వైద్య విద్యార్థులను ఆదుకోండి

యుద్ధం కారణంగా ఉక్రెయిన్‌ నుంచి అర్ధాంతరంగా తిరిగివచ్చిన వైద్య విద్యార్థులకు ఇక్కడి మెడికల్‌ కాలేజీల్లో అడ్మిషన్లు ఇచ్చేందుకు చర్యలు తీసుకోవాలని ప్రధాని నరేంద్రమోదీకి ముఖ్యమంత్రి కే చంద్రశేఖర్‌రావు

ఉక్రెయిన్‌ యుద్ధ బాధిత విద్యార్థులకు ఇక్కడి కాలేజీల్లో అడ్మిషన్లు ఇవ్వండి
చదువు ఆగిపోయి ఆందోళనలో ఉన్నారు
వారి భవిష్యత్తు ప్రశ్నార్థకంగా మారింది
వీలైనంత త్వరగా నిర్ణయం తీసుకోండి
తెలంగాణ నుంచి 700 మంది విద్యార్థులు
వారికి పూర్తి ఫీజులు మేమే భరిస్తాం
ప్రధాని నరేంద్రమోదీకి సీఎం కేసీఆర్‌ లేఖ

ఉక్రెయిన్‌ నుంచి తిరిగొచ్చిన విద్యార్థులు ఎదుర్కొంటున్న అసాధారణ పరిస్థితులను దృష్టిలో పెట్టుకొని, దీన్ని స్పెషల్‌ కేసుగా భావించి సహాయం చేయండి. నిబంధనలు కొంత సడలించి వారు మన దేశంలోని వైద్య కళాశాలల్లో చేరేందుకు వీలు కల్పించండి. తెలంగాణ విద్యార్థులను రాష్ట్ర ప్రభుత్వమే పూర్తి ఫీజులు చెల్లించి చదివిస్తుంది. – సీఎం కేసీఆర్‌

హైదరాబాద్‌, మార్చి 29 : యుద్ధం కారణంగా ఉక్రెయిన్‌ నుంచి అర్ధాంతరంగా తిరిగివచ్చిన వైద్య విద్యార్థులకు ఇక్కడి మెడికల్‌ కాలేజీల్లో అడ్మిషన్లు ఇచ్చేందుకు చర్యలు తీసుకోవాలని ప్రధాని నరేంద్రమోదీకి ముఖ్యమంత్రి కే చంద్రశేఖర్‌రావు మంగళవారం లేఖ రాశారు. చదువు మధ్యలోనే ఆగిపోయి విద్యార్థులు తీవ్ర ఆందోళనలో ఉన్నారని, ఈ విషయంపై వీలైనంత త్వరగా నిర్ణయం తీసుకోవాలని కోరారు. ఈ విద్యార్థులను స్పెషల్‌ కేసుగా పరిగణించి మన దేశంలోని వైద్య కళాశాలల్లో సీట్లు సర్దుబాటు చేయాలని విజ్ఞప్తి చేశారు. తెలంగాణ విద్యార్థులను రాష్ట్రప్రభుత్వమే పూర్తి ఫీజులు చెల్లించి చదివిస్తుందని తెలిపారు. లేఖలో సీఎం కేసీఆర్‌ పేర్కొన్న అంశాలు..

• ఉక్రెయిన్‌లో వైద్యవిద్య అభ్యసించేందుకు వెళ్లిన భారతీయ విద్యార్థులు పెద్ద మొత్తంలో డబ్బు ఖర్చు చేయడంతోపాటు ఏండ్లపాటు అక్కడే గడిపారు. ఇప్పుడు వారి భవిష్యత్తు ప్రశ్నార్థకంగా మారింది. యుద్ధ సంక్షోభంతో భారత్‌కు రావడం వల్ల చదువు మధ్యలోనే ఆగిపోయే ప్రమాదం ఉన్నది.
• యుద్ధం కారణంగా 20 వేల మందికిపైగా భారతీయ విద్యార్థులు ఉక్రెయిన్‌ను వీడాల్సి వచ్చింది. వీరిలో చాలా మంది మధ్యతరగతి కుటుంబాలవారే. జీవితకాలం చేసిన పొదుపు తమ పిల్లలను వైద్యులుగా చూడకుండానే నిరర్థకం అవుతున్నదనే బాధలో వారి తల్లిదండ్రులు ఉన్నారు. విద్యార్థుల భవిష్యత్తును కాపాడేందుకు సాధ్యమయ్యే ప్రతి అవకాశాన్ని పరిశీలించి అంగీకరించండి.
• ఈ విద్యార్థులు ఎదుర్కొంటున్న అసాధారణ పరిస్థితులను దృష్టిలో పెట్టుకొని, దీన్ని స్పెషల్‌ కేసుగా భావించి సహాయం చేయండి. నిబంధనలు సడలిం చి వారు మన దేశంలోని వైద్య కాలేజీల్లో తత్సమాన సెమిస్టర్లలో చేరేందుకు వీలు కల్పించండి. వైద్య కళాశాలల్లో వివిధ సెమిస్టర్లలోని సీట్లను ‘వన్‌టైమ్‌’ ప్రాతిపదికన పెంచి, ఆ విద్యార్థులకు కేటాయించండి.
• వైద్య విద్యను పూర్తి చేయకుండానే ఉక్రెయిన్‌ నుంచి తిరిగి వచ్చినవారిలో తెలంగాణ నుంచి 700 మంది దాకా ఉన్నారు. చదువు ఆగిపోవటంతో వారు తీవ్ర ఆందోళనలో ఉన్నారు. వారి ఇబ్బందులను దృష్టిలో పెట్టుకొని విద్యార్థుల కళాశాల ఫీజులు మొత్తం భరించాలని తెలంగాణ ప్రభుత్వం నిర్ణయించింది.