Revanth Reddy | మేం చేసిన అప్పు 1,58,041 కోట్లు.. అసెంబ్లీ సాక్షిగా వెల్లడించిన సీఎం రేవంత్‌రెడ్డి

తమ ప్రభుత్వం గడిచిన 14 నెలల్లో రూ.1,58,041 కోట అప్పు చేసినట్టు సీఎం రేవంత్‌రెడ్డి అంగీకరించారు. కాంగ్రెస్‌ ప్రభుత్వం చేసిన అప్పుల వివరాలను శనివారం అసెంబ్లీలో వెల్లడించారు.

• పాత అప్పుల చెల్లింపులకే 1,53,359 కోట్లు
• వడ్డీ 64,768 కోట్లు.. అసలు 88,591 కోట్లు
• అప్పులు, మిత్తీలపై పూటకో మాట చెప్తున్న సీఎం

Revanth Reddy | హైదరాబాద్‌, మార్చి 15 (నమస్తే తెలంగాణ): తమ ప్రభుత్వం గడిచిన 14 నెలల్లో రూ.1,58,041 కోట అప్పు చేసినట్టు సీఎం రేవంత్‌రెడ్డి అంగీకరించారు. కాంగ్రెస్‌ ప్రభుత్వం చేసిన అప్పుల వివరాలను శనివారం అసెంబ్లీలో వెల్లడించారు. 2023 డిసెంబర్‌ నుంచి 2025 ఫిబ్రవరి 28 వరకు రూ.1.58 లక్షల కోట్ల అప్పు చేసినట్టు వెల్లడించారు. బీఆర్‌ఎస్‌ ప్రభుత్వం చేసిన అప్పులకు అసలు, వడ్డీ కట్టడానికే తాము చేసిన అప్పులు సరిపోతున్నాయని సర్దిచెప్పే ప్రయత్నం చేశారు. తాము చేసిన రూ.1.58 లక్షల కోట్ల అప్పులో రూ.88,591 కోట్లను అసలు, రూ.64,768 కోట్లను మిత్తీలకు కట్టాల్సి వచ్చిందని తెలిపారు. మొత్తం రూ.1,53,359 కోట్లను పాత అప్పులు, మిత్తీలకే కట్టినట్టు చెప్పారు. తన ప్రభుత్వం చేసిన అప్పుల తప్పులను కేసీఆర్‌ ప్రభుత్వానికి అంటగట్టేందుకు తీవ్రంగా ప్రయత్నించారు. ఈ క్రమంలో సీఎం అడ్డంగా దొరికిపోయారు. 14 నెలల్లో రాష్ర్టానికి వచ్చిన ఆదాయం ఏమైంది, ఎటుపోయిందని ఆర్థిక నిపుణులు ప్రశ్నిస్తున్నారు. ఇం దుకు సీఎం రేవంత్‌రెడ్డి గతంలో చేసిన వ్యాఖ్యలనే ఉదహరిస్తున్నారు.

• ప్రతి నెల మొదటి తేదీన రూ.7 వేల కోట్లు వడ్డీయే కడుతున్నాం. ఏటా రూ.72 వేల కోట్లు మిత్తి కట్టనీకే అయితుంది’ నిరుడు జూలై 14న రంగారెడ్డి జిల్లా అబ్దుల్లాపూర్‌మెట్‌లో సీఎం రేవంత్‌ వ్యాఖ్య.
• దీని ప్రకారం 15 నెలల్లో రూ.1.05 లక్షల కోట్లు మిత్తీలకే కట్టాల్సి ఉంటుంది. అసెంబ్లీలో చెప్పిన లెక్క కన్నా ఇది దాదాపు రూ.40 వేల కోట్లు తక్కువ. మరి ఏది నిజం?
• కేసీఆర్‌ హయాంలో చేసిన అప్పులకు ప్రతి నెల రూ.6,500 కోట్లు కడుతున్నాం’ గత డిసెంబర్‌ ఒకటిన సీఎం రేవంత్‌రెడ్డి ప్రెస్‌మీట్‌ నిర్వహించిన సందర్భంగా చేసిన వ్యాఖ్య.
• ఈ లెక్కన 15 నెలల్లో రూ.97,500 కోట్లు మాత్రమే చెల్లించినట్టు లెక్క. కానీ సీఎం అసెంబ్లీలో ఏకంగా రూ.1.53 లక్షల కోట్లు చెల్లించినట్టు చెప్పారు. అంటే దాదపు రూ.60వేల కోట్ల వ్యత్యాసం ఉన్నది. ఏ లెక్క కరెక్టు?
• గత ప్రభుత్వ అప్పులకు అసలు, మిత్తీకి రూ.6500 కోట్ల చొప్పున చెల్లిస్తున్నాం’ గత డిసెంబర్‌లో ఏడాది పాలనపై సీఎం రేవంత్‌రెడ్డి నిర్వహించిన మీడియా సమావేశంలో చేసిన వ్యాఖ్య.
• ఈ లెక్కన నెలకు రూ.13వేల కోట్లు కట్టాలి. 15 నెలల్లో రూ.1.95 లక్షల కోట్లు కట్టి ఉండాలి. కానీ అసెంబ్లీలో దాదాపు 40వేల కోట్లు తగ్గించి చెప్పారు. మరి ఏ లెక్కలను నమ్మాలి?
• రాష్ర్టానికి ప్రతినెల రూ.18,500 కోట్ల ఆదాయం వస్తుంటే.. రూ.6,500 కోట్లు ఉద్యోగుల జీతభత్యాలకు ఇస్తున్నం. మరో 6,500 కోట్లు అప్పు లు, వడ్డీలకింద కడుతున్నం. మిగిలిన రూ.5500 కోట్లలో రూపాయి రూపాయి కూడబెట్టి రుణమాఫీ చేశాం’ గత నవంబర్‌ 19న వరంగల్‌లో నిర్వహించిన ప్రజా విజయోత్సవ సభలో సీఎం రేవంత్‌రెడ్డి వ్యాఖ్య.
• ఈ వ్యాఖ్యలను బట్టి ప్రతి నెల ప్రభుత్వం కడుతున్నది రూ.6,500 కోట్లు మాత్రమే. కానీ అసెంబ్లీలో సీఎం చెప్పిన లెక్క ప్రకారం పాత అప్పులు, మిత్తీలకు నెలకు రూ.10,223 కోట్లు చెల్లిస్తున్నట్టు చెప్పుకొచ్చారు. అంటే.. అదనంగా ప్రతి నెల కట్టిన రూ.3,723 కోట్లు ఎక్కడికి పోయినట్టు? అని నిపుణులు ప్రశ్నిస్తున్నారు. అసెంబ్లీలో చెప్పిన లెక్కలకు, సీఎం గతంలో చేసిన ప్రచారానికి సంబంధం లేదని విశ్లేషకులు మండిపడుతున్నా రు. నెలకు అసలు, మిత్తీ కలిపి రూ.6500 కోట్లు కట్టినా… లేదా అసలు రూ.6500 కోట్లు, వడ్డీ రూ.6,500 కోట్లు కట్టినా సీఎం చెప్పిన లెక్కలకు పొంతన ఉండటం లేదని.. సీఎం ఇన్నాళ్లూ చెప్పినదంతా దుష్ప్రచారమే అని చెప్పారు.