Hyderabad | రెండు నెలలకో సిటీగా భాగ్యనగరం

సమీప భవిష్యత్తులో కాంగ్రెస్‌ నేతలను తెలంగాణ రాష్ట్ర రాజధాని పేరేమిటని అడిగితే.. హైదరాబాద్‌ అని కాకుండా న్యూయా ర్క్‌, లండన్‌, ఇండోర్‌ వంటి పేర్లు చెప్పే పరిస్థితి వస్తుందేమో? సీఎం రేవంత్‌రెడ్డి ప్రభత్వం వ్యవహారం చూస్తుంటే అలాగే కనిపిస్తున్నది.

• న్యూయార్క్‌, లండన్‌, ఇండోర్‌, సియోల్‌ చేస్తామన్న సీఎం
• గతంలో కేసీఆర్‌ విదేశీ నగరాలతో పోల్చితే కాంగ్రెస్‌ ఎద్దేవా
• ఇప్పుడు సగటున రెండు నెలలకో ‘సిటీ’ని ప్రకటిస్తున్న రేవంత్‌

Hyderabad | హైదరాబాద్‌, నవంబర్‌ 3 (నమస్తే తెలంగాణ): సమీప భవిష్యత్తులో కాంగ్రెస్‌ నేతలను తెలంగాణ రాష్ట్ర రాజధాని పేరేమిటని అడిగితే.. హైదరాబాద్‌ అని కాకుండా న్యూయా ర్క్‌, లండన్‌, ఇండోర్‌ వంటి పేర్లు చెప్పే పరిస్థితి వస్తుందేమో? సీఎం రేవంత్‌రెడ్డి ప్రభత్వం వ్యవహారం చూస్తుంటే అలాగే కనిపిస్తున్నది. పది నెలల కాలంలో ఇప్పటికే హైదరాబాద్‌ను ఐదారు నగరాలతో పోల్చేశారు. అంటే, హైదరాబాద్‌ దాదాపు రెండు నెలలకు ఒక సిటీగా మారిపోతుందన్నమాట. అంతేకాదు, తెలంగాణను కూడా ‘ఫ్యూచర్‌ స్టేట్‌’ అని మార్చేసిన ఘనత సీఎం రేవంత్‌రెడ్డి సొంతం. అమెరికా పర్యటనలో భాగంగా ఆగస్టు 9న రేవంత్‌ మాట్లాడుతూ ‘తెలంగాణను ఇకపై ఫ్యూచర్‌ స్టేట్‌ అని పిలుద్దాం’ అని సెలవిచ్చారు.

హైదరాబాద్‌ ఇప్పటివరకు ఎన్ని సిటీలుగా మారిందో చూద్దాం..

• రేవంత్‌రెడ్డి అధికారంలోకి వచ్చినప్పటి నుంచి ముచ్చర్ల ప్రాంతంలో ‘ఫోర్త్‌ సిటీ’ నిర్మిస్తామంటూ హడావుడి మొదలు పెట్టారు. హైదరాబాద్‌, సికింద్రాబాద్‌, సైబరాబాద్‌ తర్వాత నాలుగో నగరం అభివృద్ధి చేస్తామన్నారు. ఆ తర్వాత దాని పేరును ‘ఫ్యూచర్‌ సిటీ’గా మార్చారు.
• ఈ ఏడాది జనవరిలో లండన్‌లో పర్యటిస్తున్నప్పుడు ‘లండన్‌లోని థేమ్స్‌ నది తరహాలో మూసీని అభివృద్ధి చేస్తాం’ అని ప్రకటించారు.
• హైదరాబాద్‌ శివారులో ఉన్న రాచకొండలో ‘ఫిల్మ్‌ సిటీ’ని తీసుకొస్తామని ఈ ఏడాది జూలై 15న రేవంత్‌రెడ్డి ప్రకటించారు.
• ఆగస్టు 1న సీఎం మాట్లాడుతూ ‘నాలుగేండ్లలో న్యూయార్క్‌ కంటే అద్భుతంగా ఫ్యూచర్‌ సిటీని నిర్మిస్తాం’ అని చెప్పుకొచ్చారు.
• ఆగస్టు 2న మాట్లాడుతూ మీఆర్‌ ఆలం చెరువును లండన్‌ తరహాలో అభివృద్ధి చేస్తామన్నారు. ‘లండన్‌ ఐ టవర్‌’ తరహాలో ‘హైదరాబాద్‌ ఐ’ టవర్‌ను ఏర్పాటు చేస్తామన్నారు. నెలరోజుల్లో ప్రణాళికలు విడుదల చేస్తామని అసెంబ్లీ సాక్షిగా చెప్పారు. రెండున్నర నెలలు గడిచినా గప్‌చుప్‌గా ఉన్నారు.
• సెప్టెంబర్‌ 13న జీహెచ్‌ఎంసీపై సమీక్ష నిర్వహిస్తున్న సందర్భంలో ‘హైదరాబాద్‌ను ఇండోర్‌ తరహాలో క్లీన్‌ సిటీగా తీర్చిదిద్దుతాం’ అని సెలవిచ్చారు.
• ఇప్పుడు మంత్రులు దక్షిణ కొరియా రాజధాని సియోల్‌లో పర్యటిస్తున్న సంగతి తెలిసిందే. మూసీ ప్రాజెక్టును పూర్తి చేసి హైదరాబాద్‌ను సియోల్‌ తరహాలో అభివృద్ధి చేస్తామని ప్రభుత్వం చెప్తున్నది.
• ఆగస్టు 9న తెలంగాణకు ‘ఫ్యూచర్‌ స్టేట్‌’ అని ట్యాగ్‌లైన్‌ తగిలిస్తే, ఆగస్టు 15న ఓ కార్యక్రమంలో మాట్లాడుతూ గ్రామీణ తెలంగాణ పల్లెలను ఆసియాలోనే అత్యుత్తమ గ్రామాలుగా తీర్చిదిద్దుతామని ప్రకటించారు.

కేసీఆర్‌ వ్యాఖ్యలపై దుష్ప్రచారం

గతంలో కేసీఆర్‌ సీఎంగా ఉన్న సమయంలోనూ హైదరాబాద్‌ను అంతర్జాతీయ నగరాల స్థాయిలో ‘విశ్వ నగరం’గా అభివృద్ధి చేస్తామని ప్రకటించారు. ఈ క్రమంలో లండన్‌, న్యూయార్క్‌, ఇస్తాంబుల్‌ వంటి నగరాల పేర్లను ప్రస్తావించారు. వాటి తరహాలోనే హైదరాబాద్‌, కరీంనగర్‌ వంటి నగరాలను మార్చాలని లక్ష్యంగా పెట్టుకున్నట్టు చెప్పారు. ఈ వ్యాఖ్యలపై నాటి ప్రతిపక్ష కాంగ్రెస్‌, బీజేపీ నేతలు దుష్ప్రచారం చేశారు. వ్యంగ్య వ్యాఖ్యానాలతో విమర్శలు చేశారు. ఇప్పుడు సీఎం రేవంత్‌రెడ్డి అధికారంలోకి వచ్చిన తర్వాత పది నెలల్లోనే హైదరాబాద్‌ను లండన్‌, న్యూయార్క్‌, ఇండోర్‌, సియోల్‌గా మార్చేస్తామని చెప్పుకొచ్చారు. ఫిల్మ్‌సిటీ, ఫ్యూచర్‌ సిటీ, ఫ్యూచర్‌ స్టేట్‌ అంటూ సినిమా చూపెట్టారు. అంటే హైదరాబాద్‌ను సగటున ప్రతి రెండు నెలలకు ఒక సిటీగా మార్చేశారని విశ్లేషకులు విమర్శిస్తున్నారు.