MLA Jagadish Reddy | 22 నెల‌ల కాంగ్రెస్ పాల‌న‌లో గ్యారెంటీల జాడే లేదు.. ఎమ్మెల్యే జ‌గ‌దీశ్ రెడ్డి ధ్వ‌జం

MLA Jagadish Reddy | 22 నెల‌ల కాంగ్రెస్ పాల‌న‌లో గ్యారెంటీల జాడే లేదు అని సూర్యాపేట బీఆర్ఎస్ ఎమ్మెల్యే జ‌గ‌దీశ్ రెడ్డి ధ్వ‌జ‌మెత్తారు. అందుకే ఇంటింటికి కాంగ్రెస్ బాకీ కార్డులు పంచుతున్నాం అని ఆయ‌న తెలిపారు.

MLA Jagadish Reddy | సూర్యాపేట : 22 నెల‌ల కాంగ్రెస్ పాల‌న‌లో గ్యారెంటీల జాడే లేదు అని సూర్యాపేట బీఆర్ఎస్ ఎమ్మెల్యే జ‌గ‌దీశ్ రెడ్డి ధ్వ‌జ‌మెత్తారు. అందుకే ఇంటింటికి కాంగ్రెస్ బాకీ కార్డులు పంచుతున్నాం అని ఆయ‌న తెలిపారు. సూర్యాపేట నియోజకవర్గంలోని చివ్వెంల మండలం, ఉండ్రుగొండ గ్రామంలో ఎమ్మెల్యే జ‌గ‌దీశ్ రెడ్డి ఇంటింటికీ తిరిగి కాంగ్రెస్ బాకీ కార్డులను పంపిణీ చేశారు.

ఈ సంద‌ర్భంగా జ‌గ‌దీశ్ రెడ్డి మాట్లాడుతూ.. ఎన్నికల ముందు 6 గ్యారెంటీలతో పాటు 420 హామీలు ఇచ్చి అధికారంలోకి వచ్చారు. రైతు రుణమాఫీ డిసెంబర్ 9 లోపే చేస్తామని చెప్పారు. హామీలే కాదు ఇంటింటికి గ్యారెంటీ కార్డు కూడా స్వయంగా వాళ్లే పంచిపెట్టారు. గ్యారెంటీ కార్డులను దగ్గర పెట్టుకొని రాకుంటే మాకు గుర్తు చేయమని ఆనాడే చెప్పారు. గ్యారెంటీ కార్డులు ఇచ్చి 22 నెలలు పూర్తయినా.. ఏ ఒక్క హామీ కూడా నెరవేర్చలేదు. వాళ్ళు ఇచ్చిన గ్యారెంటీ కార్డుల ప్రకారమే ఎవరెవరికి ఎంత బాకీ ఉన్నారో తెలిసేలా కాంగ్రెస్ పార్టీ బాకీ కార్డు రూపంలో అందిస్తున్నాం అని జ‌గ‌దీశ్ రెడ్డి తెలిపారు.

రూ. 50వేల కోట్లు రుణమాఫీ చేస్తామని రూ. 20 వేల కోట్లు చేశామని చెప్పారు. అందులో కూడా రూ. 17000 కోట్లు మాత్రమే రుణమాఫీ చేశారు. రైతుబంధు కాదు రైతు భరోసా అని చెప్పిన ప్రకారం ఒక్కో ఎకరానికి రూ. 19 వేల బాకీ ఉంది. మహిళలకు రూ. 2500 మొదటి నెల నుంచే ప్రారంభిస్తామని చెప్పి.. ఇప్పటివరకు ఒక్కో మహిళకు రూ. 55 వేల బాకీ ఉంది. మొత్తం ఆసరా పెన్షన్ లు ప్రతి ఒక్కరికి రూ. 44 వేల బాకీ ఉంది. ఒక ఇంట్లో ఇద్దరికి ఇస్తామని చెప్పిన వాళ్లకు కలిపితే రూ. 88 వేలు బాకీ ఉన్నట్టే. వికలాంగులకు కూడా ఒక్కొక్కరికి రూ. 44 వేల బాకీ ఉంది. గ్రామీణ ఉపాధి హామీ కూలీలకు కూడా ఏడాదికి రూ.12,000 అని చెప్పారు వాళ్లకు కూడా రూ.24000 బాకీ ఉంది. ఆటో కార్మికులకు ఏడాదికి రూ.12 వేలు అని చెప్పిన ప్రకారం రూ. 22,000 బాకీ ఉంది అని జ‌గ‌దీశ్ రెడ్డి పేర్కొన్నారు.

2,00,000 ఉద్యోగాలు ఇస్తామని చెప్పి ఇప్పటికి 5000 ఉద్యోగాలు కూడా ఇవ్వలేదు. ఇచ్చిన ఒక్క గ్రూపు1 లో కూడా మొత్తం ఫైరవీలు చేసి కోట్ల రూపాయలు తీసుకొని ఉద్యోగాలను ఆంధ్రోళ్లకు కట్టబెట్టారు. ఆడపిల్లలకు స్కూటీలు ఇస్తామని చెప్పి వాళ్ళను కూడా మోసం చేశారు. విద్యార్థులకు 5 లక్షల భద్రత కార్డులు ఇస్తామని చెప్పి వాళ్ళను మోసం చేశారు. ఈ హామీలన్నీ కూడా రేవంత్ మాత్రమే కాదు.. సోనియమ్మ, రాహుల్ గాంధీ, ప్రియాంక గాంధీ, కార్గే లు చెప్పినవే. ప్రభుత్వ ఉద్యోగులనే కాదు ఔట్ సోర్సింగ్ ఉద్యోగలను కూడా దారుణంగా మోసం చేసిండు. ఎవరైనా ప్రభుత్వాన్ని నిలదీస్తే అరెస్టులు చేసి అక్రమ కేసులు బనాయిస్తున్నారు. కాంగ్రెస్ చోటామోటా నాయకులు ఫోన్ చేసినా పోలీసులు కేసులు పెట్టే పనిలో ఉన్నారు అని జ‌గ‌దీశ్ రెడ్డి మండిప‌డ్డారు.

సినిమాకు పోయి తొక్కేసలాటల్లో చనిపోతే ఎంతో పెద్ద హడావిడి చేసిన ప్రభుత్వం, యూరియాలో ఉన్న నిలబడి మహిళా రైతు చనిపోతే పరామర్శించిన పాపాన పోలేదు. రైతుల ప్రాణాలంటే ఈ ప్రభుత్వానికి ఇంత నిర్లక్ష్యమా? ఇన్ని ఇబ్బందులకు గురి చేస్తున్న కాంగ్రెస్ పార్టీ ఏ ముఖం పెట్టుకొని ప్రజల్లోకి వస్తారో చూద్దాం. ఎన్నికలని ఇండ్ల ముందుకు వస్తే ఈ కార్డులు చూపించి నిలదీయండి. సూర్యాపేట ఉండ్రుగొండలో ఇంటింటికి తిరిగి కార్డులు పంచినం. కార్డులు పంచుతున్న సమయంలో కాంగ్రెస్ గురించి ప్రజలు హేళనగా మాట్లాడుతున్నారు. కాంగ్రెస్ పార్టీ నాయకులకు తగిన బుద్ధి చెప్పేందుకు ప్రజలు సిద్ధంగా ఉన్నారు అని ఎమ్మెల్యే జ‌గ‌దీశ్ రెడ్డి స్ప‌ష్టం చేశారు.