Ind VS Aus | బోర్డర్-గవాస్కర్ టెస్టు సిరీస్ను చేజిక్కించుకున్న టీమ్ఇండియా.. వన్డే వార్కు సిద్ధమైంది. మూడు మ్యాచ్ల వన్డే సిరీస్(AUSTRALIA TOUR OF INDIA ODI SERIES)లో భాగంగా నేడు భారత్, ఆస్ట్రేలియా మధ్య వాంఖడే వేదికగా తొలి వన్డే జరుగనుంది. టాస్ గెలిచిన టీమ్ఇండియా మొదట బౌలింగ్ ఎంచుకున్నది. ఆస్ట్రేలియా జట్టుకు స్టీవ్ స్మిత్ కెప్టెన్సీ బాధ్యతలు చేపట్టాడు. ఈ మ్యాచ్కు హార్దిక్ పాండ్యా (Hardik pandya) సారథ్యం వహిస్తున్నాడు. ఇండియన్ జట్టులోకి స్పిన్నర్ కుల్దీప్ యాదవ్ వచ్చేశాడు. జడేజా మరో స్పిన్నర్ పాత్రను పోషించనున్నాడు. స్పీడ్ బౌలర్లలో షమీ, సిరాజ్, థాకూర్ ఉన్నారు.
🚨 A look at #TeamIndia's Playing XI for the first #INDvAUS ODI 🔽
Follow the match ▶️ https://t.co/BAvv2E8K6h @mastercardindia pic.twitter.com/UkfoRmxi02
— BCCI (@BCCI) March 17, 2023
ఊపుమీదున్న ఇండియా..
ఆస్ట్రేలియాతో ఇటీవల ముగిసిన నాలుగు టెస్టుల ‘బోర్డర్-గవాస్కర్’ సిరీస్ను 2-1తో చేజిక్కించుకున్న భారత్.. అదే ఊపులో వన్డే సిరీస్ను కూడా కైవసం చేసుకోవాలని చూస్తున్నది. మరోవైపు టెస్టుల్లో పెద్దగా ఆకట్టుకోలేకపోయిన ఆసీస్.. వన్డేల్లో మరింత బలంగా కనిపిస్తున్నది. కమిన్స్ ఈ సిరీస్కూ దూరం కాగా.. చివరి రెండు టెస్టుల్లో జట్టును నడిపించిన స్మిత్ వన్డేల్లోనూ జట్టుకు సారథ్యం వహించనున్నాడు. గాయాల నుంచి కోలకున్న గ్లెన్ మ్యాక్స్వెల్, డేవిడ్ వార్నర్, మిషెల్ మార్ష్ రాకతో ఆ జట్టు పటిష్టంగా మారింది.
రాహుల్ కీపర్గానే..
స్వదేశంలో ఈ ఏడాది టీమ్ఇండియా ఆడిన ఆరు వన్డేల్లోనూ నెగ్గి ఫుల్ జోష్లో ఉంది. యువ ఓపెనర్ శుభ్మన్ గిల్ అదరగొడుతుండగా.. రోహిత్ శర్మ గైర్హాజరీలో గిల్తో కలిసి ఇషాన్ కిషన్ ఇన్నింగ్స్ ఆరంభించనున్నాడు. మూడో స్థానంలో విరాట్ కోహ్లీ బ్యాటింగ్కు రానున్నాడు. గత ఆరు నెలల్లో మూడు ఫార్మాట్లలో కలిపి ఐదు సెంచరీలతో మునుపటి ఫామ్ అందుకున్న విరాట్.. ఆసీస్పై అదే దూకుడు కొనసాగించాలని చూస్తున్నాడు. నాలుగో స్థానం కోసం సూర్యకుమార్ యాదవ్, రజత్ పాటిదార్ మధ్య పోటీ నెలకొన్నా.. టీమ్ మేనేజ్మెంట్ సూర్యకుమార్ వైపు మొగ్గు చూపేలా కనిపిస్తున్నది. పేలవ ఫామ్ కారణంగా ఆసీస్తో చివరి రెండు టెస్టులకు జట్టులో చోటు కోల్పోయిన కేఎల్ రాహుల్.. వికెట్ కీపర్గా మిడిలార్డర్లో బ్యాటింగ్కు దిగనున్నాడు.
వన్డేల్లో ఐదో స్థానంలో అతడి ప్రదర్శన జట్టుకు అదనపు బలం చేకూరుస్తున్నది. ఆ తర్వాత హార్దిక్ పాండ్యా, రవీంద్ర జడేజా బ్యాటింగ్కు రానున్నారు. రెండో స్పిన్నర్గా అక్షర్ పటేల్, వాషింగ్టన్ సుందర్లో ఒకరిని ఎంపిక చేయనున్నారు. మహమ్మద్ సిరాజ్, షమీ, శార్దూల్ ఠాకూర్ పేస్ బాధ్యతలు మోయనున్నారు. మరోవైపు ఆస్ట్రేలియా జట్టు ఆల్రౌండర్లతో నిండుగా ఉంది. మార్ష్, స్టోయినిస్, మ్యాక్స్వెల్, గ్రీన్ రూపంలో వారికి నలుగురు నాణ్యమైన ఆల్రౌండర్లు అందుబాటులో ఉన్నారు.