Runa Mafi | పాస్‌బుక్‌ ప్రామాణికమైతే రేషన్‌ కార్డుతో లింక్‌ ఎందుకు.. రుణమాఫీ నిబంధనలపై గందరగోళం

Runa Mafi | ‘రైతు రుణమాఫీ పథకంలో కుటుంబాన్ని గుర్తించేందుకు రేషన్‌కార్డే ప్రాతిపదిక’.. ఇది సోమవారం ప్రభుత్వం విడుదల చేసిన మార్గదర్శకాల్లో పేర్కొన్న నిబంధన. ‘రేషన్‌కార్డు కాదు.. పాస్‌బుక్‌ ప్రాతిపదిక’... ఇదీ ముఖ్యమంత్రి రేవంత్‌రెడ్డి మంగళవారం కలెక్టర్ల సదస్సులో చెప్పిన మాట.

Runa Mafi | హైదరాబాద్‌, జూలై 16 (నమస్తే తెలంగాణ): ‘రైతు రుణమాఫీ పథకంలో కుటుంబాన్ని గుర్తించేందుకు రేషన్‌కార్డే ప్రాతిపదిక’.. ఇది సోమవారం ప్రభుత్వం విడుదల చేసిన మార్గదర్శకాల్లో పేర్కొన్న నిబంధన. ‘రేషన్‌కార్డు కాదు.. పాస్‌బుక్‌ ప్రాతిపదిక’… ఇదీ ముఖ్యమంత్రి రేవంత్‌రెడ్డి మంగళవారం కలెక్టర్ల సదస్సులో చెప్పిన మాట. ఈ రెండింటిలో ఏది నిజమో తెలియక రైతులు, వ్యవసాయరంగ నిపుణులు తలలుపట్టుకుంటున్నారు. రుణమాఫీకి ప్రామాణికం రేషన్‌కార్డా? పట్టాదారు పాస్‌ పుస్తకమా? అనే ప్రశ్నలు తికమకపెడుతున్నాయి.

సాధారణంగా ఒకసారి మార్గదర్శకాలు విడుదలైన తర్వాత అందులో ఏదుంటే అదే ఫైనల్‌ అవుతుంది. మార్గదర్శకాల్లో రేషన్‌కార్డు అని పేర్కొని, ముఖ్యమంత్రి మాత్రం పాస్‌బుక్‌ అని చెప్పడంతో ఈ గందరగోళం ఏర్పడింది. ఒకవేళ సీఎం రేవంత్‌రెడ్డి చెప్పినట్టుగా రుణమాఫీకి పాస్‌బుక్‌ ప్రామాణికమైతే కుటుంబం, రేషన్‌కార్డు ప్రస్తావన ఎందుకు వస్తుందనేది మిలియన్‌ డాలర్ల ప్రశ్న. సాధారణంగా రైతుకుండే భూమికి పాస్‌పుస్తకమే ప్రాతిపదిక. అలాంటప్పుడు భూమితో ఏ సంబంధమూ లేని రేషన్‌కార్డు ప్రస్తావన ఎందుకు వస్తున్నదో అర్థంకాని పరిస్థితి.

పాస్‌బుక్‌ ప్రామాణికమైతే మళ్లీ రేషన్‌కార్డు ఎందుకు?

రుణమాఫీకి పట్టాదారు పాస్‌ పుస్తకమే ప్రాతిపదిక అని సీఎం రేవంత్‌రెడ్డి స్పష్టతనిచ్చారు. దీని ప్రకారం పాస్‌బుక్‌ ఉన్న ప్రతి రైతుకు రూ.2 లక్షల వరకు రుణమాఫీ చేయాలి. కానీ, ప్రభుత్వం అలా చేయడం లేదు. కుటుంబం పేరుతో రేషన్‌కార్డు నిబంధన పెట్టింది. తద్వారా అర్హుల సంఖ్యను తగ్గించేందుకు ప్రయత్నిస్తున్నది. పట్టాదారు పాస్‌బుక్‌ను పరిగణనలోకి తీసుకుంటే రాష్ట్రంలో సుమారు 70 లక్షల మంది రైతులు ఉంటారు. రేషన్‌కార్డును లింకు చేసి కుటుంబాన్ని యూనిట్‌గా తీసుకుంటే రైతుల సంఖ్య 60 లక్షలు మాత్రమే. అంటే 10 లక్షల మంది రైతులకు రుణమాఫీలో కోత పెట్టే అవకాశం ఉన్నది.

కుటుంబం యూనిట్‌గా రుణమాఫీ చేస్తే ఆ కుటుంబంలోని రైతులకు నష్టం జరుగుతుంది. రైతులను వేర్వేరుగా పాస్‌బుక్‌ ద్వారా గుర్తించి రుణమాఫీ చేస్తే వారంతా రుణవిముక్తులవుతారు. రేషన్‌కార్డు నిబంధన ద్వారా కుటుంబం మొత్తానికి రూ.2 లక్షలు మాత్రమే రుణమాఫీ అయితే, పట్టాదారు పాస్‌బుక్‌ ద్వారా ఒక్కొక్కరికి రూ.2 లక్షల రుణమాఫీ అవుతుంది. ఈ నేపథ్యంలో పాస్‌బుక్‌ ప్రామాణికమైతే మళ్లీ రేషన్‌కార్డును లింకు చేసి కుటుంబం యూనిట్‌గా గుర్తించాల్సిన అవసరం ఏమిటనే ప్రశ్నలు వినిపిస్తున్నాయి. ఈ నిబంధన అమలుతో అనేకమంది రైతులకు అనేక ఇబ్బందులు, నష్టాలు జరగనున్నాయి.

• ఉదాహరణకు ఒక కుటుంబ యజమాని పేరు మీద రేషన్‌కార్డు ఉన్నది. ఆయనకు భార్య, ఇద్దరు కుమారులు ఉన్నారు. ఇద్దరు కుమారులకు పెండ్లిండ్లు అయి వేర్వేరు కాపురాలుంటున్నారు. కానీ, పదేండ్లుగా కొత్త రేషన్‌కార్డులు జారీ కానందువల్ల వారికి రేషన్‌కార్డులు లేవు. తండ్రి రేషన్‌కార్డు మీదే వారి పేర్లు కూడా ఉన్నాయి. కుటుంబ యజమానితోపాటు భార్యకు, ఇద్దరు కుమారులకు రెండేసి ఎకరాల చొప్పున భూమి ఉన్నది. పాస్‌బుక్‌లు ఉన్నాయి. ఒక్కో పాస్‌బుక్‌ మీద రూ.లక్ష నుంచి రూ.లక్షన్నర వరకు పంట రుణం తీసుకోవడం సహజం. అంటే ఆ కుటుంబం మొత్తానికి కలిపి 4-6 లక్షల పంట రుణం ఉంటుంది. వీరికి ఆ మొత్తం రుణమాఫీ అవుతుందా? కాదా? అన్నది ఇప్పుడు ప్రశ్న. రేషన్‌కార్డునే ప్రాతిపదికగా తీసుకుంటే తొలుత యజమాని భార్యకు, తర్వాత యజమానికి కలిపి గరిష్ఠంగా రెండు లక్షల వరకు మాఫీ అవుతుంది. కుమారులకు రుణం మాఫీ జరిగే అవకాశం ఉండదు. ఒకవేళ పాస్‌బుక్‌నే ప్రాతిపదికగా తీసుకుంటే కుమారులకు కూడా మాఫీ చేయడం తప్పనిసరి. మరి ప్రభుత్వం ఏం చేయబోతున్నది?
• కుమారులు మేజర్‌ అయినప్పుడు, ప్రభుత్వ నిబంధనల ప్రకారం, వారిని వేరే కుటుంబంగా పరిగణించాల్సి ఉంటుంది. కేవలం రేషన్‌కార్డు మీద పేర్లు ఉన్న కారణంగా వారిని తండ్రి కుటుంబంలో భాగంగా పరిగణిస్తారా? లేక వేరే కుటుంబంగానా? అన్నదానిపై ప్రభుత్వం నుంచి స్పష్టత రావాల్సి ఉన్నది.
• కొడుకులతో సహా ఒక కుటుంబంగానే పరిగణించినప్పుడు, వారికి రూ4-6 లక్షల బాకీ ఉందనుకుందాం. వీరు రెండు లక్షలకు పైబడి ఉన్న అప్పును మొదట చెల్లిస్తేనే మిగతా రూ.2 లక్షల రుణమాఫీ అవుతుందా? లేక కుటుంబ యజమాని, ఆయన భార్య మాత్రమే తమ భూముల మీద తీసుకున్న దాంట్లో పైచిలుకు దాన్ని కడితే సరిపోతుందా? అనేది తెలియడం లేదు.
• పైన పేర్కొన్న అందరినీ కలిపి ఒక కుటుంబంగానే పరిగణించి రుణమాఫీ చేస్తే, మాఫీ చేసిన రూ.2 లక్షల మొత్తంలో తమ వాటా కూడా ఉన్నదని మిగతా కుటుంబ సభ్యులు గొడవకు దిగరా? దీనికి పరిష్కారం ఏమిటన్నది సామాజిక నిపుణుల ప్రశ్న.
• రేషన్‌కార్డు ఉన్న కుటుంబాలనైతే, ఆ కార్డు సాయంతో కుటుంబంగా గుర్తిస్తారు. రేషన్‌కార్డు లేని కుటుంబాలకు పాస్‌బుక్‌ ప్రాతిపదికగా తీసుకుంటామని ప్రభుత్వం చెప్తున్నది. ఇలాంటి వాళ్లను ఒక కుటుంబంగా గుర్తించే అవకాశం లేదు. ఈ లెక్కన రేషన్‌కార్డు లేని కుటుంబాల సభ్యులకేమో విడివిడిగా ఒక్కొక్కరికీ రూ.2 లక్షల చొప్పున రుణమాఫీ వర్తిస్తుంది. రేషన్‌కార్డు ఉన్న కారణం వల్ల ఉమ్మడి కుటుంబంలోనేమో అందరికీ కలిపి రూ.2 లక్షల వరకే వర్తిస్తుంది. రేషన్‌కార్డే లేని కుటుంబం ఎక్కువ లాభం పొందుతుంటే, రేషన్‌కార్డున్న కుటుంబం రెండు లక్షలతో సరిపెట్టుకోవాల్సి వస్తున్నది. ఇదెలా న్యాయమనే ప్రశ్న తలెత్తుతున్నది.
• వ్యవసాయ మంత్రి తుమ్మల నాగేశ్వర్‌రావు ఇచ్చిన లెక్క ప్రకారం.. రేషన్‌కార్డుల ఆధారంగా 39 లక్షల రైతు కుటుంబాలను గుర్తించారు. అందులో 60 లక్షల మంది రుణం తీసుకున్నారు. రేషన్‌కార్డు ప్రకారం కుటుంబానికి రెండు లక్షలే ప్రాతిపదిక అయితే 39 లక్షల రైతులకే రుణమాఫీ అమలవుతుంది. అంటే 21 లక్షల కుటుంబాలు లేదా రైతులు.. పాస్‌బుక్కు ఉండి, రుణం తీసుకుని కూడా, కేవలం రేషన్‌కార్డు లేనందున అనర్హులవుతారన్నమాట. దీనిపై ప్రభుత్వం వివరణ ఇవ్వాలని రైతు సంఘాలు కోరుతున్నాయి.

కోతలు పెట్టేందుకే కండీషన్లా?

సాధారణంగా రైతులకు పంట రుణాలు ఇచ్చేప్పుడు బ్యాంకులు అన్నీ ఆలోచించి, అన్నీ పరిశీలించాకే రుణాలు ఇస్తాయి. ఇలా ఒకసారి రైతుకు బ్యాంకు రుణం ఇచ్చిందంటే ఆ రైతు రుణమాఫీకి పూర్తిస్థాయిలో అర్హుడవుతాడు. కానీ, కాంగ్రెస్‌ ప్రభుత్వం మాత్రం రుణాలు ఇచ్చేటప్పుడు బ్యాంకులు పెట్టని కండీషన్లను రుణమాఫీ చేసేటప్పుడు అమలు చేస్తున్నది. తద్వారా అర్హత ఉన్నప్పటికీ కొంతమంది రైతులకు రుణమాఫీ కాకుండా ప్రయత్నిస్తున్నదనే విమర్శలొస్తున్నాయి. రేషన్‌కార్డు ద్వారా కుటుంబాన్ని గుర్తిస్తామని, కుటుంబానికి రూ.2 లక్షలు మాత్రమే మాఫీ చేస్తామంటూ షరతులు పెడుతున్నది. అయితే రుణమాఫీ భారాన్ని తగ్గించుకోవాలనే ఉద్దేశంతోనే ప్రభుత్వం ఇలాంటి షరతులు పెడుతున్నదనే ఆరోపణలు వినిపిస్తున్నాయి.