MLA Raghunandan rao | బీజేపీ అధిష్ఠానంపై రఘునందన్ రావు సంచలన వ్యాఖ్యలు.. ఆడియో లీక్..

బీజేపీ రాష్ట్ర అధ్యక్షుడి మార్పుతో పార్టీలో నివురుగప్పిన నిప్పులా ఉన్న అసమ్మతి ఒక్కసారిగా అణుబాంబులా పేలింది.

MLA Raghunandan rao | హైదరాబాద్‌, జూలై 4 (నమస్తే తెలంగాణ): బీజేపీ రాష్ట్ర అధ్యక్షుడి మార్పుతో పార్టీలో నివురుగప్పిన నిప్పులా ఉన్న అసమ్మతి ఒక్కసారిగా అణుబాంబులా పేలింది. కిషన్‌రెడ్డికి అధ్యక్ష బాధ్యతలు అప్పగించటంపై పలువురు నేతలు తీవ్రంగానే స్పందిస్తున్నారు. ముఖ్యంగా ఆ పదవి ఆశిస్తున్నట్టుగా ప్రచారమైన కొందరు ఎమ్మెల్యేలు, సీనియర్లు పార్టీ అధిష్ఠానంపై కూడా కారాలు మిరియాలు నూరుతున్నారు. అధ్యక్ష పదవి ఆశావహుల్లో ఒకరిగా ఉన్న దుబ్బాక ఎమ్మెల్యే రఘునందన్‌రావు అయితే, పార్టీ నిర్ణయంపై అగ్గిమీద గుగ్గిలమయ్యారు. పనిలోపనిగా బీజేపీ అధిష్ఠానం తెలంగాణలో వెలగబెట్టిన నిర్వాకాలన్నీ బయటపెట్టారు. ఆయన పలువురు మీడియా ప్రతినిధులతో ఆఫ్‌ ది రికార్డుగా మాట్లాడిన ఓ ఆడియో క్లిప్‌ ఇప్పుడు వైరల్‌ అయ్యింది. అందులో కిషన్‌రెడ్డి నియామకం, అమిత్‌షా రాజకీయ చతురతపై రఘునందన్‌ ఘాటుగానే స్పందించారు.

ఆడియోలో రఘునందన్‌ మాట్లాడిన మాటలు ఇవి..

• కిషన్‌రెడ్డికి ఏం అర్హత ఉంది? నాకు ఏం అర్హత లేదు? ప్రెసిడెంట్‌ రేసులో నేను ఎందుకు ఉండొద్దు?
  నేను వెలమ వాడిని కాబట్టి కేసీఆర్‌కు అనుకూలంగా ఉంటానని దుష్ప్రచారం చేస్తున్నారు.నాకు కులమే మైనస్‌.కొన్ని సమస్యల్ని కాలమే పరిష్కరిస్తుంది. నేను పిల్లను చూడటానికి వచ్చా.. ఈమె నచ్చకపోతే పక్కింటికి పోతా

• అడుక్కు తినేవాడికి ఊర్లు కరువా? నీ ఇంటికాడ ఎయ్యకపోతే పక్కింటికిపోతా.
• ఈ ఊర్ల ఎవ్వరూ బిచ్చం వేయకుంటే నడుచుకుంటా పక్కూరికి కూడా పోతా. బీజేపీ, బీఆర్‌ఎస్‌ ఒకటి కాదు. ఒక వర్గం మీడియా కావాలని అలా ప్రచారం చేస్తున్నది.
• బీజేపీ, బీఆర్‌ఎస్‌ ఒకటైతే కాంగ్రెస్‌తో ప్రతిపక్ష కూటమిలో ఉన్న అఖిలేశ్‌ యాదవ్‌ కేసీఆర్‌ను ఎందుకు కలుస్తున్నాడు?
• యూసీసీ బిల్లు వస్తుంది. పాసవుతుంది.
• టీడీపీ జెండా మోసేవాళ్లంతా రేవంత్‌రెడ్డిని సీఎం చేయాలనుకొంటున్నారు. రేవంత్‌ సీఎం అయితే మా సంఘానికి, మా సమాజానికి ఉపయోగం అనుకొంటున్నారు. రెండు నెలలు ఆగితే ఈ బలుపు ఉంటుందా? ఈ వాపు ఉంటుందా? మేం ఎవరిని సిక్స్‌ కొడతామో, ఎవర్ని జైల్లో పెడతామో తెలుస్తుంది. ఎవడు ఏడుంటాడో తేలుతుంది. ఓటుకు నోటు కేసు కూడా తేలుతుంది.
• నేను ఉన్న పార్టీలోనే ఉంటా. దుబ్బాక నుంచి రెండోసారి ఎమ్మెల్యేగా గెలిచి వస్తా. నేను బీజేపీ బీఫాం ఇస్తే గెలిచానా? బీజేపీ గుర్తు ఉంది కాబట్టి గెలిచానా? నిన్నటిదాకా నేను మాట్లాడలేదు. ఇయ్యాల మాట్లాడుతున్నా. రఘునందన్‌ రావు కష్టపడితే, జనంలో విశ్వాసం తీసుకొస్తే, వీడు కేసీఆర్‌ను కొట్టగలుగుతాడు.. మొగోడు అనుకొని ప్రజలు నాకు ఓటేశారు. నేను అమ్ముడపోతా అనుకుంటే నాకు ఓటెందుకు వేస్తారు? బీఆర్‌ఎస్‌కే వేస్తారు కదా? నేను అమ్ముడుపోయేటోడ్ని అయితే రెండున్నరేండ్ల కిందే అమ్ముడుపోవాలి. ఇప్పుడు ఎందుకు అమ్ముడుపోతా? నాకంటే ముందు కూడా పార్టీ ఇక్కడ పోటీ చేసింది, గుర్తు పోటీ చేసింది. అప్పుడు 3,500 ఓట్లే వచ్చాయి. పార్టీ, గుర్తు అనేవి లాస్ట్‌ అంశాలు.
• నన్ను వంకరగా అడిగితే వంకరగానే మాట్లాడతా. అదే పువ్వు గుర్తు వంద కోట్లు ఇస్తే మునుగోడులో ఎందుకు గెలవలేదు? నేను గెలిపిస్తా నువ్వు రిజైన్‌ చెయ్యి అన్నాడు అమిత్‌ షా. ఏమైంది మరి అమిత్‌ షా చాణక్యం?
• దుబ్బాకకు అమిత్‌ షా రాలేదు. నేనొక్కడినే లడాయించేసిన. చెప్పమను ఒక్కరైనా సాయం చేశారా? రూపాయి ఇచ్చారా? నాకు వంద కోట్లు ఇస్తే తెలంగాణను ఉరికించి ఉరికించి ఆడిపిస్తా. బీజేపీలో కింద ఉన్న వాళ్లని పైకి తీసుకురాకపోతే వాళ్ల ఖర్మ. మోదీకి కూడా ఇంతకంటే ఎక్కువే ఉంటుంది నా వయసులో ఉన్నప్పుడు. టైం పట్టిద్ది.
• నేను ఆటంబాంబు లాంటోడిని. ఆటంబాంబుని జేబులో ఎవడు పెట్టుకుంటాడు? అగ్గిని ఎంతసేపు జేబులో పెట్టుకుంటావు? కాల్తది అది. ఎట్లాగైనా కాల్తది. నాకేమీ ఇబ్బంది లేదు. తెలంగాణ అసెంబ్లీలో బీజేపీకి ఫ్లోర్‌ లీడర్‌ లేడా? అని నడ్డా అడిగారు. ఏ క్యా హై సాబ్‌ అన్నా. ఇంక అంతకంటే అధ్వాన్నం ఏముంటది?