 5 నిమిషాలు యోగా, ధ్యానం చేయించాలని సూచించారు. పదో తరగతి వార్షిక పరీక్షలను మార్చిలో నిర్వహిస్తామని తెలిపారు. ప్రతి రోజు 30 నిమిషాలు విద్యార్థుల చేత చదివించాలని అకాడమిక్‌ క్యాలెండర్‌లో స్పష్టంచేశారు.

మరికొన్ని..

• ఆగస్టు మొదటి లేదా రెండో వారంలో పాఠశాలస్థాయిలో ఆటల పోటీలు నిర్వహిస్తారు. ఆగస్టు మూడో వారంలో జోనల్‌ టోర్నమెంట్స్‌ నిర్వహించి, జిల్లా సెలక్షన్స్‌ పూర్తిచేస్తారు.
• మూడో శనివారం బ్యాగ్‌లెస్‌డేగా పాటిస్తారు.
• రోజుకు 30 నిమిషాలపాటు రీడింగ్‌ యాక్టివిటీని తప్పనిసరిగా నిర్వహించాలి. ఈ సమయంలో పాఠ్యపుస్తకాలు, స్టోరీబుక్స్‌, దినపత్రికలు, మ్యాగ్జిన్లు వంటి వాటిని చదివించాలి.
• ప్రాథమిక పాఠశాలలు ఉదయం 9 గంటల నుంచి సాయంత్రం 4 వరకు, ప్రాథమికోన్నత, ఉన్నత పాఠశాలలు ఉదయం 9 నుంచి సాయంత్రం 4:15 గంటల వరకు నడుస్తాయి.