సింగరేణి ఉద్యోగికి స్వర్ణయుగం!

ఉమ్మడి రాష్ట్రంలో మనకు వెలుగులు పంచేందుకు ప్రాణాలు పణంగా పెట్టి నల్లబంగారాన్ని వెలికితీసే సింగరేణి ఉద్యోగుల జీవితాల్లో నిత్యం కారు చీకట్లే. తమ హక్కుల సాధన కోసం చేసిన పోరాటాలన్నీ వృథానే. ఎలాంటి సంక్షేమ ప్రయోజనాలు అందక కార్మికుల కుటుంబాలు అత్యంత దుర్భర జీవనం సాగించాయి.

• నెరవేరిన చీకటి సూర్యుల కలలు
• రెండు దశాబ్దాలుగా నిలిచిపోయిన ఉద్యోగాలకు స్వరాష్ట్రంలో మోక్షం
• 19,260 కారుణ్య, డిపెండెంట్‌, ఎక్స్‌టర్నల్‌ ఉద్యోగాలు
• సిబ్బందికి డబుల్‌ బెడ్రూం క్వార్టర్లు
• పది హామీల్లో తొమ్మిది అమలు చేసిన ముఖ్యమంత్రి కే చంద్రశేఖర్‌రావు
• ఇంత చేసినా ‘ఆంధ్రజ్యోతి’ పత్రికలో అసత్య వార్తలు
• మండిపడుతున్న సింగరేణి కార్మికులు

జయశంకర్‌ భూపాలపల్లి, మార్చి 23 (నమస్తే తెలంగాణ): ఉమ్మడి రాష్ట్రంలో మనకు వెలుగులు పంచేందుకు ప్రాణాలు పణంగా పెట్టి నల్లబంగారాన్ని వెలికితీసే సింగరేణి ఉద్యోగుల జీవితాల్లో నిత్యం కారు చీకట్లే. తమ హక్కుల సాధన కోసం చేసిన పోరాటాలన్నీ వృథానే. ఎలాంటి సంక్షేమ ప్రయోజనాలు అందక కార్మికుల కుటుంబాలు అత్యంత దుర్భర జీవనం సాగించాయి. కానీ.. స్వరాష్ట్రంలో సీఎం కేసీఆర్‌ వారి బతుకుల్లో వెలుగులు నింపారు. టీబీజీకేఎస్‌ కృషితో రెండు దశాబ్దాలుగా నిలిచిపోయిన ఎక్స్‌టర్నల్‌ ఉద్యోగాలకు మోక్షం లభించింది. మొత్తం 19,260 మందికి కారుణ్య, డిపెండెంట్‌, ఎక్స్‌టర్నల్‌ ఉద్యోగాలు లభించాయి.

సింగరేణిలోనే ప్రప్రథమంగా సింగరేణి కార్మికులకు సకల వసతులతో డబుల్‌ బెడ్రూం క్వార్టర్లను నిర్మించారు. సీఎం కేసీఆర్‌ ఇచ్చిన పది హామీల్లో తొమ్మిది హామీలను నెరవేర్చారు. సింగరేణి కార్మికుల కుటుంబాల్లో ఆనందం నింపారు. కానీ, ఇవన్నీ పక్కకు పెట్టి ‘ఆంధ్రజ్యోతి’ పత్రిక బీఆర్‌ఎస్‌ సర్కారుపై అసత్య వార్తలు ప్రచురించింది. ‘బీఆర్‌ఎస్‌కు హామీల టెన్షన్‌’ అంటూ ప్రచురించిన దురుద్దేశ కథనంపై అటు సింగరేణి ఉద్యోగులు, ఇటు వారి కుటుంబ సభ్యులు మండిపడుతున్నారు. స్వరాష్ట్రంలోనే తమకు సీఎం కేసీఆర్‌, టీబీజీకేఎస్‌ గౌరవాధ్యక్షురాలు కవిత, తెలంగాణ బొగ్గు గని కార్మిక సంఘం (టీజీబీకేఎస్‌)తో న్యాయం జరిగిందని స్పష్టం చేశారు. అనేక హక్కులు సాధించుకొన్నామని, సంక్షేమ ప్రయోజనాలు అందాయని ఆనందం వ్యక్తం చేస్తున్నారు.

సీఎం ఇచ్చిన హామీల అమలు ఇలా..

గతంలో ఎన్నో సమ్మెలు చేసి సాధించుకున్న తండ్రీకొడుకుల ఉద్యోగాలు నిలిచిపోగా, స్వరాష్ట్రంలో సీఎం కేసీఆర్‌ వారి కలను నెరవేర్చారు. ఇప్పటివరకూ సింగరేణిలో డిపెండెంట్‌, కారుణ్య నియామక ప్రక్రియల ద్వారా 15,053 సింగరేణి కార్మికుల వారసులకు ఉద్యోగాలు వచ్చా యి. రెండు దశబ్దాలుగా నిలిచిపోయిన ఎక్స్‌టర్నల్‌ నోటిఫికేషన్లు స్వరాష్ట్రంలో పునరుద్ధరించి 4,207 మంది నిరుద్యోగ యువతకు ఉద్యోగాలు ఇచ్చారు.

• ఇల్లు కట్టుకొనే సింగరేణి ఉద్యోగి ఏదేని బ్యాంకులో రూ.10 లక్షల వరకు తీసుకున్న రుణానికి వడ్డీని తిరిగి సింగరేణి సంస్థే చెల్లిస్తున్నది.
• సింగరేణి కార్మికులతోపాటు తల్లిదండ్రులకు కార్పొరేట్‌ వైద్యం అందుతున్నది.
• కంపెనీ క్వార్టర్లలో ఏసీ అమర్చుకొన్న ఉద్యోగికి ఉచిత విద్యుత్‌ సౌకర్యం.
• కార్మికుల పిల్లలు ఐఐటీ, ఐఐఎంలలో సీటు సాధిస్తే ట్యూషన్‌ ఫీజు ఇస్తున్నది.
• సంస్థలోనే ప్రప్రథమంగా మహిళా ఉద్యోగినులకు చైల్డ్‌కేర్‌ లీవ్‌ అమల్లోకి తెచ్చింది.
• మెడికల్‌ అన్‌ఫిట్‌ అయి ఉద్యోగం వద్దనుకొనే సింగరేణి కార్మికులకు ఏక మొత్తంగా రూ.25 లక్షలను పెంచి ఇస్తున్నారు. ఏకమొత్తంలో ఒకేసారి వద్దనుకునే ఉద్యోగులకు నెలకు రూ.26,293 చెల్లిస్తున్నారు.
• స్వరాష్ట్రంలో కిష్టారం, కొండాపూర్‌, ఇందారం, జేవీఆర్‌, కేటీకే ఓసీపీ-3, కేకే ఓసీపీ కొత్త గనులు వచ్చాయి. జీడీకే-5 భూగర్భ గనిని ఓపెన్‌కాస్టుగా ఇటీవలే సంస్థ కన్వర్షన్‌ చేసింది. పక్క రాష్ట్రమైన ఒడిశా రాష్ట్రంలో నైనీ నూతన గనిని సింగరేణి చేపట్టింది. కేంద్రం వేలం పద్ధతి తీసుకురావడం నూతన బ్లాక్‌ల తవ్వకానికి అడ్డంకిగా తయారైంది. తెలంగాణలోని బొగ్గు బ్లాక్‌లు సత్తుపల్లి, కోయగూడెం, శ్రావణ్‌పల్లి ఓపెన్‌కాస్ట్‌ బొగ్గు బ్లాకులతో పాటు కేకే-6 భూగర్భ గని తవ్వకం కోసం వేలంపాట ద్వారా కాకుండా అపార అనుభవం గల సంస్థకు అప్పగించాలని సీఎం కేసీఆర్‌ ప్రభుత్వం, టీబీజీకేఎస్‌ యూనియన్‌ వివిధ రూపాల్లో పెద్ద ఎత్తున పోరాడుతూనే ఉంది. ఈ విషయమై సింగరేణి యాజమాన్యం కూడా కేంద్ర ప్రభుత్వం తో పలు దఫాలు సంప్రదిస్తూనే ఉంది.
• అంబేద్కర్‌ జయంతికి జీతంతో కూడిన సెలవు ఇస్తున్నది. అదేవిధంగా రంజాన్‌, క్రిస్మస్‌ పండుగల వేళ సింగరేణి కార్మికులకు ఆప్షన్స్‌ పీహెచ్‌డీలను సంస్థ ఇస్తున్నది.
• కొందరు కార్మికులు అప్పట్లో మారు పేర్ల మీద సంస్థ ఉద్యోగాల్లో చేరారు. ఈ మారుపేర్ల సవరణ విషయమై న్యాయపరమైన చిక్కులు ఉండటంతో కొంత ఆల స్యం అవుతుందని, ఈ హామీ కూడా త్వరలోనే నెరవేరుస్తామని పలు సమావేశాల్లో టీబీజీకేఎస్‌ అగ్రనేతలు వెంకట్రావు, రాజిరెడ్డి, మల్లయ్య స్పష్టం చేశారు.

టీబీజీకేఎస్‌ సాధించిన ప్రయోజనాలు

• రెండు విడతలుగా 540 మంది డిస్మిస్‌ ఉద్యోగులకు ఉద్యోగాలు.
• ఉద్యోగుల పదవీ విరమణ వయస్సును 61 ఏండ్లకు పెంపు.
• కార్మికులకు ఇంతకుముందు బేసిక్‌పై ఒక శాతం విద్యుత్‌ చార్జీలు చెల్లించేవారు. ఇప్పుడు అదీ రద్దు చేశారు.
• సీఎం కేసీఆర్‌ చొరవతో కార్మికులకు ఇంక్రిమెంట్‌ అందుతున్నది.
• రాష్ట్ర సాధన కోసం సకలజనుల స మ్మె చేసిన కార్మికులకు సమ్మె కాలపు వేతనాన్ని సంస్థ చెల్లించింది.
• 2014లో లాభాల బోనస్‌ 18 శాతం ఉండగా, ఇప్పుడు 30 శాతం.
• స్వరాష్ట్రంలో కార్మికుల సౌకర్యార్థం సకల వసతులతో డబుల్‌ బెడ్రూం క్వార్టర్లను నిర్మించారు.
• సింగరేణిలో కారుణ్య నియామకాల్లో భాగంగా సింగరేణి కార్మికుల పెండ్లి అయిన, విడాకులు పొందిన కూతురుకు, అదేవిధంగా వితంతు కూతురు, కోడలుకు డిపెండెంట్‌ ఉద్యోగ అవకాశం కల్పించారు. దివ్యాంగులకు సైతం ఉద్యోగావకాశం ఇచ్చారు.
• సింగరేణి కార్మికుడు విధుల్లో సాధారణ మరణం పొందితే నాడు రూ.లక్షా 50 వేల మ్యాచింగ్‌ గ్రాంట్‌ వచ్చేది. దాన్ని రూ.15 లక్షలకు పెంచారు. విధుల్లో ఉండి ప్రమాదవశాత్తు మృతి చెందితే నాడు రూ.2 లక్షలు ఉన్న మ్యాచింగ్‌ గ్రాంట్‌ను నేడు రూ.20 లక్షలకు పెంచారు.
• స్వరాష్ట్రంలో 190/240 మస్టర్లు నిండిన ఏడాదిలోపే బదిలీ వర్కర్లను జనరల్‌ మజ్దూర్లుగా క్రమబద్ధీకణ చేస్తున్నారు. ఇప్పటి వరకూ 9,444 మంది బదిలీ వర్కర్లను జనరల్‌ మజ్దూర్లుగా రెగ్యులరైజ్‌ చేశారు.
• సింగరేణి దవాఖానల్ల్లో వైద్య వసతులను పెంచారు. కొత్తగూడెం, రామగుండం ఏరియా దవాఖానల్లో సీటీ స్కాన్‌, ఎంఆర్‌ఐ సదుపాయాలను కల్పించారు. పలువురు వైద్య నిపుణులను సంస్థ నియమించింది.
• సింగరేణి సంస్థను ప్రైవేటీకరణ చేయాలని కేంద్రంలోని మోదీ సర్కారు పన్నుతున్న కుట్రలను రాష్ట్రంలోని సీఎం కేసీఆర్‌ ప్రభుత్వం ఎప్పటికప్పుడు తిప్పికొడుతూనే ఉంది. పార్లమెంట్‌లో తెలంగాణ ఎంపీలు నిరసన గళాన్ని వినిపించారు.

ఖర్చు లేకుండా కారుణ్య ఉద్యోగం

పైసా ఖర్చు లేకుండానే సింగరేణిలో మా నాన్న ఉద్యోగం నాకు కారుణ్య నియామకం కింద వచ్చింది. ఈ రోజే (గురువారం) ఉద్యోగ నియామక పత్రాన్ని జీఎం సార్‌ చేతుల మీదుగా అందుకున్నా. మా నాన్న గడ్డం రాజేశ్వర్‌ కేటీకే 8వ గనిలో ఫిట్టర్‌గా పని చేశాడు. గుండెజబ్బు వచ్చింది. 2022 మే నెలలో మెడికల్‌ అన్‌ఫిట్‌ అయ్యాడు. సీఎం కేసీఆర్‌ దయవల్లే మా నాన్న ఉద్యోగం ఈ రోజు నాకు వచ్చింది.

-గడ్డం భావన, కారుణ్య నియామక ఉద్యోగిని, భూపాలపల్లి

మారు పేర్లు మినహా అన్ని హామీలు నెరవేర్చాం

సింగరేణిలో ఇవ్వని హామీలను కూడా నెరవేర్చాం. బేసిక్‌పై ఒక్కశాతం కరెంటు చార్జీ మాఫీ, మహిళలకు ఉద్యోగాలు, బదిలీ వర్కర్లను జనరల్‌ మజ్దూర్లుగా రెగ్యులరైజ్‌, 60 -61 ఏండ్లకు పదవీ విరమణ పెంపు, సీఎంపీఎఫ్‌ సంస్థ వాటా 12 శాతం చెల్లించేలా కృషి చేశాం. స్వరాష్ట్రంలో సీఎం కేసీఆర్‌ సహకారంతో, టీబీజీకేఎస్‌ గౌరవాధ్యక్షురాలు కవిత కృషితో యూనియన్‌.. కార్మికులకు చేసిన మేలు ఇంతకుముందెన్నడూ ఎవ్వరూ చేయలేదు. కవిత ఆధ్వర్యంలోనే వచ్చే గుర్తింపు సంఘం ఎన్నికల్లో పోటీ చేసి గెలిచి తీరుతాం. ఎవరికి ఏ అనుమానాలు అవసరం లేదు. కార్మికులు మమ్మల్ని ఆదరిస్తారు.

– మిర్యాల రాజిరెడ్డి, టీబీజీకేఎస్‌ భూపాలపల్లి బ్రాంచి ప్రధాన కార్యదర్శి