Rs.1 Lakh aid for BCs | ఈ నెల 20 వరకు బీసీలకు లక్ష సాయం దరఖాస్తులు.. ఇవీ మార్గదర్శకాలు

Rs.1 Lakh aid for BCs | వెనుకబడిన వర్గాల కుల, చేతివృత్తిదారులకు ప్రభుత్వం రూ.లక్ష ఆర్థికసాయం అందించాలని నిర్ణయించిన సంగతి తెలిసిందే. అందుకు సంబంధించి అర్హుల నుంచి దరఖాస్తుల స్వీకరణ ప్రక్రియ మంగళవారం (6వ తేదీ) నుంచి ప్రారంభమైంది. ఈ నెల 20వ తేదీ వరకు ఈ ప్రక్రియ కొనసాగనున్నది.

• జూలై 26 వరకు క్షేత్రస్థాయి పరిశీలన
• 9న మంచిర్యాలలో సీఎం కేసీఆర్‌ చేతుల మీదుగా పలువురికి అందజేత
• పనిముట్ల కొనుగోలుకు సర్కారు చేయూత

Rs.1 Lakh aid for BCs | హైదరాబాద్‌, జూన్‌ 6 (నమస్తే తెలంగాణ): వెనుకబడిన వర్గాల కుల, చేతివృత్తిదారులకు ప్రభుత్వం రూ.లక్ష ఆర్థికసాయం అందించాలని నిర్ణయించిన సంగతి తెలిసిందే. అందుకు సంబంధించి అర్హుల నుంచి దరఖాస్తుల స్వీకరణ ప్రక్రియ మంగళవారం (6వ తేదీ) నుంచి ప్రారంభమైంది. ఈ నెల 20వ తేదీ వరకు ఈ ప్రక్రియ కొనసాగనున్నది. ఈ నెల 9న మంచిర్యాల జిల్లాలో సీఎం కేసీఆర్‌ చేతుల మీదుగా లాంఛనంగా లబ్ధిదారులకు సాయం అందించడంతోపాటు అదేరోజు అన్ని నియోజకవర్గాల్లో గౌరవ మంత్రులు, ఎమ్మెల్యేలతో పథకాన్ని ప్రారంభించనున్నారు.

వెబ్‌సైట్‌ ప్రారంభం..

రూ.లక్ష ఆర్థిక సాయం అందించేందుకు అర్హుల నుంచి దరఖాస్తుల స్వీకరణ కోసం రూపొందించిన https://tsobmmsbc.cgg.gov.in వెబ్‌సైట్‌ను డాక్టర్‌ బీఆర్‌ అంబేద్కర్‌ తెలంగాణ రాష్ట్ర సచివాలయంలో బీసీ సంక్షేమశాఖ మంత్రి గంగుల కమలాకర్‌ మంగళవారం ప్రారంభించారు. దరఖాస్తుల స్వీకరణ ప్రక్రియను కూడా ఆరంభించారు. ఈ సందర్భంగా మంత్రి గంగుల మాట్లాడుతూ, బీసీ కులవృత్తులు నిర్వహించుకొనే చేతివృత్తిదారులకు రూ. లక్ష ఆర్థిక సహాయం అందించి, ప్రభుత్వం అండగా నిలువనున్నదని చెప్పారు. ఈ నెల 20వ తేదీ వరకు దరఖాస్తుల ప్రక్రియ కొనసాగుతుందని స్పష్టం చేశారు.

తెలంగాణ దశాబ్ది ఉత్సవాల్లో భాగంగా ఈ నెల 9న సీఎం కేసీఆర్‌ చేతుల మీదుగా మంచిర్యాలలో పలువురు లబ్ధిదారులకు ఆర్థిక సాయం అందించనున్నట్టు చెప్పారు. లబ్ధిదారులు వృత్తి పనిముట్లు, ముడిసరుకు కొనుగోలు చేసేందుకు ఈ నిధులు ఎంతగానో ఉపయోగపడతాయని తెలిపారు. గత క్యాబినెట్‌ సమావేశంలో తీసుకొన్న నిర్ణయం మేరకు క్యాబినెట్‌ సబ్‌ కమిటీ వెనుకబడిన వర్గాల కులవృత్తిదారులకు లక్ష ఆర్థిక సహాయం అందించేందుకు విధివిధానాలను ఇప్పటికే ఖరారు చేసిందని వెల్లడించారు. అర్హులు ఈ అవకాశాన్ని సద్వినియోగం చేసుకోవాలని కోరారు. బీసీ సంక్షేమ శాఖ ముఖ్య కార్యదర్శి బుర్రా వెంకటేశం, బీసీ కార్పొరేషన్‌ ఎండీ మల్లయ్యభట్టు, ఇతర ఉన్నతాధికారులు పాల్గొన్నారు.

మార్గదర్శకాలు ఇవీ..

• బీసీ కులవృత్తిదారులు, చేతివృత్తిదారులు అర్హులు.
• పనిముట్ల కొనుగోలు, ఆధునీకరణ లేదా ముడిసరుకు కొనుగోలుకు మాత్రమే ఆర్థిక సాయం అందిస్తారు.
• అభ్యర్థుల వయస్సు జూన్‌ 2 నాటికి 18 -55 ఏండ్లు ఉండాలి.
• వార్షిక ఆదాయం గ్రామీణ ప్రాంతాల్లో 1.50 లక్షలు, పట్టణ ప్రాంతాల్లో రూ.2 లక్షలకు మించకూడదు.
• కుటుంబంలో ఒక్కరికి మాత్రమే వృత్తుల అభ్యున్నతికి ఆర్థిక సాయం అందిస్తారు.
• దరఖాస్తు తేదీ నుంచి గత 5 ఏండ్లలో ఏ ప్రభుత్వ శాఖ ద్వారా కూడా లబ్ధిపొందినవారు, 2017-18లో రూ.50 వేల ఆర్థిక సాయం పొందిన వారు అనర్హులు.

ఎంపిక ప్రక్రియ ఇది..

• జూన్‌ 20 తేదీ వరకు https://tsobmmsbc. cgg.gov.in వెబ్‌సైట్‌లో అభ్యర్థులు దరఖాస్తు చేసుకోవాలి.
• రేషన్‌కార్డు, కుల, ఆదాయం ధ్రువీకరణ పత్రాలు, ఆధార్‌కార్డు, బ్యాంక్‌ పాస్‌బుక్‌, పాస్‌పోర్ట్‌ సైజ్‌ ఫొటోను దరఖాస్తుతో సమర్పించాలి.
• జూన్‌ 20 నుంచి జూన్‌ 26వ తేదీ వరకు మండలస్థాయిలో ఎంపీడీవోలు, మున్సిపాలిటీల్లో మున్సిపల్‌ కమిషనర్లు క్షేత్రస్థాయిలో పర్యటించి దరఖాస్తుదారుల వివరాలను పరిశీలిస్తారు.
• జిల్లా కలెక్టర్‌ అధ్యక్షతన ఏర్పాటైన కమిటీకి నివేదిస్తారు.
• ఆ కమిటీ అర్హులను గుర్తించి జాబితాను సిద్ధం చేసి జూన్‌ 27వ తేదీలోగా జిల్లా ఇన్‌చార్జి మంత్రి ఆమోదం తీసుకోవాల్సి ఉంటుంది.
• రూ.లక్ష ఆర్థిక సాయం కోసం ఎంపికైన లబ్ధిదారుల జాబితాను ఆన్‌లైన్‌లో ప్రకటిస్తారు.
• ఆ తర్వాత లబ్ధిదారుడి బ్యాంకు ఖాతాకు నేరుగా రూ.లక్ష ఆర్థిక సాయాన్ని ప్రభుత్వం మంజూరు చేస్తుంది.
• ఆర్థికసాయం పొందిన నెలలోగా ఆ నిధులతో పనిముట్లు, ముడిసరుకును లబ్ధిదారులు కొనుగోలు చేయాల్సి ఉంటుంది.
• ఎంపీడీవోలు క్షేత్రస్థాయిలో యూనిట్ల గ్రౌండింగ్‌ను పర్యవేక్షిస్తారు.