Visit:
హైదరాబాద్‌, ఆట ప్రతినిధి : భారత టీ20 విధ్వంసక ఓపెనర్‌ అభిషేక్ శర్మ (52 బంతుల్లో 148, 8 ఫోర్లు, 16 సిక్సర్లు) ఈ ఫార్మాట్‌లో మరోసారి ధనాధన్‌ సెంచరీతో రికార్డుల మోత మోగించాడు. సయ్యిద్‌ ముస్తాక్‌ అలీ ట్రోఫీ ఎలైట్‌ గ్రూప్‌ సీలో పంజాబ్‌ జట్టుకు సారథిగా వ్యవహరిస్తున్న అభిషేక్.. 12 బంతుల్లోనే ఫిఫ్టీ సాధించడమే గాక 32 బంతుల్లోనే సెంచరీ బాదాడు. తద్వారా టీ20 ఫార్మాట్‌లో మూడో వేగవంతమైన (గతంలో ఉర్విల్‌ పటేల్‌, అభిషేక్ 28 బంతుల్లోనే సెంచరీలు చేశారు) శతకం చేసిన బ్యాటర్‌గా రికార్డులకెక్కాడు.
అభిషేక్ బాదుడుతో జింఖానా గ్రౌండ్స్‌లో బెంగాల్‌తో జరిగిన మ్యాచ్‌లో పంజాబ్‌ ఏకంగా 112 పరుగుల భారీ తేడాతో ఘనవిజయాన్ని అందుకుంది. మ్యాచ్‌లో మొదట బ్యాటింగ్‌ చేసిన పంజాబ్‌.. అభిషేక్, ప్రభ్‌సిమ్రన్‌ (70) బాదుడుతో 20 ఓవర్లలోనే 310/5 పరుగుల రికార్డు స్కోరు చేసింది. భారీ ఛేదనలో బెంగాల్‌.. నిర్ణీత ఓవర్లలో 198/9కే పరిమితమైంది.
