Visit:
నిర్మల్‌ : ఆత్మ గౌర‌వానికి ప్రతీక భారత రాజ్యాంగ నిర్మాత, భారతరత్న డా.బీఆర్‌. అంబేద్కర్ అని న్యాయ శాఖ మంత్రి ఇంద్రకరణ్‌ రెడ్డి అన్నారు. స‌చివాల‌యానికి అందరివాడైనా అంబేద్కర్ పేరు పెట్టడం మ‌నంద‌రికీ గర్వకారణం అన్నారు.
అంబేద్కర్ భారత రాజ్యాంగంలో కల్పించిన హక్కులతో ప్రతి ఒక్కరూ తల ఎత్తుకొని ధైర్యంగా, ఆత్మగౌరవంతో జీవిస్తున్నారు. అలాంటి మహానుభావుని పేరుని తెలంగాణ స‌చివాల‌యానికి పెట్టడం మ‌నంద‌రికి గర్వకారణం అన్నారు.
దేశంలోనే కాకుండా ప్రపంచ వ్యాప్తంగా గొప్ప చరిత్ర కలిగిన వారిలో డా.బీఆర్‌.అంబేద్కర్ ఒకరని, అలాంటి మ‌హనీయుడి పేరు స‌చివాల‌యానికి పెట్టడం హ‌ర్షించ‌ద‌గ్గ విష‌య‌మ‌ని తెలిపారు. ఈ సంద‌ర్భంగా సీఎం కేసీఆర్‌కు ధన్యవాదాలు తెలిపారు.
ప్రజాస్వామికి ఔన్నత్యానికి ఒక సమున్నత ప్రతీకైన జాతి నిర్మాత అంబేద్కర్ పేరు పెట్టి ఆయ‌న పట్ల త‌న‌కున్న గౌర‌వాన్ని సీఎం చాటుకున్నార‌ని మంత్రి ప్రశంసించారు. చిన్న రాష్ట్రాలతోనే అభివృద్ధి సాధ్యమన్న అంబేద్కర్ సిద్ధాంతం ప్రకారమే తెలంగాణ రాష్ట్ర ఏర్పాటు స్వప్నం సాకారమైందన్నారు.
మ‌రోవైపు కొత్త పార్లమెంట్ బిల్డింగ్‌కు అంబేద్కర్ పేరు పెట్టాలని మంత్రి డిమాండ్ చేశారు. అంబేద్కర్ పట్ల వారికి అభిమానం, గౌర‌వం ఉంటే ఈ ప్రాంత బీజేపీ నేత‌లు పార్లమెంట్‌కు అంబేద్కర్ పేరు పెట్టేలా కేంద్రంపై ఒత్తిడి తేవాలన్నారు.
