ప్లేట్ల మీద‌ డిజైన్ బాగున్నాయ‌ని అనుకుంటున్నారా? అయితే మీరు పొర‌బ‌డ్డ‌ట్టే !!

May 22, 2022 / 06:40 AM IST

Plates Decoration Ideas | ఎవరైనా పార్టీ మారితేనో, మాట మార్చితేనో ప్లేటు ఫిరాయించారని అంటాం. ఏకంగా ప్లేటే.. ప్లేటు ఫిరాయిస్తే? అదే జరుగుతున్నది ఇప్పుడు. ఈ ప్లేట్లలో ప్రింట్లలా కనిపిస్తున్న డిజైన్లన్నీ నిజమైన పండ్లూ కూరగాయల ముక్కలే. కళ్లను కనికట్టు చేసే ఈ కళను సలాడ్‌ ఆర్ట్‌, ఫుడ్‌ ల్యాండ్‌ స్కేపింగ్‌ తదితర పేర్లతో పిలుస్తున్నారు.

కుంచె పట్టుకుని క్యాన్వాస్‌ మీద చిత్రం గీస్తే.. కళ్లారా చూసి ఆనందిస్తాం. అదే కత్తినే కుంచెగా మార్చి కూరగాయలతో… ప్లేటు మీద చిత్రాలు వేస్తే … కళ్లతో చూసి, చేత్తో తాకి, చటుక్కున నోట్లో వేసుకోవచ్చు. అలా ‘ఫుడ్‌ ఆర్ట్‌’ అటు ఆనందాన్ని, ఇటు ఆరోగ్యాన్ని అందిస్తున్నది. భోజనానికి ముందు సలాడ్ల పేరుతో పండ్లూ కూరగాయల ముక్కల్ని అందించడం తెలిసిందే. ఇక్కడి చిత్రాల్లో కనిపిస్తున్నవన్నీ అందంగా తీర్చిదిద్దిన అలాంటి సలాడ్లే. పెద్ద పెద్ద హోటళ్లలో పనిచేసే షెఫ్‌లు వీటిని పొందికగా సిద్ధం చేస్తారు.

ఈ కళను వడ్డించడానికి ఎక్కువగా తెలుపూ, నలుపూ, బూడిదరంగు ప్లేట్లను ఎంచుకుంటారు. అనుకున్న చిత్రాన్ని బట్టి ఆయా కూరగాయలు, పండ్ల ముక్కలను సరైన ఆకృతి, పరిమాణాల్లో తరగడం అసలైన సవాలు. ఇందుకోసం రకరకాల సైజుల కత్తులు, చాప్‌స్టిక్స్‌ తదితర వస్తువుల్ని ఉపయోగిస్తారు. సలాడ్‌ ప్లేటింగ్‌లో ఎక్కువగా ఉల్లిగడ్డ, కీరా, క్యారెట్లతో పాటు పుచ్చకాయ, చెర్రీల్లాంటి వాటినీ వాడతారు. చాలామంది సలాడ్లను ఇష్టపడరు. ఇలా ఆకర్షణీయంగా వడ్డిస్తే.. క్షణాల్లో ప్లేటు ఖాళీ చేసేస్తారు. వీటిని సులభంగా ఎలా చేయాలో తెలుసుకునేందుకు యూట్యూబ్‌లో రకరకాల వీడియోలూ ఉన్నాయి. కాబట్టి, కాస్త ఖాళీ దొరికితే మనమూ ప్రయత్నించి వరల్డ్‌క్లాస్‌ షెఫ్‌లా పోజులు కొట్టొచ్చన్న మాట!