భాగహారం చేయలేరు కూడికలు, తీసివేతలు రావు

సర్కార్‌ బడుల్లోని విద్యార్థులు కనీస సామర్థ్యాలను సాధించలేకపోతున్నారు. తరగతికి తగిన అభ్యసన సామర్థ్యాలను అందిపుచ్చుకోలేకపోతున్నారు. ఐదో తరగతి విద్యార్థుల్లో 66% మంది లెక్కల్లో భాగాహారం చేయలేకపోతున్నారు. ఇక గుణకారం చేయగలిగిన వారు కేవలం 40% మాత్రమే.

• అనర్గళంగా చదవలేరు.. సరిగ్గా రాయలేరు
• సర్కార్‌ బడుల్లో మెరుగుపడని విద్యార్థుల అభ్యసన సామర్థ్యాలు
• బేస్‌లైన్‌ టెస్ట్‌ నివేదికలో వెల్లడైన వాస్తవాలు

హైదరాబాద్‌, జనవరి 26 (నమస్తే తెలంగాణ) : సర్కార్‌ బడుల్లోని విద్యార్థులు కనీస సామర్థ్యాలను సాధించలేకపోతున్నారు. తరగతికి తగిన అభ్యసన సామర్థ్యాలను అందిపుచ్చుకోలేకపోతున్నారు. ఐదో తరగతి విద్యార్థుల్లో 66% మంది లెక్కల్లో భాగాహారం చేయలేకపోతున్నారు. ఇక గుణకారం చేయగలిగిన వారు కేవలం 40% మాత్రమే. నాలుగో తరగతిలో భాగహారం చేసే సామర్థ్యాలున్నది కేవలం 19.2% మందికి మాత్రమే. గుణకారం చేయగలిగే వారు 35.6శాతమే. నాలుగో తరగతిలో ఇంగ్లిష్‌లో మౌఖిక పఠన పటిమ గల వారు 51% మాత్రమే. ఒకటో తరగతి నుంచి ఐదో తరగతి వరకు గల విద్యార్థులకు తెలుగు, ఉర్దూ, ఇంగ్లిష్‌, గణితం సబ్జెక్టుల్లో సామర్థ్యాలపై బేస్‌లైన్‌ టెస్టు నిర్వహించారు.

2025 నవంబర్‌25 నుంచి 30 వరకు ఈ బేస్‌లైన్‌ టెస్ట్‌ నిర్వహించారు. 96% విద్యార్థుల అభ్యసన సామర్థ్యాలను పరీక్షించారు. ఈ బేస్‌లైన్‌ టెస్ట్‌ ఆధారంగా అధికారులు ఓ నివేదిక రూపొందించారు. ఆయా నివేదికను పరిశీలిస్తే.. సర్కార్‌ బడుల్లోని విద్యార్థుల్లో సామర్థ్యాలు పూర్తిగా మెరుగుపడలేదనిపిస్తున్నది. విద్యార్థుల్లో అభ్యసన సామర్థ్యాల పెంపునకు ఫౌండేషన్‌ లిటరసీ అండ్‌ న్యూమరసీ-ఎఫ్‌ఎల్‌ఎన్‌ కార్యక్రమాన్ని నిర్వహిస్తున్నారు. మరింత సమర్థవంతంగా ఈ కార్యక్రమాన్ని అమలుచేయడానికి ఎఫ్‌ఎల్‌ఎన్‌ సెల్‌ను సైతం ఏర్పాటు చేశారు. మొదట బేస్‌లైన్‌ టెస్టు నిర్వహించగా, అందులోనూ ఆశాజనక ఫలితాలేం రాలేదు.

మిడ్‌లైన్‌ టెస్ట్‌ ఫలితాలిలా..

• ఐదో తరగతి విద్యార్థుల్లో తెలుగు, ఉర్దూ భాషల్లో మౌఖిక పఠన పటిమ గల వారు 53% మాత్రమే. అంటే 47% సరిగ్గా చదవలేకపోతున్నారన్న మాట. ఈ రెండు భాషల్లో రాయలేని వారి శాతం 65శాతంగా ఉన్నట్టు ఈ పరీక్షలో తేలింది.
• 5వ తరగతిలో ఇంగ్లిష్‌ మౌఖిక పఠన పటిమ గల వారు 54.5%.. అంటే 45% మంది విద్యార్థులు మౌఖిక పఠన పటిమ లేక సతమతమవుతున్నారు. ఇంగ్లిష్‌లో రాయగలిగే వారు కేవలం 28% మాత్రమే. అంటే 82% మంది రాయలేకపోతున్నారన్నమాట.
• గణితంలో భాగహారం చేయగలిగే వారి శాతం కేవలం 24 మాత్రమే. అంటే 76% మంది భాగహారం చేయలేని స్థితిలో ఉన్నారు. గుణకారం చేయలేని వారు 60% ఉంటే, తీసివేతలు చేసే వారు 61శాతమే.
• రెండో తరగతిలో తెలుగు, ఉర్దూ భాషలను చదవగలిగే వారు 54% మాత్రమే. అంటే 46% మంది ఇంకా ఈ రెండు భాషలను చదవలేకపోతున్నారు. ఈ రెండు భాషల్లో రాయగలిగే వారు కేవలం 30శాతమే.
• తెలుగు, ఉర్దూ భాషల్లో మౌఖిక పఠన పటిమ గల వారు కేవలం 28.6% మాత్రమే. అంటే 72% మంది మౌఖిక పఠనం చేయలేక సతమతమవుతున్నారు.
• రెండో తరగతిలో ఇంగ్లిష్‌ను చదివేవారు కేవలం 50% కాగా, మౌఖిక పఠన పటిమ గల వారు కేవలం 27%, రాయగలిగే వారు 35.6% మాత్రమే. గణితంలో సంఖ్యలను గుర్తించేవారు 70.4% కాగా, కూడికలు చేయగలిగే వారు 43.2%. తీసివేతలు చేయగలిగే సామర్థ్యాలు గల వారు కేవలం 21.1% మాత్రమే. అంటే 79% తీసివేతలు రాని పరిస్థితిలో విద్యార్థులు ఉన్నారు.
• మూడో తరగతిలో భాగహారం చేయగలిగే వారు కేవలం 11.7% మాత్రమే. అంటే 89% మంది భాగహారం చేయలేకపోతున్నారు. గుణకారం చేయగలిగే వారు 27.4% మాత్రమేని మిడ్‌లైన్‌ టెస్ట్‌లో తేలింది.