ICC – Kohli Poster : మరో కొన్ని గంటల్లో వరల్డ్ టెస్టు చాంపియన్షిప్ ఫైనల్(WTC Final 2023)కు తెరలేవనుంది. భారత్, ఆస్ట్రేలియా జట్లు ఢీ కొంటున్న ఈ మ్యాచ్ సెంటర్ ఆఫ్ అట్రాక్షన్గా ఉండనుంది. ఫైనల్ ఫైట్కు కౌంట్డౌన్ మొదలైన వేళ.. భారత జట్టు స్టార్ ఆటగాడు విరాట్ కోహ్లీ(Virat Kohli) పోస్టర్ను ఈరోజు ఐసీసీ ట్విట్టర్లో విడుదల చేసింది. బిగ్ ఫైట్కు ముందు కింగ్ కోహ్లీ పోస్టర్ తేవడం వెనుక ఐసీసీ ఉద్దేశం ఏంటంటే..? రెండేళ్ల క్రితం ఫామ్ కోల్పోయిన కోహ్లీ గత ఏడాది నుంచి పరుగుల వరద పారిస్తున్నాడు.
‘విరాట్ కోహ్లీ ఫామ్ అందుకున్నాడు. ప్రపంచ టెస్టు చాంపియన్షిప్ ఫైనల్ 2023కి కొదమసింహంలా వచ్చాడు’ అని ఐసీసీ ట్వీట్ చేసింది. ఆ పోస్టర్లో రన్ మెషిన్ విరాట్ సింహనాదం చేస్తున్నట్టు కనిపిస్తున్నాడు. ఐపీఎల్ 16వ సీజన్లో వరుసగా రెండు శతకాలు బాదిన కోహ్లీ డబ్ల్యూటీసీ ఫైనల్కు రెట్టించిన ఉత్సాహంతో ఇంగ్లండ్కు వెళ్లాడు.
Virat Kohli is back in roaring form just in time for the #WTC23 Final 🔥 pic.twitter.com/1AdCoxrnKc
— ICC (@ICC) June 6, 2023
సచిన్ వారసుడు.. రికార్డుల రారాజుగా మాజీల ప్రశంసలు అందుకున్న కోహ్లీ భారత జట్టుపై తన ముద్ర వేశాడు. టీమిండియాను నంబర్ 1 చేశాడు. ఛేజ్ మాస్టర్గా ప్రత్యర్థులకు వణుకు పుట్టించే అతను రెండేళ్ల క్రితం ఫామ్ కోల్పోయాడు. సెంచరీ కాదు కదా.. ఫిఫ్టీ కొట్టాడానికి కూడా ఇబ్బంది పడ్డాడు. ఒకదశలో ఆటనుంచి బ్రేక్ తీసుకున్నాడు. ఆ తర్వాత ఆసియా కప్(Asia Cup 2022)తో కోహ్లీ మునపటిలా చెలరేగాడు.
శ్రీలంకపై సెంచరీ కొట్టిన అతను టీ20 వరల్డ్ కప్(T20 World Cup)లోనూ దంచాడు. బంగ్లాదేశ్ సిరీస్లో మూడంకెల స్కోర్ బాది 75వ సెంచరీ ఖాతాలో వేసుకున్నాడు. ఆస్ట్రేలియాపై బోర్డర్ – గావస్కర్ ట్రోఫీ(Border – Gavaskar Trophy) ఆఖరి టెస్టులో సెంచరీతో మెరిశాడు. దాంతో, మూడేళ్ల తర్వాత టెస్టుల్లో వంద మార్క్ అందుకున్నాడు. కోహ్లీ అదే ఫామ్ను ఐపీఎల్ 16వ సీజన్లో కొనసాగించాడు. ఆర్సీబీ విజయాల్లో కీలకమైన అతను ఆఖరి రెండు మ్యాచుల్లో విశ్వరూపం చూపాడు. వరుసగా రెండు శతకాలతో వింటేజ్ కోహ్లీని గుర్తు చేశాడు.