బాబు ఓవరాక్షన్‌ వల్లే బనకచర్ల వివాదం.. తెలంగాణతో చర్చించాకే నిర్ణయం తీసుకోవాలి: సీపీఐ నేత నారాయణ

చంద్రబాబు ఓవరాక్షన్‌ వల్లే బనకచర్ల ప్రాజెక్టు వివాదాస్పదంగా మారిందని సీపీఐ జాతీయ కార్యదర్శి డాక్టర్‌ కే నారాయణ వ్యాఖ్యానించారు. ఏపీలోని కరువు ప్రాంతాల్లో పెండింగ్‌లో ఉన్న ప్రాజెక్టులను పూర్తిచేయకుండా, బనకచర్లను తెరపైకి తేవడమేమిటని ప్రశ్నించారు.

హైదరాబాద్‌, జూలై 11 (నమస్తే తెలంగాణ): చంద్రబాబు ఓవరాక్షన్‌ వల్లే బనకచర్ల ప్రాజెక్టు వివాదాస్పదంగా మారిందని సీపీఐ జాతీయ కార్యదర్శి డాక్టర్‌ కే నారాయణ వ్యాఖ్యానించారు. ఏపీలోని కరువు ప్రాంతాల్లో పెండింగ్‌లో ఉన్న ప్రాజెక్టులను పూర్తిచేయకుండా, బనకచర్లను తెరపైకి తేవడమేమిటని ప్రశ్నించారు. ముందు ఏపీలో పెండింగ్‌ ప్రాజెక్టులను పూర్తిచేయాలని, ఆ తర్వాతే తెలంగాణతో చర్చించి బనకచర్ల కట్టుకోవాలని సూచించారు.

శుక్రవారం ఆయన హైదరాబాద్‌లోని మఖ్ధూంభవన్‌లో మీడియాతో మాట్లాడుతూ.. ఈ ప్రాజెక్టుపై సరైన అవగాహన లేకుండానే చంద్రబాబు పోలవరం, బనకచర్లపై లింక్‌ పెట్టి మాట్లాడారని తప్పుబట్టారు. చంద్రబాబు మాట్లాడిన తీరు చూస్తే సహజంగానే తెలంగాణకు కోపం వస్తుందని చెప్పారు. రేవంత్‌రెడ్డి బనకచర్లపై ప్రశ్నిస్తే మూడోసారి చంద్రబాబు ప్రెస్‌మీట్‌ పెట్టారని గుర్తుచేశారు.