‘ఓటుకు నోటు’ కేసుకు పదేండ్లు

తెలుగు రాష్ర్టాల్లో సంచలనం సృష్టించిన ‘ఓటుకు నోటు’ కేసుకు పదేండ్లు నిండాయి. గతంలో తెలుగుదేశం పార్టీలో ఉన్న ప్రస్తుత ముఖ్యమంత్రి రేవంత్‌రెడ్డి సరిగ్గా పదేండ్ల క్రితం శాసనమండలి ఎన్నికల్లో టీడీపీ నామినేట్‌ చేసిన వేం నరేందర్‌రెడ్డికి మద్దతు తెలపాలంటూ 2015 మే 31న నాటి నామినేటెడ్‌ ఎమ్మెల్యే ఎల్విస్‌ స్టీఫెన్‌సన్‌కు రూ.50 లక్షలు లంచం ఇస్తూ రెడ్‌హ్యాండెడ్‌గా అవినీతి నిరోధక శాఖకు రెడ్‌ హ్యాండెడ్‌గా పట్టుబడ్డారు.

• ఎమ్మెల్యేకి రూ.50 లక్షల లంచం ఇవ్వజూపిన రేవంత్‌రెడ్డి
• రెడ్‌హ్యాండెడ్‌గా పట్టుకున్న ఏసీబీ
• పదేండ్లు గడిచినా తేల్చని కోర్టులు

హైదరాబాద్‌, మే 31 (నమస్తే తెలంగాణ): తెలుగు రాష్ర్టాల్లో సంచలనం సృష్టించిన ‘ఓటుకు నోటు’ కేసుకు పదేండ్లు నిండాయి. గతంలో తెలుగుదేశం పార్టీలో ఉన్న ప్రస్తుత ముఖ్యమంత్రి రేవంత్‌రెడ్డి సరిగ్గా పదేండ్ల క్రితం శాసనమండలి ఎన్నికల్లో టీడీపీ నామినేట్‌ చేసిన వేం నరేందర్‌రెడ్డికి మద్దతు తెలపాలంటూ 2015 మే 31న నాటి నామినేటెడ్‌ ఎమ్మెల్యే ఎల్విస్‌ స్టీఫెన్‌సన్‌కు రూ.50 లక్షలు లంచం ఇస్తూ రెడ్‌హ్యాండెడ్‌గా అవినీతి నిరోధక శాఖకు రెడ్‌ హ్యాండెడ్‌గా పట్టుబడ్డారు. ఆ రోజు రేవంత్‌రెడ్డితోపాటు మరికొందరిని ఏసీబీ అరెస్టు చేసింది. నాటి నుంచి ఈ కేసు ఏసీబీ ప్రత్యేక కోర్టులో విచారణలో ఉన్నది.

కాలక్రమంలో రేవంత్‌రెడ్డి కాంగ్రెస్‌లో చేరి సీఎం అయ్యారు. కానీ, ఆ కేసు ఇప్పటికీ కొనసాగుతున్నది. ఎన్‌ఫోర్స్‌మెంట్‌ డైరెక్టరేట్‌ (ఈడీ) తన చార్జిషీట్‌లో టిడీపీ అధినేత చంద్రబాబు పేరును ప్రస్తావించినప్పటికీ ఏసీబీ చార్జిషీట్‌లో చంద్రబాబు పేరు లేకపోవడంతో ఆయనపై చర్యలు చేపట్టలేదు. రాజకీయంగా దుమారం రేపిన ఈ కేసు విచారణ చాలా నెమ్మదిగా కొనసాగుతున్నది. రేవంత్‌రెడ్డి సీఎం అయ్యాక ఒక్కసారి కూడా ఈ కేసు విచారణకు హాజరు కాలేదు.

కేసులో కీలక పరిణామాలు

• 2015 మే 31: నాటి నామినేటెడ్‌ ఎమ్మెల్యే ఎల్విస్‌ స్టీఫెన్‌సన్‌కు రూ.50 లక్షలు ఆఫర్‌ చేస్తూ రేవంత్‌రెడ్డి వీడియో కెమెరాకు చిక్కడంతో అదే రోజు అరెస్టు చేసింది.
• జూన్‌ 1: ఇతర నిందితులు సండ్ర వెంకటవీరయ్య, ఉదయ్‌ సింహ, సెబాస్టియన్‌లను ఏసీబీ అధికారులు అరెస్టు చేశారు. కేసు విచారణ ఏసీబీ ప్రత్యేక కోర్టుకు బదిలీ అయింది.
• జూన్‌ 15: రేవంత్‌రెడ్డికి హైదరాబాద్‌ హైకోర్టు బెయిల్‌ మంజూరు చేసింది.
• 2017 అక్టోబర్‌ 31: రేవంత్‌రెడ్డి టీడీపీని విడిచిపెట్టి కాంగ్రెస్‌ పార్టీలో చేరారు.
• 2020 నవంబర్‌ 11: ‘ఓటుకు నోటు’ కేసు విచారణను 2020 నవంబర్‌ 16 నుంచి ప్రారంభించాలని ఏసీబీ కోర్టు నిర్ణయించింది. విచారణకు హాజరు కావాలని రేవంత్‌రెడ్డి, సండ్ర వెంకట వీరయ్య, ఉదయ్‌ సింహ, సెబాస్టియన్‌ను ఆదేశించింది. దీంతో నిందితులు హైకోర్టును ఆశ్రయించారు. కానీ, గడువు ఇచ్చేందుకు ఏసీబీ అధికారులు అభ్యంతరం తెలిపారు.
• 2021 మే 27: ‘ఓటుకు నోటు’ కేసులో ఈడీ చార్జిషీట్‌ దాఖలు చేసింది. రేవంత్‌రెడ్డిని ప్రధాన నిందితుడిగా పేరొన్న ఈడీ.. ఈ కేసులో టీడీపీ అధినేత చంద్రబాబు నాయుడు పాత్రను కూడా ప్రస్తావించింది. కానీ, ఏసీబీ చార్జిషీట్‌లో చంద్రబాబు పేరు లేకపోవడంతో ఆయనకు ఊరట కలిగింది. ఇదే సమయంలో రేవంత్‌రెడ్డిపై మనీలాండరింగ్‌ ఆరోపణలు నమోదయ్యాయి.
• జూన్‌ 2: రేవంత్‌రెడ్డి దాఖలు చేసిన రివ్యూ పిటిషన్‌ను హైకోర్టు తిరసరించింది. ఏసీబీ కోర్టు ఉత్తర్వులను కొట్టేయాలన్న రేవంత్‌ విన్నపాన్ని జస్టిస్‌ కే లక్ష్మణ్‌ తోసిపుచ్చారు.
• జూలై 7: రేవంత్‌తెలంగాణ ప్రదేశ్‌ కాంగ్రెస్‌ కమిటీ (పీసీసీ)కి అధ్యక్షుడయ్యారు.
• జూలై 30: రేవంత్‌రెడ్డి డ్రైవర్‌ రాఘవేందర్‌రెడ్డి, వ్యక్తిగత సహాయకుడు సైదయ్యకు ఏసీబీ కోర్టు సమన్లు జారీ చేసింది. వారు విచారణకు హాజరు కాకపోవడంతో బెయిలబుల్‌ వారెంట్లు జారీ అయ్యాయి. 2021 ఆగస్టు 9న విచారణకు హాజరు కావాలని కోర్టు ఆదేశించింది.
• 2023 డిసెంబర్‌ 9: రేవంత్‌రెడ్డి ముఖ్యమంత్రిగా బాధ్యతలు చేపట్టారు.
• 2024 సెప్టెంబర్‌ 24: రేవంత్‌రెడ్డి సహా ఇతర నిందితులంతా విచారణకు గైర్హాజరయ్యారు. 2024అక్టోబర్‌ 16న వ్యక్తిగతం గా హాజరు కావాలని కోర్టు స్పష్టం చేసినా రేవంత్‌రెడ్డి పట్టించుకోలేదు.