Sugar | చ‌క్కెర‌లో ఉండే మూడు ర‌కాలు ఏమిటి.. అవి ఏం చేస్తాయి..?

చక్కెరలో సుక్రోజ్‌, గ్లూకోజ్‌, ఫ్రక్టోజ్‌ అనే మూడు రకాలు ఉంటాయి. బరువును బట్టి చూసినప్పుడు ఈ మూడింటి నుంచీ సమానమైన కేలరీలు లభిస్తాయి. అయితే శరీరం వీటిని జీర్ణం చేసుకునే విధానం, జీవక్రియలపై చూపే ప్రభావం భిన్నంగా ఉంటుంది. ఇవి పండ్లు, కూరగాయలు, పాల ఉత్పత్తులు, ధాన్యాల్లో సహజంగా లభిస్తాయి. అదే సమయంలో అనేక శుద్ధి చేసిన, ప్యాకెట్‌ ఆహార పదార్థాల్లోనూ అదనపు చక్కెరలుగా కలుపుతారు.

Sugar | చక్కెరలో సుక్రోజ్‌, గ్లూకోజ్‌, ఫ్రక్టోజ్‌ అనే మూడు రకాలు ఉంటాయి. బరువును బట్టి చూసినప్పుడు ఈ మూడింటి నుంచీ సమానమైన కేలరీలు లభిస్తాయి. అయితే శరీరం వీటిని జీర్ణం చేసుకునే విధానం, జీవక్రియలపై చూపే ప్రభావం భిన్నంగా ఉంటుంది. ఇవి పండ్లు, కూరగాయలు, పాల ఉత్పత్తులు, ధాన్యాల్లో సహజంగా లభిస్తాయి. అదే సమయంలో అనేక శుద్ధి చేసిన, ప్యాకెట్‌ ఆహార పదార్థాల్లోనూ అదనపు చక్కెరలుగా కలుపుతారు. ఆహారంలో చక్కెరను తగ్గించాలనుకునేవారు ఈ మూడు రకాల మధ్య తేడాలను తెలుసుకోవడం ముఖ్యం. ఆరు నెలలలోపు శిశువుల ఆహారంలో సుక్రోజ్‌, ఫ్రక్టోజ్‌ కలపడాన్ని నిషేధించే ప్రతిపాదనను భారత ఆహార భద్రత, ప్రమాణాల సంస్థ తీసుకొచ్చింది. చిన్న వయస్సులోనే అదనపు చక్కెరలకు అలవాటు పడకుండా చూడడం, తద్వారా బాల్య ఊబకాయం వంటి సమస్యల ప్రమాదాన్ని తగ్గించడం దీని ఉద్దేశం.

చ‌క్కెర‌లోని మూడు ర‌కాలు..

సుక్రోజ్‌ను సాధారణంగా మనం వాడే చ‌క్కెరగా పిలుస్తారు. ఇందులో ఒక గ్లూకోజ్‌ అణువు, ఒక ఫ్రక్టోజ్‌ అణువు కలిసి ఉంటాయి. చెరకు, చక్కెర దుంపల నుంచి దీన్ని తయారు చేస్తారు. మిఠాయిలు, ఐస్‌క్రీమ్‌లు, అల్పాహార తృణధాన్యాలు, శీతల పానీయాలు, ఇతర ప్యాకెట్‌ ఆహారాల్లో దీనిని విస్తృతంగా ఉపయోగిస్తారు. గ్లూకోజ్‌ ఒక సరళ చక్కెర. శరీరానికి శక్తిని అందించే ప్రధాన వనరుల్లో ఇది ఒకటి. అన్నం, చ‌పాతీలు, కూరగాయలు వంటి కార్బొహైడ్రేట్లు అధికంగా ఉండే ఆహార పదార్థాల ద్వారా శరీరానికి గ్లూకోజ్‌ లభిస్తుంది. ప్రాసెస్‌ చేసిన ఆహారాల్లో డెక్స్ట్రోజ్‌ పేరుతోనూ దీన్ని కలుపుతారు. గ్లూకోజ్‌ చిన్న పేగుల ద్వారా నేరుగా రక్తంలోకి చేరి చక్కెర స్థాయిలను త్వరగా పెంచుతుంది. దీంతో క్లోమగ్రంథి ఇన్సులిన్‌ను విడుదల చేస్తుంది. అధికంగా తీసుకుంటే రక్తంలో చక్కెర స్థాయిలు పెరగడం, ఇన్సులిన్‌ నిరోధకత, టైప్‌-2 మధుమేహం వంటి సమస్యల ప్రమాదం పెరుగుతుంది.

చ‌క్కెర స్థాయిల‌పై ప్ర‌భావం ఎలా..

ఫ్రక్టోజ్‌ను పండ్ల చక్కెరగా కూడా పిలుస్తారు. ఇది పండ్లు, తేనె, కొన్ని వేరు కూరగాయల్లో సహజంగా ఉంటుంది. ప్రాసెస్‌ చేసిన ఆహారాల్లో అధిక ఫ్రక్టోజ్‌ కార్న్‌ సిరప్‌ రూపంలోనూ కలుపుతారు. ఈ మూడు రకాల చక్కెరల్లో ఫ్రక్టోజ్‌ తియ్యదనం ఎక్కువగా ఉంటుంది. గ్లూకోజ్‌తో పోలిస్తే ఇది రక్తంలో చక్కెర స్థాయిలను తక్కువగా ప్రభావితం చేసినప్పటికీ, అధికంగా తీసుకోవడం ఆరోగ్యానికి మంచిది కాదు. ముఖ్యంగా శుద్ధి చేసిన ఫ్రక్టోజ్‌ అధికంగా తీసుకుంటే కాలేయంలో కొవ్వు పేరుకుపోవడం, ట్రైగ్లిజరైడ్ల స్థాయిలు పెరగడం, పొట్ట చుట్టూ కొవ్వు పెరగడం, గుండె సంబంధిత సమస్యల ప్రమాదం పెరుగుతంది. అయితే పండ్లలో సహజంగా ఉండే ఫ్రక్టోజ్‌తోపాటు పీచు పదార్థాలు, ఇతర పోషకాలు కూడా లభిస్తాయి. అందువల్ల పండ్లను తినడం, అదనపు చక్కెరలు కలిపిన పానీయాలు తీసుకోవడం ఒకేలా చూడకూడదు.

సుక్రోజ్‌ను అధికంగా తీసుకుంటే..

సుక్రోజ్‌ శరీరంలోకి వెళ్లిన తర్వాత చిన్న పేగుల్లోని ఎంజైమ్‌ల సహాయంతో గ్లూకోజ్‌, ఫ్రక్టోజ్‌గా విడిపోతుంది. గ్లూకోజ్‌ రక్తంలో చక్కెర స్థాయిలను పెంచగా, ఫ్రక్టోజ్‌ను ప్రధానంగా కాలేయం జీవక్రియల ద్వారా ప్రాసెస్‌ చేస్తుంది. సుక్రోజ్‌ను అధికంగా తీసుకోవడం వల్ల ఊబకాయం, దంతక్షయం, దీర్ఘకాలిక ఆరోగ్య సమస్యల ప్రమాదం పెరుగుతుంది. కాబట్టి చక్కెర ఏ రూపంలో ఉన్నా మోతాదును నియంత్రించడం ముఖ్యం. పండ్లు, కూరగాయలు, ధాన్యాలు, పప్పుధాన్యాలు వంటి సహజ ఆహార పదార్థాలకు ప్రాధాన్యం ఇవ్వాలి. అదనపు చక్కెరలు కలిగిన స్వీట్లు, శీతల పానీయాలు, ప్రాసెస్‌ చేసిన ఆహారాలను పరిమితంగా తీసుకోవాలి. ఆరోగ్యకరమైన ఆహారపు అలవాట్లు పాటించడం ద్వారా రక్తంలో చక్కెర స్థాయిలను నియంత్రించుకోవడంతోపాటు దీర్ఘకాలిక వ్యాధుల ప్రమాదాన్ని తగ్గించుకోవచ్చు.