ఆరేండ్ల నిబంధన పాటించాల్సిందే

ఒకటో తరగతిలో అడ్మిషన్‌ పొందేందుకు ఆరేండ్లు నిండి ఉండాలన్న నిబంధన ఎందుకు పాటించడం లేదని కేంద్ర విద్యాశాఖ తెలంగాణ ప్రభుత్వాన్ని ప్రశ్నించింది. ఈ నిబంధనను పాటించాలని ఆదేశించింది.

• ఒకటో తరగతిలో చేరేందుకు ఈ వయస్సే కరెక్ట్‌
• తెలంగాణ రాష్ర్టానికి కేంద్ర విద్యాశాఖ ఆదేశం

హైదరాబాద్‌, జూలై 8 (నమస్తే తెలంగాణ) : ఒకటో తరగతిలో అడ్మిషన్‌ పొందేందుకు ఆరేండ్లు నిండి ఉండాలన్న నిబంధన ఎందుకు పాటించడం లేదని కేంద్ర విద్యాశాఖ తెలంగాణ ప్రభుత్వాన్ని ప్రశ్నించింది. ఈ నిబంధనను పాటించాలని ఆదేశించింది. ఇక ఎన్‌ఈపీ అమల్లో భాగంగా 5+3+3+4 విద్యావిధానాన్ని రాష్ట్రంలో ప్రవేశపెట్టాలని సూచించింది. 2026-27 విద్యాసంవత్సరం సమగ్ర శిక్షా ప్రాజెక్ట్‌ అఫ్రూవల్‌ బోర్డు(పీఏబీ) మినట్స్‌ను కేంద్రం బుధవారం విడుదల చేసింది.

2026-27విద్యాసంవత్సరంలో మొత్తం రూ. 1,640.85కోట్లు ఖర్చుచేసేందుకు కేంద్రం ఆమోదించింది. కేంద్ర వాటాగా రూ.984.51కోట్లు, రాష్ట్రవాటాగా రూ.656.34కోట్లు, స్పిల్‌ ఓవర్‌గా రూ.135.61కోట్ల చొప్పున ఖర్చుచేసేందుకు గ్రీన్‌సిగ్నల్‌ ఇచ్చింది. ఎలిమెంటరీ విద్యలో రూ.812కోట్లు, సెకండరీ విద్యలో రూ.923 కోట్లు, టీచర్‌ ఎడ్యుకేషన్‌కు రూ.23.92 కోట్ల చొప్పున ఖర్చుచేసేందుకు అనుమతిచ్చింది.

ఆందోళన కలిగిస్తున్న సెకండరీ డ్రాపౌట్‌ రేట్‌..

రాష్ట్రంలో వార్షిక సగటు డ్రాపౌట్‌ రేట్‌ సెండరీ విద్యలో ఆందోళన కలిగిస్తున్నది. ఈ డ్రాపౌట్‌ రేట్‌ 2023 -24లో 8శాతం ఉండగా, 2024-25కు వచ్చేసరికి 10.5 శాతానికి పెరిగింది. జాతీయ సగటు 8.2 శాతంతో పోల్చితే ఇది అత్యధికమని పీఏబీ నివేదిక వెల్లడించింది. ప్రాథమిక, ప్రాథమికోన్నత స్థాయిలో డ్రాపౌట్‌ రేట్‌ తక్కువగా ఉండగా, సెకండరీ స్థాయిలో ఎక్కువగా ఉండటంపై కేంద్రం ఆందోళన వ్యక్తంచేసింది. డ్రాపౌట్‌ రేట్‌ పెరుగుదలకు గల కారణాలను అన్వేషించి, తిరిగి కొనసాగేందుకు చర్యలు తీసుకోవాలని ఆదేశించింది. రాష్ట్రంలో సర్కార్‌ బడుల్లో ఎన్‌రోల్‌మెంట్‌ తగ్గుతున్నదని, దీనికి గల కారణాలను అన్వేషించాలని రాష్ర్టానికి సూచించింది.

ఇవీ.. కేంద్రం ఆదేశాలు

• రాష్ట్రంలో 630 స్కూళ్లలో బాలికల టాయిలెట్ల కొరత ఉన్నది. ఈ విద్యాసంవత్సరంలో వీటిని అధిగమించాలి.
• 14 డైట్‌ కాలేజీల్లో అధ్యాపకుల కొరత ఉన్నది. 286 పోస్టులకు 135 పోస్టులు మాత్రమే భర్తీ అయ్యాయి. మిగతావాటిని వెంటనే భర్తీచేయాలి.
• 15.21లక్షల మంది చిన్నారులకు.. కేవలం 9,038 మంది మాత్రమే ప్రభుత్వ యాజమాన్యంలోని బాలవాటిక, ప్రీ ప్రైమరీ సెక్షన్స్‌లో చేరారు. ఈ ఎన్‌రోల్‌మెంట్‌ను పెంచాలి. అంగన్‌వాడీలు, స్కూళ్లను అనుసంధానించాలి.
• 717 మంది ఔట్‌ ఆఫ్‌ స్కూల్‌ చిల్డ్రన్స్‌ ఉన్నారు. వీరిలో 105 మంది మాత్రమే నమోదయ్యారు. పీరియాడిక్‌ లేబర్‌ ఫోర్స్‌ సర్వే గణాంకాలను పరిగణలోకి తీసుకుని అందరికీ విద్యనందించే ప్రయత్నం చేయాలి.
• రాష్ట్రంలో 72వేలకు పైగా వికలాంగ విద్యార్థులున్నారు. 3.58లక్షల మంది టీచర్లుంటే కేవలం 47,733 టీచర్లు మాత్రమే ఇన్‌క్లూజివ్‌ ఎడ్యుకేషన్‌పై శిక్షణ పొందారు.