కాంగ్రెస్‌ కుట్రలపై బీఆర్‌ఎస్‌ అప్రమత్తం

మున్సిపల్‌ చైర్మన్లు, వైస్‌ చైర్మన్ల ఎన్నికల ప్రక్రియలో అధికార కాంగ్రెస్‌ సాగిస్తున్న అరాచకాలు, కుట్రల నేపథ్యం లో బీఆర్‌ఎస్‌ అప్రమత్తమైంది.

• హంగ్‌ మున్సిపాలిటీలకు ఎన్నికల ఇన్‌చార్జులు
• 8 మున్సిపాలిటీల్లో నియామకం.. నేడు ఎన్నికలు
• క్షేత్రస్థాయి నేతలతో వర్కింగ్‌ ప్రెసిడెంట్‌ కేటీఆర్‌ సమీక్ష

హైదరాబాద్‌, ఫిబ్రవరి 16(నమస్తే తెలంగాణ) : మున్సిపల్‌ చైర్మన్లు, వైస్‌ చైర్మన్ల ఎన్నికల ప్రక్రియలో అధికార కాంగ్రెస్‌ సాగిస్తున్న అరాచకాలు, కుట్రల నేపథ్యం లో బీఆర్‌ఎస్‌ అప్రమత్తమైంది. హంగ్‌ ఏర్పడిన మున్సిపాలిటీలకు సంబంధించిన స్థానిక నాయకత్వం, నియోజకవర్గ ఎమ్మెల్యేలు, ఇన్‌చార్జులతో పార్టీ వరింగ్‌ ప్రెసిడెంట్‌ కేటీఆర్‌ సోమవారం స్వయంగా మాట్లాడి క్షేత్రస్థాయి పరిస్థితులను సమీక్షించారు. హంగ్‌ ఏర్పడిన 8 మున్సిపాలిటీల్లో మంగళవారం ఎన్నికలు జరుగనున్నందున పార్టీ సీనియర్‌ నాయకులను ఆయా మున్సిపాలిటీలకు ఇన్‌చార్జులుగా నియమించారు.

ఆయాచోట్ల కాంగ్రె స్‌ చేస్తున్న కిడ్నాప్‌లు, బెదిరింపులు, పోలీసు వ్యవస్థ దు ర్వినియోగం వంటి అంశాలను స్థానిక నేతలను అడిగి తె లుసుకున్న కేటీఆర్‌, స్థానిక నాయకత్వానికి పార్టీ అండగా ఉంటుందని భరోసా ఇచ్చారు. కాంగ్రెస్‌ అరాచకాల నేపథ్యంలో స్థానిక నాయకత్వానికి అన్ని విధాలా అండగా నిలబడేందుకు, ఎన్నికల ప్రక్రియను సమర్థవంతంగా పర్యవేక్షించేందుకు పార్టీ తరఫున సీనియర్‌ నాయకులను ప్రత్యేక ఇన్‌చార్జులుగా పంపుతున్నట్టు ప్రకటించారు. మంగళవారం ఎన్నికలు జరుగనున్న 8 మున్సిపాలిటీల్లో బీఆర్‌ఎస్‌ స్పష్టంగా చైర్మన్‌ పీఠాలను గెలుచుకునే అవకాశం ఉన్నందున, ఈ ఎన్నికలను పార్టీ ప్రతిష్ఠాత్మకంగా తీసుకున్నది. ప్రజాస్వామ్యబద్ధంగా ఎన్నికలు జరిగితే ఈ 8 మున్సిపాలిటీల్లో బీఆర్‌ఎస్‌ జెండా ఎగురడం ఖాయమని, కాంగ్రెస్‌ ఎన్ని కుట్రలు చేసినా తమ విజయాన్ని అడ్డుకోలేరని పార్టీ ధీమా వ్యక్తంచేసింది.

మున్సిపాలిటీలకు ఇన్‌చార్జులు వీరే

• తొర్రూరు – ఎమ్మెల్సీ మధుసూదనాచారి,సత్యవతి రాథోడ్‌, పెద్ది సుదర్శన్‌ రెడ్డి
• జనగామ- శాసనమండలి డిప్యూటీ చైర్మన్‌ బండా ప్రకాశ్‌, ఎమ్మెల్సీ పోచంపల్లి శ్రీనివాస్‌రెడ్డి
• క్యాతనపల్లి- ఎమ్మెల్యే కోవ లక్ష్మి 
• ఖానాపూర్‌- ఎమ్మెల్యే అనిల్‌ జాదవ్‌
• ఇంద్రేశం- ఎమ్మెల్యే ప్రభాకర్‌రెడ్డి, ఎమ్మెల్సీ యాదవరెడ్డి
• కాగజ్‌నగర్‌- జోగు రామన్న
• జహీరాబాద్‌- ఎమ్మెల్యేలు చింతా ప్రభాకర్‌,సునీతాలక్ష్మారెడ్డి
• ఇబ్రహీంపట్నం – ఎమ్మెల్యే సబితాఇంద్రారెడ్డి,ఎమ్మెల్సీ శంభీపూర్‌ రాజు