IND vs NZ | స్పిన్నర్లపై మయాంక్ ఒత్తిడి పెంచాడు: డారియల్ మిచెల్

IND vs NZ | న్యూజిల్యాండ్‌తో జరుగుతున్న రెండో టెస్టులో భారత ఓపెనర్ మయాంక్ అగర్వాల్‌.. తమ స్పిన్నర్లపై ఒత్తిడి పెంచాడని కివీస్ బ్యాటర్‌ డారియల్ మిచెల్‌ అన్నాడు.

న్యూజిల్యాండ్‌తో జరుగుతున్న రెండో టెస్టులో భారత ఓపెనర్ మయాంక్ అగర్వాల్‌.. తమ స్పిన్నర్లపై ఒత్తిడి పెంచాడని కివీస్ బ్యాటర్‌ డారియల్ మిచెల్‌ అన్నాడు. వాంఖడే స్టేడియంలోని పిచ్‌పై ఎలా బ్యాటింగ్‌ చేయాలో మయాంక్ చూపించాడని మెచ్చుకున్నాడు.

‘ఎన్నో సవాళ్లు విసురుతున్న ఈ పిచ్‌పై.. మయాంక్ మా స్పిన్నర్లపై ఒత్తిడి పెంచాడు. బంతి చాలా బాగా టర్న్ అవుతోంది’ అని చెప్పాడు. ముంబైలోని వాంఖడే వేదికగా జరుగుతున్న భారత్‌-కివీస్ రెండో టెస్టులో ఓపెనర్ మయాంక్ అద్భుతంగా ఆడాడు. తొలి ఇన్నింగ్స్‌లో పుజారా, కోహ్లీ వంటి సీనియర్లు డకౌట్ అయినా చెక్కుచెదరకుండా చెలరేగాడు.

ఆ ఇన్నింగ్స్‌లో ఏకంగా 150 పరుగులు చేశాడు. ఆ తర్వాత కివీ బ్యాటర్లు 62 పరుగులకే ఆలౌట్ అయిన చోట తను మాత్రం చాలా సంయమనంతో ఆడాడు. రెండో ఇన్నింగ్స్‌లో 62 పరుగులు చేశాడు. న్యూజిల్యాండ్‌కు భారత్ భారీ లక్ష్యం నిర్దేశించడంలో మయాంక్ పాత్ర చాలా ఉంది.