Telangana Budget | కాపీ పేస్ట్‌ బడ్జెట్‌.. గత ప్రసంగాన్నే పఠించిన మంత్రులు!

బడ్జెట్‌ అంటే ఆదాయ వ్యయాల నివేదిక. ప్రజాధ నాన్ని ప్రభుత్వం ఎట్లా ఖర్చుచేయనుందో తెలిపే సమగ్ర నివేదిక. అలాంటి బడ్జెట్‌ రూపకల్పన అత్యంత పకడ్బందీగా జరగాలి.

• పాత బడ్జెట్‌ నుంచి ఎత్తిపోతలు
• పద్దులు కూడా కాపీ కొట్టారా?
• ఆర్థిక, రాజకీయవేత్తల విస్మయం

Telangana Budget | హైదరాబాద్‌, మార్చి 19 (నమస్తే తెలంగాణ)/(స్పెషల్‌ టాస్క్‌ బ్యూరో): బడ్జెట్‌ అంటే ఆదాయ వ్యయాల నివేదిక. ప్రజాధ నాన్ని ప్రభుత్వం ఎట్లా ఖర్చుచేయనుందో తెలిపే సమగ్ర నివేదిక. అలాంటి బడ్జెట్‌ రూపకల్పన అత్యంత పకడ్బందీగా జరగాలి. కానీ, ఆర్థిక మంత్రి భట్టి విక్రమార్క బుధవారం అసెంబ్లీలో ప్రవేశపెట్టిన బడ్జెట్‌ ప్రసంగ పాఠం ‘చర్విత చరణం’ అన్నట్టుగా ఉంది. చాలా మటుకు పాత బడ్జెట్‌ నుంచి ఎత్తిపోసినట్టుగా కనిపిస్తోందని, గత ప్రసంగాన్నే మంత్రులు పఠించినట్టుగా అనిపిస్తోందని ఆర్థికవేత్తలు చెప్తున్నారు. పద్దులను కూడా పాత బడ్జెట్‌ నుంచి ఎత్తిపోశారేమో అని అనుమానాలు వ్యక్తం చేస్తున్నారు. రైతు భరోసాపై నిరుడు బడ్జెట్‌లో ఎకరాకు రూ.15 వేలిస్తామని, ఇప్పుడేమో రూ.12 వేలే ఇస్తామని చెప్పారు. బడ్జెట్‌లో ఇలాంటి తప్పిదాలు అనేకం కనిపిస్తున్నాయి.

వెలుగులోకి వచ్చిన కొన్ని తప్పిదాలు

• పాత బడ్జెట్‌లో: స్కూల్‌ యూనిఫామ్‌లను కుట్టే పనిని స్వయం సహాయక బృందాలకు అప్పగించాలని ఆదేశించాం. స్కూల్‌ యూనిఫామ్‌ కుట్టు చార్జీలను జతకు రూ.50-75కు పెంచాం. (పేజీ నంబర్‌ 35)
• కొత్త బడ్జెట్‌లో: విద్యార్థుల యూనిఫామ్‌లు కుట్టే బాధ్యతలను స్వయం సహాయక సంఘాలకు అప్పగించాం. కుట్టు చార్జీలను జతకు రూ.75కు పెంచాం. (పేజీ నంబర్‌ 35)
• పాత బడ్జెట్‌లో: కోటి మంది మహిళలను కోటీశ్వరులను చేసేందుకు మా ప్రభుత్వం కంకణం కట్టుకుంది. (పేజీ నంబర్‌ 36 )
• కొత్త బడ్జెట్‌లో: ఇందిరా మహిళా శక్తి పథకం ద్వారా కోటి మంది మహిళలకు వడ్డీ లేకుండా రూ.లక్ష కోట్ల రుణాలిస్తాం. (పేజీ నంబర్‌ 37)
• పాత బడ్జెట్‌లో: రైతు భరోసా రూ.15 వేలు. (పేజీ నంబర్‌ 17)
• కొత్త బడ్జెట్‌లో: ఎకరాకు రూ.12 వేలే ఇస్తాం. (పేజీ నంబర్‌ 15)
• పాత బడ్జెట్‌లో: ప్రతి నియోజకవర్గంలో 3,500 చొప్పున మొత్తం 4.5 లక్షల ఇండ్ల నిర్మాణానికి సహకారం. (పేజీ నంబర్‌ 27)
• కొత్త బడ్జెట్‌లో: ప్రతి నియోజకవర్గానికి 3,500 చొప్పున 4.5 లక్షల ఇండ్లను మంజూరు చేస్తాం. (పేజీ నంబర్‌ 12)
• పాత బడ్జెట్‌లో: 200 యూనిట్లలోపు వినియోగించుకునే గృహాలకు ఉచితంగా విద్యుత్తు అందించడమే గృహజ్యోతి పథకం లక్ష్యం. (పేజీ నంబర్‌ 26 )
• కొత్త బడ్జెట్‌లో: 200 యూనిట్లలోపు వినియోగదారులకు ఉచిత విద్యుత్తు అందిస్తున్నాం. (పేజీ నంబర్‌ 12)
• పాత బడ్జెట్‌లో: ఆర్‌ఆర్‌ఆర్‌తో హైదరాబాద్‌ ఉత్తర, దక్షిణ ప్రాంతాలను, తూర్పు పశ్చిమ ప్రాంతాలను కలుపుతూ జాతీయ రహదారి నెట్‌వర్క్‌తో అనుసంధానిస్తాం. తొలుత 4 లేన్లు, తర్వాత 6 లేన్లకు విస్తరిస్తాం. (పేజీ 44)
• కొత్త బడ్జెట్‌లో: హైదరాబాద్‌ నలువైపులా జాతీయ రహదారి నెట్‌వర్క్‌లో ఉన్న లోటును పూడ్చడానికి ఆర్‌ఆర్‌ఆర్‌ ప్రణాళిక రూపొందించాం. ఈ రహదారిని ఎక్స్‌ప్రెస్‌హైవే ప్రమాణాలతో అభివృద్ధి చేస్తాం. మొదట 4 లేన్లుగా, భవిష్యత్తులో 8 లేన్లకు విస్తరిస్తాం.(పేజీ నంబర్‌ 61).

అంకెల గారడీ
పాత బడ్జెట్‌ నుంచి తీసుకున్న అంకెలను కాంగ్రెస్‌ ప్రభుత్వం అటూ ఇటూ మార్చి రూ.3,04,965 కోట్లతో తాజా బడ్జెట్‌ను రూపొందించినట్టు కనిపిస్తోందని, నిరుడు జూలై 25న ప్రవేశపెట్టిన రాష్ట్ర బడ్జెట్‌ 2024-25 పట్టికను విశ్లేషిస్తే ఈ విషయం అర్థమవుతుందని పలువురు ఆర్థికవేత్తలు స్పష్టం చేస్తున్నారు. తాజా బడ్జెట్‌లో కొత్త స్కీమ్‌లు, దార్శనిక నిర్ణయాలు ఏమీ లేవని, దీర్ఘకాలిక వ్యూహాల సంగతే మరిచాచరని, అంకెల గారడీ తప్ప ఈ బడ్జెట్‌కు దశ-దిశ అనేదే లేదని విమర్శిస్తున్నారు.