బీర్ల ఐలయ్యపై అనర్హత వేటు.. ఆలేరు ఎమ్మెల్యేకు పొంచి ఉన్న పదవీగండం

ప్రభుత్వ విప్‌ బీర్ల ఐలయ్యపై అసెంబ్లీ ఎన్నికల సందర్భంగా దాఖలు చేసిన అఫిడవిట్‌లో తప్పుడు వివరాలు పేర్కొన్నందుకు అనర్హత వేటుపడే అవకాశాలు కనిపిస్తున్నాయి. ఉద్దేశపూర్వకంగా తప్పు చేయలేదని పేర్కొంటూ బీర్ల ఐలయ్య న్యాయవాది కోర్టులో అఫిడవిట్‌ దాఖలుచేశారు. దీనిపై ఫిర్యాదుదారుడు కూడా అఫిడవిట్‌ దాఖలు చేయడంతో కేసు విచారణ ఆసక్తికరంగా మారింది.

• తప్పుడు అఫిడవిట్‌ కేసులో బిగుస్తున్న ఉచ్చు
• నాంపల్లి ప్రజాప్రతినిధుల కోర్టులో 22న విచారణ

యాదాద్రి భువనగిరి, జూలై 3 (నమస్తే తెలంగాణ) : ప్రభుత్వ విప్‌ బీర్ల ఐలయ్యపై అసెంబ్లీ ఎన్నికల సందర్భంగా దాఖలు చేసిన అఫిడవిట్‌లో తప్పుడు వివరాలు పేర్కొన్నందుకు అనర్హత వేటుపడే అవకాశాలు కనిపిస్తున్నాయి. ఉద్దేశపూర్వకంగా తప్పు చేయలేదని పేర్కొంటూ బీర్ల ఐలయ్య న్యాయవాది కోర్టులో అఫిడవిట్‌ దాఖలుచేశారు. దీనిపై ఫిర్యాదుదారుడు కూడా అఫిడవిట్‌ దాఖలు చేయడంతో కేసు విచారణ ఆసక్తికరంగా మారింది. ఈ నెల 22న నాంపల్లిలోని ప్రజాప్రతినిధుల కోర్టులో విచారణ జరుగనుంది.

అసలు కథ ఇదీ

అసెంబ్లీ ఎన్నికల్లో ఆలేరు నియోజకవర్గం నుంచి కాంగ్రెస్‌ అభ్యర్థిగా పోటీ చేసిన బీర్ల ఐలయ్య తన నామినేషన్‌తోపాటు అఫిడవిట్‌ దాఖలు చేశారు. అయితే ఆ అఫిడవిట్‌లో తప్పుడు సమాచారం పొందుపరిచారని ఆరోపిస్తూ అదే నియోజకవర్గానికి చెందిన బొడుసు మహేశ్‌ అనే సామాజిక కార్యకర్త నిరుడు జూన్‌లో హైకోర్టులో రిట్‌ పిటిషన్‌ దాఖలు చేశారు. బీర్ల ఐలయ్యపై ఎన్నికల అఫిడవిట్‌లో పేర్కొన్న భూములు ఆయనకు చెందినవి కావని, పైగా తన భూములను దాచారని తెలిపారు. దీనిపై మూడు వారాల్లో నిర్ణయం తీసుకోవాలని రాష్ట్ర ఎన్నికల కమిషన్‌ను ఆదేశించిన హైకోర్టు.. ఆ తర్వాత ఫిర్యాదుదారుడు, ఐలయ్యకు నోటీసులు జారీచేసింది. అనంతరం కేసును ప్రజాప్రతినిధుల కోర్టులో తేల్చుకోవాలని సూచిస్తూ పిటిషన్‌ను డిస్మిస్‌ చేసింది.

లేని భూములు ఉన్నట్టు.. ఉన్న భూములు లేనట్టు

• ఫిర్యాదుదారుడు నాంపల్లి కోర్టుకు సమర్పించిన పత్రాల ప్రకారం.. యాదగిరిగుట్ట మండలంలోని సైదాపురం గ్రామంలో సర్వే నంబర్‌ 437/ఏ7లో 6గుంటల భూమి తనదని బీర్ల ఐలయ్య పేర్కొన్నారని, కానీ 2023 జూలై 27 నాటి
  డాక్యుమెంట్‌ ప్రకారం అది ఎస్‌ వెంకటేశ్వరరావుకు చెందినదిగా ఉన్నదని తెలిపారు.
• రాజాపేట మండలంలోని సాండ్లూరులో సర్వే నంబర్‌ 130/ఏలో 37 గుంటల భూమిని బీర్ల ఐలయ్య క్లెయిమ్‌ చేశారని, కానీ అది మద్దికుంట రమాదేవి పేరుపై ఉన్నదని పేర్కొన్నారు.
• భువనగిరి మండలంలోని చందుపట్లలో సర్వే నంబర్‌ 23/ఈలో ఎకరం, సర్వే నంబర్‌ 23/ఏ9లో 1.02 ఎకరాలు, సర్వే నంబర్‌ 25/ఈ2లో రెండు గుంటలు, సర్వే నంబర్‌ 25లో ఎకరం భూములు ఉన్నాయని చూపించారని, అయితే ఆ భూములు సుబ్బూరు మహేంద్రకు చెందినవిగా డాక్యుమెంట్లు స్పష్టం చేస్తున్నాయని పేర్కొన్నారు.
• భువనగిరి మండలం, చందుపట్లలోని సర్వే నంబర్‌ 18/ఏ/1లో ఎకరం 20గుంటలు బీర్ల ఐలయ్య భార్యకు చెందిన భూమి అయినప్పటికీ అఫిడవిట్‌లో ఆ విషయాన్ని వెల్లడించలేదని ఆరోపించారు.

ఉద్దేశపూర్వకంగా తప్పు చేయలేదు

బీర్ల ఐలయ్య తరఫు లాయర్‌ ఏప్రిల్‌ 24న నాంపల్లి కోర్టులో కౌంటర్‌ దాఖలు చేశారు. తన భార్య పేరు పెళ్లికి ముందు సుబ్బూరు మహేంద్ర అని, చందుపట్లలో బీర్ల అనిత పేరుపై ఎలాంటి భూములు లేవని ఐలయ్య స్పష్టం చేశారు. అయితే ఎన్నికల ప్రచారం సమయంలో హడావుడిగా అఫిడవిట్‌ తయారు చేశారని, అందుకే తప్పులు దొర్లాయని, టైపోగ్రాఫికల్‌ తప్పులు జరిగాయని, ఉద్దేశపూర్వకంగా చేసినవి కావని పేర్కొన్నారు. ఈ నెల 22న కేసుపై విచారణ జరుగనున్న నేపథ్యంలో ఫిర్యాదుదారుడు మహేశ్‌ మాట్లాడుతూ.. కోర్టులో తప్పకుండా తమకు న్యాయం జరుగుతుందని, కేసు నిరూపితమైతే ఐలయ్యకు ఆరు నెలల జైలు లేదా జరిమానా విధించే అవకాశం ఉంటుందని చెప్పారు. తప్పు జరిగిందని రూ.100 జరిమానా విధించినా.. ఆ వెంటనే బీర్లపై అనర్హత వేటు పడుతుందని, వచ్చే ఆరేండ్లపాటు ప్రత్యక్ష ఎన్నికల్లో పోటీకి ఆయనకు అవకాశం ఉండదని చెప్పారు.