ఐటీటీఎఫ్‌లో రెండో విజయం

అంతర్జాతీయ టేబుల్‌ టెన్నిస్‌ సమాఖ్య (ఐటీటీఎఫ్‌) ఆధ్వర్యంలో జరుగుతున్న వరల్డ్‌ టీమ్‌ టేబుల్‌ టెన్నిస్‌ చాంపియన్‌షిప్స్‌లో భారత పురుషుల జట్టు వరుసగా రెండో విజయాన్ని నమోదుచేసింది. గ్రూప్‌ దశలో మొదటి పోరులోనే ట్యూనిషియాను చిత్తుచేసిన భారత్‌.. రెండో మ్యాచ్‌లో 3-2తో స్లోవేకియాపై పోరాడి గెలిచింది.

• స్లోవేకియాపై పోరాడి గెలిచిన భారత్‌

లండన్‌: అంతర్జాతీయ టేబుల్‌ టెన్నిస్‌ సమాఖ్య (ఐటీటీఎఫ్‌) ఆధ్వర్యంలో జరుగుతున్న వరల్డ్‌ టీమ్‌ టేబుల్‌ టెన్నిస్‌ చాంపియన్‌షిప్స్‌లో భారత పురుషుల జట్టు వరుసగా రెండో విజయాన్ని నమోదుచేసింది. గ్రూప్‌ దశలో మొదటి పోరులోనే ట్యూనిషియాను చిత్తుచేసిన భారత్‌.. రెండో మ్యాచ్‌లో 3-2తో స్లోవేకియాపై పోరాడి గెలిచింది. ఇరుజట్ల మధ్య హోరాహోరీగా సాగిన పోరులో మొదట లుబొమిర్‌ పిస్తెజ్‌.. 3-2 (11-8, 5-11, 8-11, 11-5, 11-6)తో మనుష్‌ షాను ఓడించి షాకిచ్చాడు.

కానీ రెండో సింగిల్స్‌లో మానవ్‌ ఠక్కర్‌.. 3-0 (11-6, 11-8, 11-6)తో జాకుజ్‌ జెలింకాను మట్టికరిపించి స్కోర్లను 1-1తో సమం చేశాడు. మూడో సింగిల్స్‌లో వాంగ్‌ యాంగ్‌.. 3-0 (16-14, 11-5, 11-9)తో హర్మీత్‌ను చిత్తు చేయడంతో స్లోవేకియా మళ్లీ ఆధిక్యంలోకి వచ్చింది. అయితే రివర్స్‌ సింగిల్స్‌లో మానవ్‌.. 3-0 (11-3, 11-3, 11-3)తో లుబొమిర్‌ను ఓడించగా ఆఖరి మ్యాచ్‌లో మనుష్‌.. 3-0 (11-8, 11-8, 11-7)తో జాకుబ్‌పై గెలిచి 3-2తో భారత్‌కు విజయాన్ని అందించాడు. మహిళల జట్టు రువాండాపై 3-0తో ఏకపక్ష విజయం సాధించింది.