శాంతి లేదు.. భద్రత కరువు!

రాష్ట్రంలో అడుగడుగునా నిఘా వైఫల్యం కొట్టొచ్చినట్టు కనిపిస్తున్నది. కొన్నాళ్లుగా ప్రజలకు శాంతి లేదు.. భద్రత అసలే లేదనే వాదన వినిపిస్తున్నది. వరుస వైఫల్యాలు, ఆరోపణలు చూస్తుంటే ‘ఈ పోలీసు వ్యవస్థకు ఏమైంది?’ అని పలువురు సందేహం వ్యక్తంచేస్తున్నారు.

• ప్రతి అంశంలోనూ ఇంటెలిజెన్స్‌ వైఫల్యం
• రాష్ట్రంలో అదుపుతప్పుతున్న శాంతిభద్రతలు
• డీజీపీ ఆఫీసు దగ్గర్లో కాంగ్రెస్‌, బీజేపీ దాడులు
• సాయంత్రం వరకూ అదుపులోకిరాని అల్లర్లు
• నిన్నటి ఘర్షణల వెనుక ప్రభుత్వ పెద్దల హస్తం!

హైదరాబాద్‌, జనవరి 7 (నమస్తే తెలంగాణ) : రాష్ట్రంలో అడుగడుగునా నిఘా వైఫల్యం కొట్టొచ్చినట్టు కనిపిస్తున్నది. కొన్నాళ్లుగా ప్రజలకు శాంతి లేదు.. భద్రత అసలే లేదనే వాదన వినిపిస్తున్నది. వరుస వైఫల్యాలు, ఆరోపణలు చూస్తుంటే ‘ఈ పోలీసు వ్యవస్థకు ఏమైంది?’ అని పలువురు సందేహం వ్యక్తంచేస్తున్నారు. సిబ్బంది పనితీరును పర్యవేక్షించాల్సిన ఉన్నతాధికారులు అలసత్వం వహిస్తున్నారని విమర్శలు వినిపిస్తున్నాయి.

బజారెక్కిన బీజేపీ, కాంగ్రెస్‌ శ్రేణులు

అసెంబ్లీకి, డీజీపీ ఆఫీస్‌ సమీపంలోనే మంగళవారం మధ్యాహ్న నుంచి సాయంత్రం వరకు బీజేపీ, కాంగ్రెస్‌ కార్యకర్తలు కర్రలు, రాళ్లు, గుడ్లతో పరస్పరం దాడి చేసుకున్నారు. ఇరువర్గాల కార్యకర్తలకు రక్తమోడింది. ఇంత గొడవ జరిగినా సమయానికి బలగాలను దింపి, అల్లరిమూఖలను చెదరగొట్టడంతో పోలీసులు పూర్తిగా విఫలమయ్యారని విమర్శలు వినిపిస్తున్నాయి.

అధిష్ఠానం దృష్టిలో పడేందుకేనా?

కాంగ్రెస్‌ ప్రధానకార్యదర్శి ప్రియాంకగాంధీపై బీజేపీ ఢిల్లీ నాయకుడు చేసిన వ్యాఖ్యలే ఘర్షణకు దారితీశాయి. ధీటుగా స్పందించామని చెప్పుకునేందుకు ప్రభుత్వలోని ముఖ్యమైన నేతలే బీజేపీ ఆఫీస్‌పై దాడి చేయించి ఉండొచ్చని రాజకీయ విశ్లేషకులు అభిప్రాయం వ్యక్తంచేస్తున్నారు. దాడుల వార్తలు జాతీయ మీడియాలో ప్రసారమయ్యాయి. బీజేపీ నేతలు కూడా గాంధీభవన్‌ వద్ద హంగామా సృష్టించారు.

నిఘా వైఫల్యం.. నిత్యకృత్యం

• తెలంగాణలో నిఘా విభాగం అప్రమత్తంగా లేదని విమర్శలు వెల్లువెత్తుతున్నాయి. ఇందుకు కొన్ని ఘటనలను విశ్లేషకులు ఉదహరిస్తున్నారు.
• ఓ ఉగ్రవాది హైదరాబాద్‌లో 6నెలలు తలదాచుకున్నాడు. అతని ఉనికిని అంచనా వేయడంలో ఇంటెలిజెన్స్‌ పూర్తిగా విఫలమైంది. ఢిల్లీ నుంచి ఎన్‌ఐఏ అధికారులొచ్చి అతన్ని అరెస్టు చేశారు.
• కాంగ్రెస్‌ పాలనలో భైంసా, హైదరాబాద్‌ పాతబస్తీ, బోడుప్పల్‌, మెదక్‌, జైనూర్‌ సహా 9 చోట్ల మత ఘర్షణలు జరిగాయి.
• సికింద్రాబాద్‌లోని ముత్యాలమ్మ ఆలయంపై దాడి జరిగింది. దాడికి ముందు ఇతర రాష్ట్రాలకు చెందిన 151 మంది ఒకే వర్గం యువకులు సికింద్రాబాద్‌లోని హోటల్లో 59 గదుల్లో మకాం వేయడం విస్మయానికి గురిచేసింది.
• నగరంలోని పలు చోట్ల వరుస దొంగతనాలు పాల్పడిన ముఠాలు చాలా ముందుగానే నగరంలోకి వచ్చాయి. కానీ పోలీసులు గుర్తించలేదు. రౌడీషీటర్ల మీద కూడా నిఘా లేకపోవడంతో హత్యలు, ఇతర నేరాలు పెరుగుతున్నాయి.
• వికారాబాద్‌ జిల్లా కలెక్టర్‌, అధికారుల పర్యటన, రైతుల ఆందోళనలో నిఘా విభాగం విఫలమైంది. గత నవంబర్‌లో లగచర్ల, ఇతర తండాల ప్రజలు అధికారులపై దాడికి యత్నించారు.
• గత జూన్‌లో మియాపూర్‌లోని హెచ్‌ఎండీఏ భూముల్లో పేదలకు ఇండ్ల స్థలాలు పంచుతున్నారంటూ సామాజిక మాధ్యమాల్లో ప్రచారం జరిగింది. జనం భూముల దగ్గరికి వెళ్లి, 3 రోజుల పాటు అక్కడే తిష్ట వేశారు. పరిస్థితి చివరకు రాళ్లదాడి-లాఠీచార్జికి దారితీసింది.
• గ్రూప్‌-1 అభ్యర్థుల ఆందోళనను అంచనా వేయడంలోనూ నిఘా విభాగం పూర్తిగా విఫలమైంది. పోలీసులు లాఠీలు, కర్రలతో అభ్యర్థులను కొట్టారు.
• బెటాలియన్‌ కానిస్టేబుళ్లు, వారి భార్యలు సచివాలయాన్ని ముట్టడించారు. హోంగార్డుల ఆందోళనను కూడా ఇంటెలిజెన్స్‌ అంచనా వేయలేకపోయింది.