రాష్ట్ర డీజీపీగా శివధర్‌రెడ్డి.. ఉత్తర్వులు జారీ చేసిన ప్రభుత్వం

తెలంగాణ రాష్ట్ర నూతన డీజీపీగా శివధర్‌రెడ్డిని రాష్ట్ర ప్రభుత్వం నియమించింది. ఈ మేరకు శుక్రవారం ప్రభుత్వ ప్రధాన కార్యదర్శి కే రామకృష్ణారావు ఉత్తర్వులు జారీచేశారు. 1994 బ్యాచ్‌ ఐపీఎస్‌ అధికారి అయిన శివధర్‌రెడ్డి.. ప్రస్తుతం ఇంటెలిజెన్స్‌ చీఫ్‌గా కొనసాగుతున్నారు. అక్టోబర్‌ 1న రాష్ట్ర డీజీపీగా ఆయన బాధ్యతలు చేపట్టనున్నారు.

• ఆయన 1994 బ్యాచ్‌ అధికారి
• వివిధ హోదాల్లో ప్రత్యేక గుర్తింపు

హైదరాబాద్‌, సెప్టెంబర్‌ 26 (నమస్తే తెలంగాణ) : తెలంగాణ రాష్ట్ర నూతన డీజీపీగా శివధర్‌రెడ్డిని రాష్ట్ర ప్రభుత్వం నియమించింది. ఈ మేరకు శుక్రవారం ప్రభుత్వ ప్రధాన కార్యదర్శి కే రామకృష్ణారావు ఉత్తర్వులు జారీచేశారు. 1994 బ్యాచ్‌ ఐపీఎస్‌ అధికారి అయిన శివధర్‌రెడ్డి.. ప్రస్తుతం ఇంటెలిజెన్స్‌ చీఫ్‌గా కొనసాగుతున్నారు. అక్టోబర్‌ 1న రాష్ట్ర డీజీపీగా ఆయన బాధ్యతలు చేపట్టనున్నారు. శివధర్‌రెడ్డి వివిధ జిల్లాల ఎస్పీగా,  ఇతర హోదాల్లో పనిచేస్తూ ప్రత్యేక గుర్తింపును పొందారు. ఆయన అందించిన విశేష సేవలకు గాను పలు అవార్డులు అయనను వరించాయి. తెలంగాణలోని రంగారెడ్డి జిల్లాలోని తూలేకలాన్‌ ఆయన స్వగ్రామం. ఉస్మానియా యూనివర్సిటీలో ఎల్‌ఎల్‌బీ పూర్తిచేసిన శివధర్‌రెడ్డి.. కొంతకాలం అడ్వకేట్‌గా ప్రాక్టీస్‌ కూడా చేశారు. 1994లో సివిల్‌ సర్వీసెస్‌ సాధించి ఇండియన్‌ పోలీస్‌ సర్వీస్‌లోకి ప్రవేశం పొందారు.

శివధర్‌రెడ్డి ప్రొఫైల్‌

• శివధర్‌రెడ్డి స్వస్థలం రంగారెడ్డి జిల్లా ఇబ్రహీంపట్నం మండలం తూలేకలాన్‌ (పెద్దతుండ్ల) గ్రామం
• హైదరాబాద్‌ నగర పరిధిలోనే ప్రాథమిక, ఉన్నత విద్యాభ్యాసం
• ఉస్మానియా యూనివర్సిటీ నుంచి ఎల్‌ఎల్‌బీ పూర్తి.. కొంతకాలం అడ్వకేట్‌గా ప్రాక్టీస్‌
• 1994లో సివిల్‌ సర్వీసెస్‌ ఉద్యోగం సాధించి ఇండియన్‌ పోలీస్‌ సర్వీస్‌లోకి ప్రవేశం
• 2014-16 వరకు రాష్ర్టానికి మొదటి ఇంటెలిజెన్స్‌ చీఫ్‌గా బాధ్యతలు
• 2016లో నయీం ఎన్‌కౌంటర్‌ ఆపరేషన్‌ ప్లాన్‌
• గ్రేహౌండ్స్‌ స్కాడ్రన్‌ కమాండర్‌గా విధులు
• బెల్లంపల్లి, ఆదిలాబాద్‌, నల్లగొండ, శ్రీకాకుళం, నెల్లూరు, గుంటూరు జిల్లాల ఎస్పీగా సేవలు
• జిల్లాల ఎస్పీగా, డీఐజీ (ఎస్‌ఐబీ)గా మావోయిస్టుల అణచివేతలో శివధర్‌రెడ్డి కీలక పాత్ర
• 2007లో మక్కా మసీదు బాంబు పేలుళ్లు, పోలీసు కాల్పుల్లో 14 మంది మృతి తర్వాత హైదరాబాద్‌ సౌత్‌ జోన్‌ డీసీపీగా శివధర్‌రెడ్డిని నియామకం
• అత్యంత ఉద్రిక్త పరిస్థితుల్లో శాంతిభధ్రతలను సమర్థంగా నిర్వహించడంలో కీలక పాత్ర
• 2023లో కాంగ్రెస్‌ ప్రభుత్వం వచ్చాక ఇంటెలిజెన్స్‌ చీఫ్‌గా నియామకం
• గ్యాలంట్రీ మెడల్‌, పోలీస్‌ మెడల్‌, ప్రెసిడెంట్‌ మెడల్‌, ఐక్యరాజ్యసమితి మెడల్‌ సహా అనేక అవార్డులు