Viral News | క‌స్ట‌మ‌ర్ల దుర‌దే అత‌డికి వ్యాపారం.. ఒక గంట గోకించుకుంటే రూ.4.200 ఫీజు

Viral News | సాధారణంగా మనం చేసే ఒక చిన్న పనిని ఒక అద్భుతమైన వ్యాపార ఆలోచనగా మ‌లుచుకుని విజ‌యం సాధించ‌వ‌చ్చు. అయితే ఇలా మలిచి విజయం సాధించడం అందరికీ సాధ్యం కాదు. కానీ చైనా (China) కు చెందిన 32 ఏళ్ల జాంగ్ జియాఖియావో (Jang JiaKhiyao) అనే యువ పారిశ్రామికవేత్త సరిగ్గా ఇదేచేసి చూపించాడు.

Viral News : సాధారణంగా మనం చేసే ఒక చిన్న పనిని ఒక అద్భుతమైన వ్యాపార ఆలోచనగా మ‌లుచుకుని విజ‌యం సాధించ‌వ‌చ్చు. అయితే ఇలా మలిచి విజయం సాధించడం అందరికీ సాధ్యం కాదు. కానీ చైనా (China) కు చెందిన 32 ఏళ్ల జాంగ్ జియాఖియావో (Jang JiaKhiyao) అనే యువ పారిశ్రామికవేత్త సరిగ్గా ఇదేచేసి చూపించాడు. ఒంటిపై దురదగా ఉన్నప్పుడు వేరొకరితో గోకించుకోవడాన్ని ఒక ప్రొఫెషనల్ సేవగా మార్చి నెలకు లక్షలు సంపాదిస్తున్నాడు. ఈ వినూత్న వ్యాపారం ఇప్పుడు చైనాలో హాట్ టాపిక్‌గా మారింది.

షెంజెన్ నగరంలో జాంగ్ ఈ వ్యాపారాన్ని ప్రారంభించాడు. ఒక గంటపాటు గోకించుకునేందుకు కస్టమర్ల నుంచి సుమారు 300 యువాన్లు (భారత కరెన్సీలో దాదాపు రూ.4,200) వసూలు చేస్తున్నాడు. ఈ వింత సేవకు అనూహ్యమైన స్పందన రావడంతో అతని రెండు అవుట్‌లెట్‌ల ద్వారా నెలకు 100,000 యువాన్ల (దాదాపు రూ.14 లక్షలు) ఆదాయం వస్తున్నట్లు నివేదికలు చెబుతున్నాయి. ఈ ఏడాది మే నెలలో షెంజెన్‌లోని బోవాన్ జిల్లాలో ‘సుమా’ అనే బ్రాండ్‌తో మొదటి స్టోర్‌ను ప్రారంభించిన జాంగ్, కేవలం నెల రోజుల వ్యవధిలోనే ఫుటియాన్ జిల్లాలో రెండో బ్రాంచీని కూడా తెరిచాడు.

ఈ సేవ ఎలా పనిచేస్తుందంటే కస్టమర్లు సౌకర్యవంతమైన పడకలపై పడుకుంటారు. ప్రత్యేకంగా శిక్షణ పొందిన సిబ్బంది, దీని కోసమే తయారు చేసిన పరికరాలతో (పదునైన గోళ్ల వంటివి) వారి శరీరంపై సున్నితంగా గోకుతారు. కస్టమర్లు తమకు ఎక్కడ దురదగా ఉందో లేదా ఎక్కడ గోకించుకోవాలని ఉందో నిర్దేశించవచ్చు. ఈ సేవ ద్వారా తీవ్రమైన ఒత్తిడి నుంచి ఉపశమనం పొందవచ్చని, ప్రశాంతమైన నిద్ర పడుతుందని జాంగ్ మార్కెటింగ్ చేస్తున్నాడు. ఈ సేవను వినియోగించుకుంటున్న వారిలో 70 శాతం పురుషులేనని జాంగ్ తెలిపాడు.

చాలా మంది కస్టమర్లు సాధారణ మసాజ్‌ల కంటే ఈ అనుభవం ఎంతో విశ్రాంతిని ఇస్తోందని చెప్పి, మళ్లీ మళ్లీ వస్తున్నారని చెబుతున్నాడు. ఆన్‌లైన్‌లో “వీపు గోకడానికి ఎవరైనా ఉంటే డబ్బులు ఇస్తాం” అనే కామెంట్లను చూసినప్పుడు జాంగ్‌కు ఈ ఆలోచన తట్టింది. చిన్నతనంలో తన తండ్రి తనకు వీపు గోకిన జ్ఞాపకాలు కూడా ఈ వ్యాపారానికి స్ఫూర్తినిచ్చాయని చెప్పాడు. గతంలో సరిహద్దు ఈ-కామర్స్, వీ-మీడియా వంటి పలు వ్యాపారాల్లో విఫలమైన జాంగ్.. ఈ వినూత్న ఆలోచనతో విజయం సాధించాడు.

ప్రస్తుతం తన రెండు స్టోర్లు పెట్టిన పెట్టుబడిని తిరిగి సంపాదించి లాభాల బాటలో పయనిస్తున్నాయని తెలిపాడు. భవిష్యత్తులో చైనావ్యాప్తంగా 100 అవుట్‌లెట్‌లను విస్తరించాలని, ఈ ‘గోకడం’ అనే సేవను ఒక గుర్తింపు పొందిన వృత్తిగా మార్చి, దానికోసం నిర్దిష్టమైన శిక్షణ, ప్రమాణాలను ఏర్పాటు చేయాలనేది తన దీర్ఘకాలిక లక్ష్యమని జాంగ్ ధీమా వ్యక్తం చేస్తున్నాడు.