Visit:
Under -19 Asia Cup : ఈ ఏడాది ఆఖ‌ర్లో క్రికెట్ మ్యాచ్‌ల సంద‌డి మొద‌లుకానుంది. ఇప్ప‌టికే బోర్డ‌ర్ – గ‌వాస్క‌ర్ ట్రోఫీ షెడ్యూల్ ఖ‌రారుకాగా.. అండ‌ర్ -19 ఆసియా క‌ప్‌లు కూడా అదే స‌మ‌యంలో జ‌రుగ‌నున్నాయి. ఇదివ‌ర‌కే మ‌హిళ‌ల టోర్నీ తేదీల‌ను వెల్ల‌డించిన ఆసియా క్రికెట్ కౌన్సిల్.. శుక్ర‌వారం పురుషుల అండ‌ర్ – 19 ఆసియా క‌ప్ షెడ్యూల్‌ను కూడా విడుద‌ల చేసింది.
యునైటెడ్ అర‌బ్ ఎమిరేట్స్ వేదిక‌గా నవంబర్ 29 నుంచి అండ‌ర్ -19 ఆసియా క‌ప్ మొద‌ల‌వ్వ‌నుందని ఏసీసీ తెలిపింది. డిసెంబ‌ర్ 8వ దుబాయ్‌లోని షార్జా మైదానంలో ఫైన‌ల్ మ్యాచ్ జ‌రుగ‌నుంది. ఈసారి ఆసియా దేశాల‌కు చెందిన ఎనిమిది జ‌ట్లు టోర్నీలో పాల్గొంటున్నాయి.
The generation next, is ready to battle it out at the #MensU19AsiaCup2024 starting November 29 🗓️. The action-packed tournament will be contested across Dubai and Sharjah with the finals being contested on December 8.🏆#ACC pic.twitter.com/lkaoPWSNFR
— AsianCricketCouncil (@ACCMedia1) November 8, 2024
ఈ టోర్నీలో పోటీ ప‌డుతున్న జ‌ట్ల‌ను ఒక్కోదాంట్లో 4 చొప్పున రెండు గ్రూప్‌లుగా విభ‌జించారు. రౌండ్ రాబిన్ ప‌ద్ధ‌తిలో లీగ్ ద‌శ మ్యాచ్‌లు నిర్వహిస్తారు. ప్ర‌తి గ్రూప్‌లో తొలి రెండు స్థానాల్లో నిలిచిన జ‌ట్లు సెమీ ఫైన‌ల్‌కు అర్హ‌త సాధిస్తాయి. రెండు సెమీఫైన‌ల్స్‌లో గెలిచిన జ‌ట్లు డిసెంబ‌ర్ 8వ తేదీన జ‌రిగే టైటిల్ పోరులో త‌ల‌ప‌డుతాయి. గ్రూప్ ఏలో ఆతిథ్య యూఏఈతో పాటు భారత్, పాకిస్థాన్, జ‌పాన్ జ‌ట్లు ఉన్నాయి. గ్రూప్ బీలో బంగ్లాదేశ్, శ్రీ‌లంక, అఫ్గ‌నిస్థాన్, నేపాల్ జ‌ట్లు టైటిల్ వేట‌కు సిద్ధ‌మ‌వుతున్నాయి.
అండ‌ర్ -19 ఆసియా క‌ప్ తొలి మ్యాచ్ శ్రీ‌లంక, నేపాల్‌ల మ‌ధ్య జ‌రుగ‌నుంది. నవంబర్ 30న భారత్, పాకిస్థాన్‌ల మ్యాచ్ ఉంది. ఈ టోర్నీలో ఫేవ‌రెట్లు అయిన భారత్, పాకిస్థాన్‌లు గ్రూప్ ఏ నుంచి అల‌వోక‌గా సెమీస్ చేరే వీలుంది. ఇక గ్రూప్ బీ నుంచి శ్రీ‌లంక‌తో పాటు అఫ్గ‌నిస్థాన్ లేదా బంగ్లాదేశ్ ముంద‌డుగు వేసే అవ‌కాశ‌ముంది.
