Assembly Session | ఝూట్‌.. దగా..మోసం.. గవర్నర్‌ ప్రసంగంపై బీఆర్‌ఎస్‌ సభ్యుల నిరసన

Assembly Session | అసెంబ్లీలో గవర్నర్‌ ప్రసంగం అంతా దగా, అబద్ధం, మోసం అంటూ బీఆర్‌ఎస్‌ సభ్యులు తీవ్ర నిరసన తెలిపారు. గవర్నర్‌ ప్రసంగం పూర్తిగా వాస్తవాలకు విరుద్ధంగా ఉన్నదని మండిపడ్డారు. అసెంబ్లీ బడ్జెట్‌ సమావేశాలు సోమవారం ప్రారంభమైన సందర్భంగా గవర్నర్‌ శివప్రతాప్‌ శుక్లా ఉభయ సభలనుద్దేశించి ప్రసంగించారు. బీఆర్‌ఎస్‌ ఎమ్మెల్యేలు, ఎమ్మెల్సీలు సర్కారు తప్పులను ఎత్తిచూపారు.

Assembly Session | హైదరాబాద్‌, మార్చి 16 (నమస్తే తెలంగాణ): అసెంబ్లీలో గవర్నర్‌ ప్రసంగం అంతా దగా, అబద్ధం, మోసం అంటూ బీఆర్‌ఎస్‌ సభ్యులు తీవ్ర నిరసన తెలిపారు. గవర్నర్‌ ప్రసంగం పూర్తిగా వాస్తవాలకు విరుద్ధంగా ఉన్నదని మండిపడ్డారు. అసెంబ్లీ బడ్జెట్‌ సమావేశాలు సోమవారం ప్రారంభమైన సందర్భంగా గవర్నర్‌ శివప్రతాప్‌ శుక్లా ఉభయ సభలనుద్దేశించి ప్రసంగించారు. బీఆర్‌ఎస్‌ ఎమ్మెల్యేలు, ఎమ్మెల్సీలు సర్కారు తప్పులను ఎత్తిచూపారు.

మొత్తం ఎనిమిది పాలసీలను తీసుకొచ్చినట్టు ప్రభుత్వం గవర్నర్‌ ప్రసంగంలో వివరించించింది. ఈ ఎనిమిది పాలసీల పేర్లు గవర్నర్‌ చదివినప్పుడల్లా ఫాల్స్‌. ఫాల్స్‌ అంటూ బీఆర్‌ఎస్‌ సభ్యులు పెద్ద పెట్టున నినాదాలు చేశారు. గవర్నర్‌ ప్రసంగం సాగినంత సేపు 75 నిమిషాలపాటు బీఆర్‌ఎస్‌ సభ్యులు నిల్చొనే నిరసన తెలిపారు. నల్లబ్యాడ్జీలు ధరించి సభకు హాజరైన గులాబీ నేతలు తమ స్థానాల నుంచే ఆందోళన కొనసాగించారు. ఆరు గ్యారెంటీలకు చట్టబద్ధత కల్పించకపోవడంలో కాంగ్రెస్‌ సర్కారు నిర్లక్ష్యాన్ని ఎండగడుతూ సభలో ఆందోళన చేపట్టారు.

మక్కీకి.. మక్కీ ట్రాన్స్‌లేషన్‌..

సర్కారు సిద్ధం చేసిన గవర్నర్‌ ప్రసంగ పాఠాన్ని తెలుగు, ఇంగ్లిష్‌, ఉర్దూ భాషల్లో ముద్రించారు. అయితే తెలుగు ప్రసంగ పాఠం మొత్తం గందరగోళంగా తయారైంది. ఏఐని వినియోగించి ట్రాన్స్‌లేషన్‌ చేసినట్టు అనిపించింది. ఓ చోట గురుకులాలకు బదులు నైవాసిక గృహాలుగా ముద్రితమయ్యింది. వేగవంతమైన ఆర్థిక వృద్ధికి బదులు ఘాతాంశ ఆర్థిక విస్తరణ అంటూ పేర్కొన్నారు. స్వాతంత్ర శత జయంతి… విమాన అనుసంధానత.. అనే పదాలను వాడారు.

సార్‌.. కొంచెం మంచినీళ్లివ్వండీ..

‘సార్‌ కొంచెం మంచినీళ్లు ఇవ్వండీ అంటూ’ అసెంబ్లీలో కొందరు ఎమ్మెల్యేలు అధికారులను వేడుకున్నారు. అసలే ఎండాకాలం, గొంతెండిపోవడంతో నీళ్లు ఇప్పించాలని అభ్యర్థించారు. ప్రత్యేకించి బీఆర్‌ఎస్‌ సభ్యులు గవర్నర్‌ ప్రసంగం సందర్భంగా నినాదాలు చేయడంతో వారి గొంతులెండిపోయి నీళ్లు ఇవ్వాలని కోరారు. కొందరు అసెంబ్లీ సిబ్బంది, మార్షల్స్‌ అసెంబ్లీ సెక్రటరీ సహా ఇతర అధికారులతో ఇదే విషయంపై చర్చించారు. ఆ తర్వాత కూడా సభ్యులకు మంచినీళ్లు ఇవ్వకపోవడం గమనార్హం.

గవర్నర్‌ ప్రసంగం – బీఆర్‌ఎస్‌ సభ్యుల ప్రతిస్పందనలు

• కాలుష్యకారక పరిశ్రమలను ఓఆర్‌ఆర్‌ వెలుపలికి తరలించేందుకే హిల్ట్‌ విధానం తీసుకొచ్చాం, తెలంగాణ రైజింగ్‌ గ్లోబల్‌ సమ్మిట్‌ను నిర్వహించాం. రూ.5.75లక్షల కోట్ల పెట్టుబడి పెట్టేందుకు నిబద్ధతను వ్యక్తంచేశారు. 23వ బయో ఆసియా 2026 అంతర్జాతీయ సదస్సు ద్వారా రూ.1,700 కోట్ల పెట్టుబడులు ఆకర్షించాం.
  ఝూటా.. ఇదంతా ఫాల్స్‌. బోగస్‌. తప్పు. గవర్నర్‌ సార్‌ మీతో అబద్ధాలు చెప్పిస్తున్నారు. హిల్ట్‌ పాలసీ బడా స్కాం. వేల కోట్ల స్కామ్‌ ఇది.
• 2025-26లో వ్యవసాయ రంగానికి రూ.26,684 కోట్లు కేటాయించాం ఇది శుద్ధ అబద్ధం. కేవలం కాగితాలపైనే కేటాయింపులు.. మంజూరీలు లేవు. రైతులకు రూ.26 వేల కోట్లు అందలేదు.
• రైతు భరోసా కింద తొమ్మిది రోజుల్లోనే రూ.8744 కోట్ల నిధులు విడుదల చేశాం. మేలు రకం వరి సాగును ప్రోత్సహించడానికి క్వింటాల్‌కు రూ.500 బోనస్‌ విడుదల చేశాం ఝూట్‌.. ఝూట్‌.. మూడు ఫసళ్లకు రైతు భరోసా ఇవ్వలేదు. బోనస్‌ ..బోగస్‌.
• భూ పరిపాలన బలోపేతం చేసేందుకు గ్రామాల్లో 5,520 మంది లైసెన్స్‌డ్‌ సర్వేయర్ల సేవలను అందుబాటులోకి తీసుకొచ్చాం సర్వేయర్లకు నమ్మక ద్రోహం చేశారు. నెలవారి జీతాలివ్వడం లేదు. కమిషన్‌ ఇస్తూ చేతులు దులుపుకున్నారు.
• కృష్ణా గోదావరి నదీ జలాల వాటాను పంచుకోవడంలో రాష్ట్ర ప్రయోజనాలను కాపాడేందుకు చర్యలు చేపడుతున్నాం నీటి హక్కుల పరిరక్షణలో విఫలమయ్యారు. నదీ జలాల్లో వాటాను సాధించడంలో ఫెయిలయ్యారు.
• మహాలక్ష్మీ పథకం ద్వారా మహిళలు 269.68 కోట్ల ఉచిత బస్సు ట్రిప్పులను సద్వినియోగం చేసుకున్నారుసార్‌ ముందు ఆర్టీసీ కార్మికులను రెగ్యులరైజ్‌ చేయండి. కార్మికులు సమ్మెకు వెళుతున్నారు. సంస్థను రక్షించండి
• రాష్ట్రంలో 42.90 లక్షల కుటుంబాలకు సబ్సిడీపై ఎల్‌పీజీ సిలిండర్లు అందిస్తున్నాం సబ్సిడీ బోగస్‌. సబ్సిడీ డబ్బులను ఆర్థిక మంత్రి భట్టి ఇవ్వడంలేదు. ఈ విషయం పౌరసరఫరాల శాఖ మంత్రి ఉత్తమ్‌కుమార్‌రెడ్డికి కూడా తెలుసు.
• శ్రీనిధి ద్వారా ఎస్‌హెచ్‌జీలకు లక్ష కోట్ల రుణాలిచ్చేందుకు ప్రణాళికను రూపొందించాం ఇది అవాస్తవం. లక్ష రూపాయల రుణాలిచ్చి.. ఐదు లక్షలు అని చెప్పుకుంటున్నరు.
• దివ్యాంగుల పునరావాసానికి అత్యంత ప్రాధాన్యతనిస్తున్నాం దివ్యాంగుల పెన్షన్‌ను 6వేలకు పెంచుతామని మోసం చేశారు. కనీసం దివ్యాంగులనైనా కనికరించండి.
• సంక్షేమ వసతి గృహాల్లో డైట్‌ చార్జీలను 40% పెంచాం. కాస్మెటిక్‌ చార్జీలను 212% పెంచాం గురుకులాల్లో విద్యార్థులు చనిపోతున్నారు. ప్రతిరోజు ఫుడ్‌ పాయిజన్లు నిత్యకృత్యమయ్యాయి.
• విద్యావ్యవస్థను ప్రక్షాళన చేసి, నూతన విద్యావిధానాన్ని రూపొందించనున్నాం. ముందు ఫీజు రీయింబర్స్‌మెంట్‌ సంగతి చూడండి. రూ.10 వేల కోట్ల బకాయిలున్నాయి.
• ఆరోగ్య తెలంగాణ రైజింగ్‌ 2047 విజన్‌ను సాకారం చేసేందుకు ప్రయత్నిస్తున్నాం కేసీఆర్‌ కిట్లు ఇవ్వండి.. బాలింతలకు ఈ కిట్లు అందడంలేదు. ఆరోగ్యశ్రీ బంద్‌ అయ్యింది.
• విద్యా, ప్రభుత్వ ఉపాధిలో 42 శాతం రిజర్వేషన్‌ కల్పించేందుకు రెండు బిల్లులను భారత రాష్ట్రపతి ఆమోదం కోసం పంపించాం కామారెడ్డి డిక్లరేషన్‌ నామ్‌ పే ధోకా దియా.. బీసీలను మోసం చేశారు. ఎస్సీ, ఎస్టీ సబ్‌ప్లాన్‌ అమలుకావడంలేదు. ఎస్సీ, ఎస్టీలను మోసం చేశారు.
• నియామక సంస్థలను సంస్కరించాం. రికార్డు సమయంలో 67,763 ఉద్యోగాలను భర్తీచేశాం ఫేక్‌, బోగస్‌. రెండు లక్షల ఉద్యోగాలిస్తామన్న రాహుల్‌గాంధీ హామీలేమయ్యాయి..?
• ఉద్యోగుల సంక్షేమానికి అత్యంత ప్రాధాన్యమిచ్చాం. ఉద్యోగుల భద్రత.. సామాజిక భద్రతకు చారిత్రక నిర్ణయం తీసుకున్నాం రిటైర్డ్‌ ఉద్యోగులకు బెనిఫిట్లు అందడంలేదు. రిటైర్డ్‌ ఉద్యోగులు చనిపోతున్నారు. గవర్నర్‌సాబ్‌. రిటైర్డ్‌ ఉద్యోగులకు పెన్షన్‌ ఇవ్వమని మీరైనా చెప్పండి.
• 2025లో 72వ మిస్‌ వరల్డ్‌ పోటీలకు హైదరాబాద్‌ అతిథ్యమిచ్చింది. అంతర్జాతీయ స్థాయి కార్యక్రమాన్ని నిర్వహించే సామర్థ్యం మనకుందని చాటుకున్నాం మిస్‌ వరల్డ్‌ పోటీదారులను అవమానించారు కొందరు పోటీల్లో పాల్గొనకుండా నిష్క్రమించారు.