ప్రధాని పర్యటన సమయంలోనే ఈడీ, సీబీఐ దాడులు

ప్రధాని ఒక రాష్ట్రంలో పర్యటిస్తున్నారంటే ప్రభుత్వం, అక్కడి ప్రజలు ఎన్నో ఆశలు పెట్టుకొంటారు. తమ ప్రాంత అభివృద్ధికి నిధులు ఇస్తారని ప్రజలు ఎదురుచూస్తే.. కేంద్రం నుంచి రావాల్సిన బకాయిలో, అనుమతులో, కొత్త ప్రాజెక్టులో మంజూరు చేస్తారని రాష్ట్ర ప్రభుత్వాలు ఆశపడతాయి.కానీ.. ప్రస్తుత ప్రధాని నరేంద్రమోదీ మాత్రం ఇందుకు భిన్నం

• ప్రతిపక్ష రాష్ర్టాల్లో జాతీయ దర్యాప్తు సంస్థల హడావుడి
• ఆ రాష్ర్టాలపై అవినీతి ముద్ర వేసే కుట్ర అనే అనుమానాలు
• ఇప్పుడు తెలంగాణలో జరుగుతున్నదీ అదేనని కామెంట్లు

హైదరాబాద్‌, నవంబర్‌ 11 (నమస్తే తెలంగాణ): ప్రధాని ఒక రాష్ట్రంలో పర్యటిస్తున్నారంటే ప్రభుత్వం, అక్కడి ప్రజలు ఎన్నో ఆశలు పెట్టుకొంటారు. తమ ప్రాంత అభివృద్ధికి నిధులు ఇస్తారని ప్రజలు ఎదురుచూస్తే.. కేంద్రం నుంచి రావాల్సిన బకాయిలో, అనుమతులో, కొత్త ప్రాజెక్టులో మంజూరు చేస్తారని రాష్ట్ర ప్రభుత్వాలు ఆశపడతాయి.కానీ.. ప్రస్తుత ప్రధాని నరేంద్రమోదీ మాత్రం ఇందుకు భిన్నం. బీజేపీయేతర పార్టీలు అధికారంలో ఉన్న రాష్ర్టాల్లో మోదీ పర్యటిస్తున్నారంటే.. అక్కడ ఏదో ఒక అలజడి రేగటం పరిపాటిగా మారింది. మోదీ పర్యటన ఖరారైందంటే చాలు.. ఆయన వచ్చే ముందో, తర్వాతనో కచ్చితంగా ఆ రాష్ట్రంలో ఐటీ, ఈడీ, సీబీఐ వంటి జాతీయ దర్యాప్తు సంస్థలు తనిఖీలు చేస్తాయి. గత అనుభవాలను పరిశీలిస్తే ఇది స్పష్టమవుతుంది. వీలైతే అధికార పార్టీ నేతలను టార్గెట్‌ చేస్తారు.. లేదంటే ఇతర సంస్థలపై దాడులు చేసి ఆ రాష్ట్రంలో ఏదో జరుగుతున్నట్టు సీన్‌ సృష్టిస్తారు. ఇప్పుడు తెలంగాణలో జరుగుతున్నది కూడా అదే. శనివారం ప్రధాని రామగుండంలో పర్యటించనున్నారు. ఇందుకు నాలు గు రోజుల ముందే రాష్ట్ర మంత్రి గంగుల కమలాకర్‌, ఎంపీ వద్దిరాజు రవిచంద్ర నివాసాల్లో ఈడీ సోదాలు జరిగాయి.

అవినీతి ముద్ర వేసేందుకే..
బీజేపీయేతర పార్టీల పాలిత రాష్ర్టాల్లో అవినీతి జరుగుతున్నదని ముద్ర వేసేందుకే ఇలాంటి చిల్లర ప్రయత్నాలు చేస్తుంటారని రాజకీయ విశ్లేషకులు విమర్శిస్తున్నారు. ఐటీ, ఈడీ, సీబీఐ సోదాలు బీజేపీ పాలిత రాష్ర్టాల్లో ఎందుకు జరగవు? అని నిలదీస్తున్నారు. అక్కడ అంతా సస్యశ్యామలంగా, పారదర్శంగా పాలన సాగుతున్నట్టు కేంద్రం బిల్డప్‌ ఇస్తున్నదని మండిపడుతున్నారు. కర్ణాటకలో బీజేపీ ప్రభుత్వ అవినీతిని ఏకంగా బ్యానర్లు కట్టి ప్రదర్శిస్తున్నా, ఎందుకు కేంద్ర దర్యాప్తు సంస్థలు తనిఖీలు చేయవని ప్రశ్నిస్తున్నారు. ఈ దాడుల వెనుక డైవర్షన్‌ డ్రామా కూడా దాగున్నదని చెప్తున్నారు. మోదీ పర్యటన సమయంలో వివిధ ప్రాంతాల్లో జరిగిన కొన్ని ఘటనలు

తెలంగాణ

• ప్రధాని మోదీ ఈ ఏడాది రెండుసార్లు తెలంగాణకు వచ్చారు. శనివారం మూడోసారి వస్తున్నారు.
• ఫిబ్రవరి 5న హైదరాబాద్‌లో రామానుజాచార్యుల విగ్రహ ఆవిష్కరణకు వచ్చారు. మరుసటి రోజు.. 6వ తేదీన తెలంగాణ, ఆంధ్రప్రదేశ్‌లోని దాదాపు 40 ప్రాంతాల్లో ఐటీ సోదాలు జరిగాయి. రియల్‌ ఎస్టేట్‌ సంస్థలను లక్ష్యంగా చేసుకొన్నాయి.
• జూలై 1 నుంచి 3 వరకు హైదరాబాద్‌లో నిర్వహించిన బీజేపీ జాతీయ కార్యవర్గ సమావేశాల్లో మోదీ పాల్గొన్నారు. 3వ తేదీన టీఆర్‌ఎస్‌ ఎంపీ నామా నాగేశ్వర్‌రావుకు చెందిన దాదాపు రూ.88 కోట్ల ఆస్తులను జప్తు చేశారు.
• నవంబర్‌ 12వ తేదీన మోదీ రామగుండానికి వస్తున్నారు. నాలుగు రోజుల ముందే.. 9వ తేదీన మంత్రి గంగుల కమలాకర్‌, ఎంపీ వద్ది రాజు రవిచంద్ర ఇండ్లపై ఈడీ దాడులు చేసింది. లిక్కర్‌ స్కాం పేరుతో అరబిందో ఫార్మా డైరెక్టర్‌ శరత్‌చంద్రారెడ్డిని అరెస్ట్‌ చేసింది.\

రాజస్థాన్‌

• మోదీ సెప్టెంబర్‌ 29న రాజస్థాన్‌లో పర్యటించారు. ఆ నెలలోనే రాజస్థాన్‌ హోం మంత్రి రాజేంద్ర యాదవ్‌ నివాసంలో ఐటీ సోదాలు జరిగాయి.
• ఈ నెల 1వ తేదీన మరోసారి రాజస్థాన్‌కు వెళ్లారు. 3, 4 తేదీల్లో దాదాపు 40 ప్రాంతాల్లో ఐటీ శాఖ సోదాలు చేసింది.

పంజాబ్‌

• ఎన్నికల పర్యటనలో భాగంగా జనవరి 19న మోదీ పంజాబ్‌లో పర్యటించారు. ఆ నెలలో పంజాబ్‌లో ఈడీ వరుసగా సోదాలు చేసింది. 5వ తేదీన ఏకంగా నాటి సీఎం చన్నీ మేనల్లుడి ఇంటితోపాటు 12 చోట్ల ఈడీ హడావుడి చేసింది.
• ఈ నెల 5వ తేదీన ప్రధాని పంజాబ్‌కు మరోసారి వెళ్లారు. అంతకు వారం ముందే అక్టోబర్‌ 28న ఐటీ తనిఖీలు జరిగాయి.
• బీజేపీయేతర రాష్ర్టాల్లో మోదీ పర్యటించిన దాదాపు అన్ని సందర్భాల్లోనూ ఇలాంటి హడావుడి కనిపిస్తున్నది.