AI | ఓ కార్మికుడు… పరిశ్రమలో పనిచేస్తున్నాడు. ఇంతలో ఉన్నతాధికారి వచ్చాడు. తన పక్కన ఉన్న వ్యక్తిని ఉద్యోగం నుంచి తొలగిస్తున్నట్టుగా ఉత్తరం అందించాడు. తొలగించిన వ్యక్తి స్థానంలో, ఓ రోబోను తీసుకువచ్చి నిలబెట్టారు. కాసేపటికి మళ్లీ ఉన్నతాధికారి వచ్చాడు. ఈసారి రెండోవైపు ఉన్న వ్యక్తిని ఉద్యోగం నుంచి తొలగిస్తూ, అతని స్థానంలోనూ రోబోను తెచ్చారు. తన పరిస్థితి ఏమిటా అని కంగారుపడుతున్న కార్మికుడికి అడుగుల చప్పుడు వినిపించింది. ఈసారి వచ్చింది ఉన్నతాధికారి కాదు. తన స్థానంలోనే ఓ రోబో ఉత్తర్వులు తీసుకువచ్చింది. కొన్నాళ్ల క్రితం, ఈ దృశ్యం నవ్వు కలిగించేదేమో! ఇప్పుడు మాత్రం మన భవిష్యత్తును గుర్తు చేసి భయపెడుతున్నది. పరిశ్రమలు, కార్యాలయాలు, దుకాణాలు… అన్నిటిలోనూ ఉద్యోగుల బదులు కృత్రిమ మేధస్సే రాజ్యమేలబోతున్నదనే ఆలోచన, కార్యాచరణ కాస్త అభద్రత కలిగించేదే! నిజంగానే కృత్రిమ మేధ (ఆర్టిఫీషియల్ ఇంటెలిజెన్స్- ఏఐ) మన ఉద్యోగ వ్యవస్థను అతలాకుతలం చేయబోతున్నదా! ఉద్యోగాల సంగతి పక్కన పెడితే… అసలు మానవాళినే తన గుప్పిట్లోకి తీసుకోబోతున్నదా…!!
స్టీఫెన్ హాకింగ్స్ పేరు వినని వారు ఉండకపోవచ్చు. తనువు తన మాట వినకున్నా, మెదడుతో విజ్ఞానరంగాన్ని జయించినవాడు. ఐన్స్టీన్ తర్వాత అంతటి గౌరవాన్ని అందుకున్న శాస్త్రవేత్త. విశ్వం గురించి తను చేసిన సిద్ధాంతాలన్నీ సంచలనాలే. అలాంటి వ్యక్తి ఇప్పటికి పదేండ్ల క్రితమే కృత్రిమ మేధ గురించి కుండబద్దలు కొట్టేశాడు. కృత్రిమ మేధతో మానవజాతే అంతరించి పోయే ప్రమాదం ఉందన్నారు హాకింగ్. తనను తాను మెరుగుపరుచుకుంటూ, తన జ్ఞానం పెంచుకుంటూ… మనుషుల్ని దాటిపోయే దశకు చేరుకుంటుందని చెప్పారు. కృత్రిమ మేధ చాలా వేగంగా అభివృద్ధి చెందుతుందనీ, అది స్వతంత్రంగా వ్యవహరించే రోజు త్వరలోనే వస్తుందనీ విశ్లేషించారు. AI అన్న పదం చాలా కొద్దిమందికే పరిచయమైన ఆ రోజుల్లో హాకింగ్ మాటల్ని ఊహలుగా కొట్టిపారేశారు. కానీ, మెలకువలోనూ పీడకలలు వెంబడించే రోజులు వచ్చాయి. అందుకే ఈమధ్య ఎలన్ మస్క్ చెప్పిన మాటల్ని అందరూ శ్రద్ధగా ఆలకించారు. రాబోయే రోజుల్లో అన్ని ఉత్పత్తులు, సేవలను కృత్రిమ మేధే అందిస్తుందని ఆయన చెబుతున్నారు. ఉద్యోగం చేయాల్సిన పని, అవసరం ఎవరికీ ఉండకపోవచ్చనీ… ఉద్యోగం చేయడం అనేది ఓ వ్యాపకంగా భావించే రోజులు వచ్చేస్తున్నాయని ఆయన ఊహించారు. ఇప్పుడిక చర్చ ఊపందుకుంది!
కృత్రిమ మేధ ఈ రోజున బలం పుంజుకుని ఉండవచ్చు. అలాగని అది ఇప్పటికిప్పుడు జరిగిన ఆవిష్కరణ కాదు. 1936లో అలెన్ ట్యూరింగ్ రూపొందించిన ట్యూరింగ్ మెషిన్, కొంతవరకు స్వతంత్రంగా విశ్లేషించగలిగే తొలి పరికరంగా గుర్తిస్తారు. ట్యూరింగ్ సిద్ధాంతాలు అటు కంప్యూటర్లకూ, ఇటు కృత్రిమ మేధకు కూడా ఎంతో బలాన్నిచ్చాయి. మనుషులతో ఆటలాడే యంత్రాలుగా మొదలై, కర్మాగారాల్లో పనిచేసే వరకు రోబోలు ఎదిగాయి. 1961లోనే అమెరికాలోని జనరల్ మోటార్స్ అనే కార్ల కంపెనీ ఓ రోబోను నియమించింది. కానీ, ఇవన్నీ మినహాయింపులుగానే ఉండేవి. కృత్రిమ మేధకు ఉండే పరిమితులు, ఖర్చులు, నిర్వహణ భారం వల్ల… రోజువారీ జీవితంలో దాని ప్రాధాన్యం తక్కువగానే ఉండేది. ఒకవేళ పెద్దపెద్ద కంపెనీలు కృత్రిమ మేధను వినియోగించినా… వినియోగదారుల తీరును అంచనా వేసే అనలిటిక్స్ లాంటి విభాగాలలోనే వాటిని ఉపయోగించేవి. ఇందుకు మెటా (ఫేస్బుక్)ను ఉదాహరణగా చెప్పుకోవచ్చు. ఓ వ్యక్తికి ఏ కంటెంట్ ఇష్టంలాంటి సాధారణ విషయాల దగ్గర నుంచీ, తన అభిప్రాయాలను ప్రభావితం చేసేలా పోస్టులను ఎక్కుపెట్టడం వరకు మెటా చాలా దూరమే వెళ్లింది. కొన్ని సందర్భాలలో విమర్శల పాలైంది కూడా! కానీ ఎప్పుడైతే చాట్ జీపీటీ వార్తల్లోకి వచ్చిందో, అప్పుడిక AI రోజువారీ జీవితంలోకి వచ్చేసినట్టు అర్థమైంది.
‘ఆర్టిపీషియల్ ఇంటెలిజెన్స్ ఉద్యోగ రంగం మీద ఓ సునామీలా విరుచుకు పడబోతున్నది. దానివల్ల అభివృద్ధి చెందిన దేశాల్లో 60 శాతం ఉద్యోగాలు, ప్రపంచవ్యాప్తంగా 40 శాతం ఉద్యోగాలు కనుమరుగయ్యే ప్రమాదం ఉంది’ ఈ మాటలు అన్నది ఎవరో కాదు. అంతర్జాతీయ ద్రవ్యనిధి (IMF) ఛీఫ్ క్రిస్టలీనా! కొన్ని రంగాలలో అయితే కృత్రిమ మేధ ఆధిపత్యం చాలా ఎక్కువగా ఉండే అవకాశం కనిపిస్తున్నది. AI మన ఉద్యోగాన్ని హరిస్తుందేమో అన్న భయానికి AI-nxiety అని పేరు కూడా పెట్టేశారు. ముఖ్యంగా వైట్కాలర్ జాబ్స్… అంటే శారీరక శ్రమతో కాకుండా నైపుణ్యంతో సాగే ఉద్యోగాల మీద ఇది ప్రభావం చూపనుంది.
కాల్ సెంటర్స్: వినియోగదారులతో సంభాషించేందుకు ఇప్పటికే చాట్ బోట్లు అందుబాటులోకి వచ్చేశాయి. వీటి ఉధృతి ఎక్కువ కానుంది. కాల్ సెంటర్ ఎగ్జిక్యూటివ్ అవసరమే లేకుండా, సమస్యను పరిష్కరించే రోజులు కూడా రావచ్చు. అందుకే కృత్రిమ మేధ వల్ల ఎక్కువ నష్టపోయేది కాల్ సెంటర్ ఉద్యోగులే అంటూ సాక్షాత్తు టీసీఎస్ చీఫ్ ఎగ్జిక్యూటివ్ కృతివాసన్ పేర్కొన్నారు. కాల్ సెంటర్ అనగానే గుర్తొచ్చే భారతీయ ఉపాధి రంగానికి ఇది చేదుమాటే!
కంప్యూటర్ ఇంజినీర్: కోడింగ్… చాట్ జీపీటీతో సాధ్యమే. ఇప్పటికే దాన్ని కోడింగ్ కోసం విస్తృతంగా వినియోగిస్తున్నారు కూడా. ప్రోగ్రామింగ్ కూడా సాధ్యమే. అంతేనా! ఇప్పటివరకూ ఓ నిపుణుడి సాయం ఉండాలని భావించే టెస్టింగ్, నెట్వర్కింగ్ లాంటి పనులన్నీ కృత్రిమ మేధ అలవోకగా చేస్తున్నది. సైబర్ సెక్యూరిటీ, డేటా అనాలసిస్ లాంటి పనులు కానిచ్చేస్తున్నది. రాబోయే రోజుల్లో ఓ ప్రాజెక్టును నిర్వహించడం దగ్గర నుంచి, కొత్తగా ఉద్యోగంలోకి చేరేవారికి శిక్షణ ఇవ్వడం వరకూ అన్నీ AI తో సాధ్యం కానున్నాయి.
మీడియా: పాయల్ కపాడియా అనే దర్శకురాలు కేన్స్లో ఓ ప్రతిష్ఠాత్మక బహుమతి గెలుచుకుంది. తన గురించి ఓ వ్యాసం రాయాలి. ఎలాగా! చాట్ జీపీటీ లాంటి టూల్స్ చేసేస్తాయి. ఓ వ్యాసం నుంచి సినిమా కథ వరకు కావాల్సిన శైలిలో, కోరుకున్న నిడివితో కంటెంట్ అందిస్తున్నాయి ఈ AI టూల్స్. హృద్యమైన సంగీతం నుంచి పూర్తిస్థాయి సినిమా వరకు కృత్రిమ మేధతో అన్నీ సాధ్యమే. ఇప్పటికే కొన్ని మీడియా సంస్థలు, కంటెంట్ కోసం చాట్ జీపీటీ మీద ఆధారపడుతున్నాయి. ఉద్యోగులను పక్కన పెడుతున్నాయి.
విద్య: కొవిడ్ తర్వాత చదువు నేర్పడంలో, నేర్చుకోవడంలో అనూహ్యమైన మార్పులు వచ్చాయి. చదువు అంటే టీచర్లు, తరగతి గదులే ఉండనక్కర్లేదు అనే అభిప్రాయాన్ని కలిగించింది లాక్డౌన్. దీన్ని కృత్రిమ మేధ బలపరుస్తున్నది. పిల్లలు తమకు కావాల్సిన జ్ఞానాన్ని కృత్రిమమేధతో పొందవచ్చు, అనుమానాలను సరిదిద్దుకోవచ్చు. ఇప్పటికే అందుకు తగిన యాప్స్, రోబోలు అడుగుపెట్టేశాయి.
వైద్యం: ఇప్పటికే ఆపరేషన్లలో రోబోల ప్రాధాన్యం పెరుగుతున్నది. వాటికి కృత్రిమ మేధ కూడా తోడైతే! ఓ వ్యక్తి శరీరతత్వం ఏమిటి, తనకు వచ్చిన సమస్య ఏమిటి, దానికి ఎలాంటి ప్రత్యామ్నాయాలు ఉన్నాయి, ఏ మందులు వాడితే మెరుగైన ఫలితం వస్తుంది లాంటి విషయాలన్నీ రోగిని పరీక్షించి AI నిర్ధారించేయగలదు.
వారసత్వ వృత్తులు: దర్జీ పని, క్షవరం, ఆభరణాల తయారీ, చేనేత… లాంటి వృత్తులు ఇప్పటికీ కొన్ని కుటుంబాలకు తరాల నుంచి ఉపాధిగా వస్తున్నాయి. కొందరు వాటిని వీడుతున్నారు. కొత్తవారూ చేరుతున్నారు. కానీ AI తో అవి మాయమైపోతే! ఉదాహరణకు ఓ యంత్రం ముందు నిలబడగానే, అదే మన కొలతలు తీసుకుని… మనకు నప్పే చొక్కాను క్షణాల్లో తక్కువ ధరకు అందించగలిగితే వినియోగదారుల మొగ్గు మారిపోదా!
కృత్రిమ మేధతో కుదుపులకు లోనయ్యే ఇలాంటి ఉపాధుల జాబితా పెద్దదే. అది పూర్తిగా ఓ వృత్తిని నిర్వీర్యం చేయకపోవచ్చు. కానీ, నలుగురు చేసే పనిని ఒకరికి తగ్గించవచ్చు. ఉదాహరణకు ఓ పెద్ద లాయరు తను అందిపుచ్చుకున్న కేసును పలుకోణాల నుంచి చూసేందుకు జూనియర్ లాయర్ల అవసరం ఉంటుంది. పాత కేసులు తవ్వుతూ, వాటిలో తీర్పులను విశ్లేషిస్తూ, జడ్జి దేనికి ఎలా స్పందిస్తారో అంచనా వేస్తూ… ఆ జట్టు ఉపయోగపడుతుంది. ఇదంతా AI చేసేస్తే!
వేగంలోనూ, గుర్తుపెట్టుకోవడంలోనూ కృత్రిమ మేధ మనకంటే చాలా మెరుగ్గా ఉండవచ్చు. కానీ ఎంతైనా అదీ యంత్రమే! దానికీ పరిమితులు ఉన్నాయి.
కృత్రిమ మేధతో కొన్ని పనులు సులువుగా అయిపోతున్నాయి. లాభాల గురించే కంపెనీలు సహజంగానే, మనుషుల కంటే కృత్రిమ మేధకే మొగ్గు చూపుతున్నాయి. కొన్ని లక్షల ఉద్యోగాలు హరించుకుపోతున్నాయి. ఆ మార్పును మనం ఆపలేం. ఎదిరిస్తూ ఉంటే పుణ్యకాలం చేజారిపోతుంది. అందుకే దాన్ని మనకు అనుకూలంగా మార్చుకోవడం ఎలా, మన ఉపాధికి గండి పడకుండా చూసుకోవడం ఎలా అన్నదే మన ప్రాధాన్యంగా ఉండాలి.
AI టూల్స్ని ఎలా ఉపయోగించుకోవడం, వాటికి prompts ఇవ్వడం ఎలా అన్నది ఇప్పుడు రాజ్యమేలుతున్న కళ. కృత్రిమ మేధ ఎలా పనిచేస్తుంది, దాన్ని ఎలా ఉపయోగించుకోవాలి అన్న అంశాల మీద స్పష్టత లేని ఈ సమయంలో… వాటిలో నిపుణులకు కొద్దికాలం మంచి మార్కెట్ ఉండబోతున్నది.
కృత్రిమ మేధను ఉపాధిగా మార్చుకునే అవకాశాలు బోలెడు. ఉదాహరణకు ఓ ట్రెండింగ్ టాపిక్ మీద కంటెంట్ రాసి, దానికి స్వరాన్ని అందించి, వీడియోగా రూపొందించడం వరకూ అన్నీ AI ద్వారా సాధ్యమే! మనం అంతగా నిష్ణాతులు కాని రంగాల్లో AI సాయంతో అద్భుతాలు చేయవచ్చు.
చాలామంది ఓ రంగంలోకి అడుగుపెట్టాక, ఇక తమ నేర్పును మెరుగుపరుచుకోరు. కొత్త నైపుణ్యాలను అలవర్చుకోరు. ఈ Upskilling, Reskilling లేకపోతే, కత్తివాదర పదునున్నా నేటి కెరీర్లో ప్రయాణం కష్టమైపోతుంది. ఏ కొత్త మార్పును తట్టుకోలేం. ఉద్యోగం చేజారితే, మరో అవకాశాన్ని అందుకోలేం.
అయితే ఇంజినీరింగ్ లేదా డాక్టర్! అయితే అకౌంటెంట్ లేదా ఏంబీఏ… కొన్ని దశాబ్దాల తరబడి కెరీర్ కోసం ఏదో ఒక ట్రెండ్ అనుసరిస్తూ ఉంటాం. కాలం వేగంగా మారిపోతున్న ఈ సమయంలో ఎప్పటికప్పుడు అవసరాలను గమనించుకోవాలి. ఉపాధి రంగం ఓ మార్కెట్… మన దగ్గర ఏముందో అది వాకబు చేయదు. దానికి ఏం కావాలో మనమే అందించే ప్రయత్నం చేయాలి. గిరాకీ మన చేతిలో ఉండాలి. బేల చూపులు చూస్తే కార్పొరేట్ రంగం జాలిపడదు.
కఠోరమైనా ఓ విషయాన్ని గుర్తుంచుకోవాలి. రాబోయే రోజుల్లో శరీర శ్రమకు డిమాండ్ పెరిగిపోతుంది. శరీరాలు సుతారంగా మారిపోయి, మెదడు సాంకేతికతతో మొద్దుబారిపోయి ఉంటే… వచ్చే నాలుగు రూపాయలూ పనివాళ్లకే ఇచ్చుకోవాలి. మనకు ఏ పనీ లేకపోతే శరీర శ్రమ చేసి సంపాదించే అవకాశమూ ఉండదు.
డెవ్లిన్ డొనాల్డ్సన్ అనే వ్యక్తి నిరంతరం తన శ్రమను, ఆహారాన్ని గమనించే ఓ యాప్ సాయంతో మూడేండ్లలో షుగర్ వ్యాధి నుంచి బయటపడటమే కాకుండా ఏకంగా 18 కిలోల బరువు తగ్గాడు. కృత్రిమ మేధతో పనిచేసే పరికరాలను విచక్షణతో వాడితే ఎంత ఉపయోగమే చెప్పే సాక్ష్యమిది!
ఓ పనిని మరింత సులువుగా చేసే సౌలభ్యం వచ్చాక, దాన్ని చేసేవారి సంఖ్య కూడా తగ్గుతుంది. కానీ కొన్ని విప్లవాత్మకమైన మార్పులు, ఉపాధిరంగాన్ని కుదిపేస్తాయి. దీన్నే టెక్నలాజికల్ అన్ఎంప్లాయ్మెంట్ అంటారు. ఇది మానవాళికి కొత్తేమీ కాదు. పారిశ్రామిక విప్లవం వచ్చిన సందర్భంగా ఇదే జరిగింది. ఎక్కడికక్కడ యంత్రాలు వచ్చేసి, పనులన్నీ సులువు చేసేశాయి. వ్యవసాయం నుంచి మిల్లుల వరకు కార్మికుల ఉపాధికి గండి పడింది. ఉదాహరణకు ఈ సమయంలో ఇంగ్లండుకు చెందిన జాన్ కే అనే వ్యక్తి ఓ ‘మగ్గం నాడే’ కనిపెట్టాడు. దారాన్ని స్థిరంగా ఉంచే ఈ చిన్నపాటి పరికరంతో పెద్ద పెద్ద వస్ర్తాలను తేలికగా నేసే అవకాశం వచ్చింది. అంతేకాదు, ఇద్దరు చేసే పనిని ఒకరే చేయగలిగేవారు. ఈ పరికరాన్ని రూపొందించినందుకు స్వదేశంలోనే తీవ్రమైన నిరసన ఎదుర్కొన్నాడు జాన్. దాన్ని తట్టుకోలేక ఫ్రాన్సుకు వెళ్లాల్సి వచ్చింది. ఇంతాచేసి, తను కనిపెట్టిన పరికరంతో పెద్ద లాభాలు కూడా అందుకోలేకపోయాడు. వాటిని ఉపయోగించుకున్న కంపెనీలు మాత్రం కోట్లు ఆర్జించాయి. నేత పరిశ్రమలో ఉద్యోగాలు ఆవిరయ్యాయి. కంప్యూటర్లు అందుబాటులోకి వచ్చిన కొత్తలోనూ ఇలాంటి కుదుపే ఏర్పడింది. ఉద్యోగాన్ని నిలుపుకోవాలన్నా, కొత్త ఉద్యోగం పొందాలన్నా కంప్యూటర్ నేర్పు తప్పనిసరి అయ్యింది.
ఓ రోబో మనకు సర్వ్ చేసినంత మాత్రాన అది కృత్రిమ మేధ కిందకు రాదు. కంప్యూటర్లో ఓ అప్లికేషన్ మనకు సమాచారం ఇచ్చినంతమాత్రాన అది AI కాదు.
చార్లీ అండ్ ద చాక్లెట్ ఫ్యాక్టరీ అనే కథ చాలామంది పిల్లలకు పరిచయమే. ఆ పుస్తకం ఆధారంగా స్కాట్లాండులో ఓ నాటకాన్ని ప్రదర్శిస్తున్నట్టు ప్రకటించారు. ఆ ప్రచారం కోసం వాడిన బొమ్మలన్నీ కృత్రిమ మేధతో తయారైనవే. ఇక దాని గురించి సాగిన వర్ణనలు చాట్ జీపీటీతో రూపొందాయి. ఇదో అద్భుతమైన అనుభవం కాబోతున్నది అన్న స్థాయిలో ఆ ప్రచారం ఉంది. ఇదంతా చూసి జనాలు వేల రూపాయల టికెట్లు పెట్టి నాటకం వేసే హాలుకు వెళ్లారు. తీరా అదొక గోదాము అని తేలింది. అరకొర బొమ్మలు, అనుభవం లేని నటులతో సాగిన ఆ ప్రహసనానికి ప్రేక్షకుల దిమ్మ తిరిగిపోయింది. నాటకరంగంలోనే ఇదో గొప్ప స్కామ్గా మిగిలిపోయింది. AI తో రూపొందించే వీడియోలు, ఫొటోలు, రాతలు… ఎంతవరకు నమ్మశక్యమో చెప్పలేం. ఇక డీప్ ఫేక్ లాంటి పద్ధతుల ద్వారా నేరుగా ఓ వ్యక్తి గొంతు లేదా రూపాన్ని అనుకరించి మోసం చేసే అవకాశాలు పుష్కలం!
చివరగా ఓ మాట. AI వల్ల ఉపాధి రంగంలో తీవ్రమైన కుదుపులు వచ్చే మాట వాస్తవమే. కానీ మనిషి మొండివాడు. ఎలాంటి పరిస్థితినైనా తట్టుకుని నిలబడటమే కాదు, తనకు అనుకూలంగా మార్చుకోగలడు కూడా! అందుకే మార్పునకు సిద్ధపడదాం. అంతేకానీ కొందరు ఊహిస్తున్నట్టు లోకంలో ఉన్న ఉద్యోగాలన్నీ ఊడ్చిపెట్టుకుపోయే స్థితి కానీ, సైన్స్ ఫిక్షన్ నవలల్లో వర్ణించినట్టు కృత్రిమ మేధ మనుషుల్ని అదుపు చేసే ప్రమాదం కానీ… సమీప భవిష్యత్తులో లేదు. అలాంటి పరిస్థితి వచ్చినప్పుడు కూడా మనిషి స్థిమితంగా దాన్ని ఎదుర్కొనే మార్గం కనిపెట్టి తీరతాడు. ప్రస్తుతానికైతే మనం AI ని మనకు అనుకూలంగా మలుచుకునే పనిలో ఉందాం!
– కె.ఎల్. సూర్య