RO-KO: భారత్ వేదికగా జరుగుతున్న వన్డే ప్రపంచకప్ – 2023లో టీమిండియా వెటరన్ ఆటగాళ్లు, జట్టుకు ప్రస్తుత, మాజీ సారథులైన రోహిత్ శర్మ, విరాట్ కోహ్లీలు అంచనాలకు మించి రాణిస్తున్నారు. వచ్చే వరల్డ్ కప్ నాటికి ఈ ఇద్దరూ ఆడతారో లేదో స్పష్టత లేని నేపథ్యంలో తమ చివరి ప్రపంచకప్ (?) లో ఇరువురూ జట్టు కోసం పాటు పడుతున్నారు. రోహిత్ విఫలమైతే కోహ్లీ.. కోహ్లీ ఆడని పక్షంలో రోహిత్లు ప్రత్యర్థులపై విరుచుకుపడుతూ భారత్కు అపూర్వ విజయాలు అందిస్తున్నారు. నిన్నటి సౌతాఫ్రికా మ్యాచ్తో కలుపుకుని 8 మ్యాచ్లు ఆడిన ఈ ఇద్దరూ.. తమ అనుభవన్నంతా రంగరించి భారత్కు పదేండ్ల నుంచి అందని ద్రాక్షగా ఊరిస్తున్న ప్రపంచకప్ను సాధించి పెట్టే దిశగా సాగుతున్నారు.
ఈ మెగా టోర్నీలో ఇప్పటివరకూ టీమిండియా సారథి రోహిత్ శర్మ 442 పరుగులు చేయగా కోహ్లీ 543 పరుగులు సాధించాడు. వరల్డ్ కప్ ప్రారంభానికి ముందు భారత్.. యువ ఓపెనర్ శుభ్మన్ గిల్పై భారీ ఆశలు పెట్టుకుంది. కానీ అతడు ఒకటి రెండు మ్యాచ్లలో మినహా పెద్దగా ప్రభావం చూపలేదు. కానీ రోహిత్, కోహ్లీ మాత్రం అభిమానులను నిరాశపరచడం లేదు.
Virat Kohli said “I have played with Rohit for 15 years – I have never seen him expressed a lot – it was so emotional”. [Star Sports] pic.twitter.com/wCf8xrsFhZ
— Johns. (@CricCrazyJohns) November 5, 2023
నీకోటి.. నాకోటి..
ప్రపంచకప్ తొలి మ్యాచ్లో భాగంగా ఆసీస్తో ఆడిన మ్యాచ్లో రోహిత్ డకౌట్ అయ్యాడు. ఆ మ్యాచ్లో విరాట్.. 85 పరుగులు చేసి టీమిండియాకు తొలి విజయాన్ని అందించాడు. అఫ్గానిస్తాన్తో మ్యాచ్లో రోహిత్ సెంచరీ (131) చేయగా కోహ్లీ కూడా అర్థ సెంచరీ (55) తో రాణించాడు. ఇక పాకిస్తాన్తో మ్యాచ్లో కోహ్లీ.. 16 పరుగులే చేయగా రోహిత్ 83 పరుగులు చేసి భారత విజయంలో కీలక పాత్ర పోషించాడు. బంగ్లాదేశ్తో మ్యాచ్లో రోహిత్ 48 పరుగులు చేస్తే కోహ్లీ సెంచరీ (103)తో రాణించాడు. న్యూజిలాండ్తో పోరులో విరాట్ 95 పరుగులు చేయగా రోహిత్ (46) మరోసారి అర్థ సెంచరీ మిస్ చేసుకున్నాడు. ఇక ఇంగ్లండ్తో మ్యాచ్లో రోహిత్ 87 పరుగులు చేయగా కోహ్లీ డకౌట్ అయ్యాడు. శ్రీలంకతో కోహ్లీ 88 పరుగులు చేయగా హిట్మ్యాన్ నాలుగు పరుగులే చేసి నిష్క్రమించాడు. ఇక ఆదివారం సౌతాఫ్రికాతో ముగిసిన మ్యాచ్లో రోహిత్.. 40 పరుగులు చేసి ఫర్వాలేదనిపించగా విరాట్ 101 పరుగులు చేసి తన కెరీర్లో 49వ సెంచరీని పూర్తిచేశాడు.
‘రోకో’ (రోహిత్ – కోహ్లీ)లు ఇదే ఫామ్ను కొనసాగిస్తూ మరో మూడు మ్యాచ్లలో భారత్ను నడిపిస్తే పదేండ్ల తర్వాత వరల్డ్ కప్ గెలవడం పెద్ద కష్టమేమీ కాదు.