Cotton | వర్షాల ఆలస్యంపై ఆందోళన వద్దు.. జూలై 20 వరకు పత్తి పెట్టొచ్చు

పంటల సాగుకు సమయం మించిపోలేదని, వర్షాల ఆలస్యంపై రైతులు ఆందోళన చెందవద్దని వ్యవసాయ శాస్త్రవేత్తలు సూచిస్తున్నారు.

• మక్కజొన్న జూలై 15 వరకు వేసుకోవచ్చు
• సరైన రకాల విత్తనాలను ఎంచుకోవాలి
• సమయం మించలేదని వ్యవసాయ శాస్త్రవేత్తల వెల్లడి

Cotton |  హైదరాబాద్‌, జూన్‌ 20 (నమస్తే తెలంగాణ): పంటల సాగుకు సమయం మించిపోలేదని, వర్షాల ఆలస్యంపై రైతులు ఆందోళన చెందవద్దని వ్యవసాయ శాస్త్రవేత్తలు సూచిస్తున్నారు. మరో రెండు రోజుల్లో రుతుపవనాలు రాష్ట్రంలోకి ప్రవేశించే అవకాశం ఉన్నదని, విత్తనాలు విత్తేందుకు రైతులు సిద్ధంగా ఉండాలని పేర్కొన్నారు. పలు పంటల సాగులో పాటించాల్సిన మెళుకువలను వ్యవసాయ యూనివర్సిటీ పరిశోధనా విభాగం డైరెక్టర్‌ రఘురామిరెడ్డి రైతులకు సూచించారు.

వివిధ పంటల సాగుకు సూచనలు

• ఇప్పుడు వరి నార్లు పోసుకోవాలనుకునే రైతులు స్వల్పకాలిక (125 రోజుల కన్నా తక్కువ) వరి రకాలను మాత్రమే ఎంచుకోవాలి.
• పత్తి విత్తనాలను జూలై 20 వరకు విత్తుకోవచ్చు. పత్తిలో అంతర పంటగా కంది వేసుకోవాలి.
• కంది విత్తనాలను ఆగస్టు 15 వరకు విత్తుకోవచ్చు.
• సోయాచిక్కుడు విత్తనాలను జూన్‌ నెలాఖరు వరకు విత్తుకోవచ్చు.
• మక్కజొన్నను జూలై 15 వరకు విత్తుకోవచ్చు.
• పెసర, మినుము విత్తనాలను జూలై 15 వరకు విత్తుకోవచ్చు.
• ఇతర ఆరుతడి పంటలైన ఆముదాలు, సన్‌ఫ్లవర్‌, ఉలువలు జూలై 31వరకు సాగు చేసుకోవచ్చు.