వచ్చే ఐదేండ్లలో ‘తలసరి’ డబుల్‌

రాష్ట్ర తలసరి ఆదాయం మరో ఐదారేండ్లలో రెట్టింపు అవుతుందని రాష్ట్ర ఆర్థిక సర్వే-2022 అంచనావేసింది. దేశ తలసరి ఆదాయం రెట్టింపు కావటానికి 8-9 ఏండ్లు పడుతుండగా, రాష్ట్రంలో మాత్రం ఐదేండ్లు పడుతున్నదని తెలిపింది. 2014-15 నుంచి 2021-22 వరకు సమ్మిళిత వార్షిక వృద్ధి రేటు (సీఏజీఆర్‌), తలసరి ఆదాయ వృద్ధిరేటులో తెలంగాణ, జాతీయ గణాంకాల ఆధారంగా ఈ అంచనా వేసింది

March 8, 2022 / 02:45 AM IST

దేశ తలసరి రెట్టింపునకు 8-9 ఏండ్లు
ఆర్థిక సర్వే వెల్లడి

రాష్ట్ర తలసరి ఆదాయం మరో ఐదారేండ్లలో రెట్టింపు అవుతుందని రాష్ట్ర ఆర్థిక సర్వే-2022 అంచనావేసింది. దేశ తలసరి ఆదాయం రెట్టింపు కావటానికి 8-9 ఏండ్లు పడుతుండగా, రాష్ట్రంలో మాత్రం ఐదేండ్లు పడుతున్నదని తెలిపింది. 2014-15 నుంచి 2021-22 వరకు సమ్మిళిత వార్షిక వృద్ధి రేటు (సీఏజీఆర్‌), తలసరి ఆదాయ వృద్ధిరేటులో తెలంగాణ, జాతీయ గణాంకాల ఆధారంగా ఈ అంచనా వేసింది. కరోనా సంక్షోభాన్ని అధిగమించి 2021-22లో రాష్ట్ర ఆర్థిక వ్యవస్థ వేగం పుంజుకొని స్థిర ధరల వద్ద 11.2 శాతం వృద్ధిరేటు నమోదుచేసిందని తెలిపింది.

తలసరి ఆదాయంలో రంగారెడ్డి జిల్లా టాప్‌

సోషియో ఎకనామిక్‌ ఔట్‌లుక్‌-2022 వెల్లడి

రాష్ట్ర తలసరి ఆదాయంలో తొలి మూడు స్థానాలను గ్రేటర్‌ హైదరాబాద్‌ పరిధిలోని జిల్లాలే కైవసం చేసుకొన్నాయి. ప్రస్తుత ధరల సూచీ ప్రకారం 6.58 లక్షల తలసరి ఆదాయంతో రంగారెడ్డి జిల్లా అగ్రస్థానంలో నిలిచింది. ఆ తర్వాతి స్థానాల్లో హైదరాబాద్‌, మేడ్చల్‌ మల్కాజ్‌గిరి జిల్లాలు ఉన్నట్టు సామాజిక ఆర్థిక సర్వే-2022 నివేదిక పేర్కొన్నది. వికారాబాద్‌, కుమ్రంభీం ఆసిఫాబాద్‌, హనుమకొండ జిల్లాలు చివరి మూడు స్థానాల్లో ఉన్నాయి.

నివేదికలోని ముఖ్యాంశాలు

2021-22లో తెలంగాణ జీఎస్డీపీ 19.1 శాతం వృద్ధి సాధించి రూ.11.55 లక్షల కోట్లకు చేరింది.
2021-22లో తలసరి ఆదాయం రూ.2.79 లక్షలు. జాతీయ తలసరి ఆదాయంతో (రూ.1.50 లక్షలు) పోల్చితే 1.86 రెట్లు ఎక్కువ.
ప్రస్తుత ధరల వద్ద వ్యవసాయ, అనుబంధ రంగాల జీవీఏ (గ్రాస్‌ వ్యాల్యూ యాడెడ్‌) 2020-21లో 12.24 శాతం, 2021-22లో 9.09 శాతంగా నమోదైంది.
గత ఏడేండ్లలో తెలంగాణ వ్యవసాయ రంగం సగటున 9.75 శాతం వృద్ధి సాధిస్తున్నది.
8 సీజన్లలో కలిపి రైతుబంధు కింద రూ.50వేల కోట్లు పంపిణీ చేశారు.
2019-20తో పోల్చితే గతేడాది రాష్ట్రంలో జీవాల సంఖ్య 22.21 శాతం పెరిగింది. ఈ రంగంలో దేశంలోనే తెలంగాణది మొదటి స్థానం.
2021-22లో పారిశ్రామిక రంగం జీవీఏ వృద్ధిరేటు 20.23 నమోదైంది. సేవారంగంలో 18.32 శాతం వృద్ధి నమోదు చేసింది.
ఐటీ ఎగుమతులు ఏడేండ్లలో రూ.66 వేల కోట్ల నుంచి రూ.1.45 లక్షల కోట్లకు, ఉద్యోగుల సంఖ్య 3.71 లక్షల నుంచి 6.28 లక్షలకు పెరిగింది.