Ibrahimpatnam | పెండింగ్‌ బిల్లు కోసం.. ఇబ్రహీంపట్నం తహసీల్దార్‌ కార్యాలయానికి తాళం వేసిన కాంట్రాక్టర్

కాంగ్రెస్‌ ఏడాది పాలనలో రాష్ట్రంలో అన్నివర్గాలవారు తీవ్ర ఇబ్బందులకు గురవుతున్నారు. చేసిన పనులకు బిల్లులు చెల్లించకపోవడంతో కాంట్రాక్టర్లు, మాజీ సర్పంచులు, స్థానిక సంస్థల ప్రజాప్రతినిధులు, పెట్టుబడి సాయం అందక, రుణాలు మాఫీ కాక రైతులు, కోట్లు పెట్టుబడిపెట్టి కట్టిన ఇండ్లు అమ్ముడుపోక రియల్‌ ఎస్టేట్ వ్యాపారులు ఆత్మహత్యలు చేసుకుంటున్నారు.

ఇబ్రహీంపట్నం: కాంగ్రెస్‌ ఏడాది పాలనలో రాష్ట్రంలో అన్నివర్గాలవారు తీవ్ర ఇబ్బందులకు గురవుతున్నారు. చేసిన పనులకు బిల్లులు చెల్లించకపోవడంతో కాంట్రాక్టర్లు, మాజీ సర్పంచులు, స్థానిక సంస్థల ప్రజాప్రతినిధులు, పెట్టుబడి సాయం అందక, రుణాలు మాఫీ కాక రైతులు, కోట్లు పెట్టుబడిపెట్టి కట్టిన ఇండ్లు అమ్ముడుపోక రియల్‌ ఎస్టేట్ వ్యాపారులు ఆత్మహత్యలు చేసుకుంటున్నారు. ఏడాది తమ పరిస్థితి తారుమారు కావడంతో అవస్థలు పడుతున్నారు. రెండు నెలల క్రితం గురుకుల విద్యా సంస్థల భవనాలు, హాస్టళ్లకు బిల్లులు చెల్లించకపోవడంతో వాటి యజమానుల ఏకంగా గేట్లకు తాళాలు వేసిన విషయం తెలిసిందే. తాజాగా ఓ కాంట్రాక్టర్‌ జెడ్పీ గెస్ట్‌ హౌస్‌కు తాళం వేసి నిరసన వ్యక్తం చేశారు. రంగారెడ్డి జిల్లా ఇబ్రహీంపట్నం పట్టణంలోని జెడ్పీ అథిగృహంలో నడుస్తున్న తహసీల్దార్‌ కార్యాలయానికి తాళం వేశారు. భవన నిర్మాణానికి సంబంధించిన రూ.50 బిల్లును విడుదల చేయాలని ప్రభుత్వాన్ని అభ్యర్థించారు.

పట్టణంలోని జెడ్పీ అతిగృహ భవనాన్ని దానయ్య అనే కాంట్రాక్టర్‌ నిర్మించారు. దానికోసం రూ.50 లక్షలు వెచ్చించారు. భవన నిర్మాణం పూర్తయి చాలా కాలం అవుతున్నప్పటికీ తనకు బిల్లు చెల్లించలేదని వాపోయారు. ‘జెడ్పీ గెస్ట్‌హౌస్‌ భవన నిర్మాణానికి సంబంధించిన రూ.50 లక్షల బిల్లులు రావాల్సి ఉంది. ఎమ్మార్వో ఆఫీస్‌ శిథిలావస్థకు చేరుకోవడంతో జెడ్పీ గెస్ట్‌ హౌస్‌ నిర్మాణాన్ని త్వరగా పూర్తిచేయాలని ఏఈ ఆదేశించారు. తీరా నిర్మాణం పూర్తయి చాలా రోజులు గడుస్తున్నా బిల్లుల విషయమై ఏఈ కానీ, ఇతర అధికారులు కానీ స్పందించడం లేదు. భవన నిర్మాణానికైన రూ.50 లక్షల అప్పుకు లక్షలకు లక్షలు మిత్తి అయింది. లక్షకు రూ.3 మిత్తి చొప్పున తీసుకొచ్చి కడుతున్నా. ఇదే ఆఫీస్‌లో నా 20 గుంటల భూమిని అమ్మి ఇక్కడే రిజిస్ట్రేషన్‌ చేయించా. వచ్చిన డబ్బుతో ఇక్కడే అప్పులు ఇచ్చినవారికి పంచాను. అయినా అప్పు తీరకపోవడంతో యంజాల్‌లో ఉన్న 120 గజాల ప్లాట్‌ను అమ్మాను. అయినప్పటికీ అప్పు తీరకపోవడంతో రుణాలు ఇచ్చినవాళ్లు ఇంటికొచ్చి గొడవ చేయడంతోపాటు తాళం పెట్టారు. ఆ బాధ ఏగలేక ఆత్మహత్య చేసుకుందామని ప్రయత్నించా. తలుపులు పలగొట్టి తన పిల్లలు రక్షించారు. ఐదు రోజులు దవాఖానలో చికిత్స తీసుకున్నా. ఉన్న భూమి పోయింది, ప్లాటు పోయింది. భార్యా పిల్లలకు, ఇంటికి దూరమైపోయిన. ఇప్పుడు కీసరలో రోజుకు రూ.800 కూలీకి కంప్రెషన్‌ బండి నడుపుకుంటూ బతుకున్నానని వాపోయారు. కాంట్రాక్టర్‌గా ఉన్న తాను రోజు కూలీగా మారిపోయాను’ అని చెప్పారు. ఇప్పటికైనా దయతలచి తనకు రావాల్సిన డబ్బును ఇప్పించాలని కోరారు.