Telangana | రాష్ట్రంలో తగ్గిన పశుసంపద

తెలంగాణలో పశుసంపద తగ్గింది. ఆవులు, గేదెలు, గొర్రెలు, మేకలు తగ్గాయి. నాటుకోళ్ల సంఖ్య కూడా గణనీయంగా తగ్గుతున్నది. కేంద్రం నిర్వహించిన 21వ జాతీయ పశుగణనలో ఈ వివరాలు వెల్లడయ్యాయి. 2019లో జరిగిన 20వ పశుగణనతో పోలిస్తే తెలంగాణలో పశుసంపద తగ్గినట్టు తేలింది. తెలంగాణ ఆవిర్భావం తర్వాత 2014లో పశుగణన జరిగింది.

• 38 శాతం తగ్గిన నాటుకోళ్లు
• 21వ జాతీయ పశుగణన వెల్లడి

Telangana | హైదరాబాద్‌, మే 16 (నమస్తేతెలంగాణ): తెలంగాణలో పశుసంపద తగ్గింది. ఆవులు, బర్రెలు, గొర్రెలు, మేకలు తగ్గాయి. నాటుకోళ్ల సంఖ్య కూడా గణనీయంగా తగ్గుతున్నది. కేంద్రం నిర్వహించిన 21వ జాతీయ పశుగణనలో ఈ వివరాలు వెల్లడయ్యాయి. 2019లో జరిగిన 20వ పశుగణనతో పోలిస్తే తెలంగాణలో పశుసంపద తగ్గినట్టు తేలింది. తెలంగాణ ఆవిర్భావం తర్వాత 2014లో పశుగణన జరిగింది. తర్వాత 2019లో చేపట్టిన పశుగణన నాటికి 512.06 మిలియన్ల నుంచి 535.82 మిలియన్లకు పశువుల సంఖ్య పెరిగింది. ఈ సారి తగ్గుదలను అధికారులు గుర్తించారు.

తగ్గుదల వివరాలు

• ఆవులు సూర్యాపేటలో 62.65శాతం, సంగారెడ్డిలో 50.74, మెదక్‌లో 45.26, మహబూబాబాద్‌లో 43.64 శాతం చొప్పున తగ్గాయని అధికారులు గుర్తించారు.
• బర్రెలు సంగారెడ్డిలో 46.14 శాతం, కామారెడ్డిలో 45.92 శాతం, మెదక్‌లో 45.32 శాతం, మహబూబాబాద్‌లో 43.23 శాతం తగ్గాయి.
• గొర్రెలు మేడ్చల్‌-మలాజిగిరిలో 60.35 శాతం, పెద్దపల్లిలో 37.09, హైదరాబాద్‌లో 35.29, కరీంనగర్‌లో 30.89, మెదక్‌లో 30.06 శాతం చొప్పున తగ్గాయని అధికారులు గుర్తించారు.
• మేకలు హైదరాబాద్‌లో 40.87 శాతం, ములుగులో 32.52 శాతం, సంగారెడ్డిలో 29.76 శాతం, రంగారెడ్డిలో 25.83 శాతం తగ్గాయి.
• నాటుకోళ్లు 38 శాతం తగ్గిపోయాయి.