Visit:
రాంచీ : స్వదేశంలో దక్షిణాఫ్రికాకు టెస్టు సిరీస్‌ను అప్పగించిన భారత జట్టు.. వన్డేల్లో మాత్రం శుభారంభం చేసింది. మూడు మ్యాచ్‌ల సిరీస్‌లో భాగంగా ఆదివారం రాంచీలో హోరాహోరీగా జరిగిన మొదటి వన్డేలో 17 పరుగుల తేడాతో సఫారీలను ఓడించి సిరీస్‌లో 1-0 ఆధిక్యాన్ని సాధించింది. మొదట బ్యాటింగ్‌ చేసిన భారత్‌.. 50 ఓవర్లకు 8 వికెట్లు కోల్పోయి 349 పరుగుల భారీ స్కోరు చేసింది. ‘ప్లేయర్‌ ఆఫ్‌ ది మ్యాచ్‌’ విరాట్‌ కోహ్లీ (120 బంతుల్లో 135, 11 ఫోర్లు, 7 సిక్స్‌లు) వన్డేల్లో 52వ శతకంతో చెలరేగగా కెప్టెన్‌ కేఎల్‌ రాహుల్‌ (56 బంతుల్లో 60, 2 ఫోర్లు, 3 సిక్స్‌లు), రోహిత్‌ శర్మ (51 బంతుల్లో 57, 5 ఫోర్లు, 3 సిక్స్‌లు) హాఫ్‌ సెంచరీలతో రాణించారు. టీమ్‌ఇండియా నిర్దేశించిన 350 పరుగుల భారీ ఛేదనలో సౌతాఫ్రికా.. 49.2 ఓవర్లలో 332 వద్దే ఆగిపోయింది. మాథ్యూ బ్రీట్జ్‌కే (80 బంతుల్లో 72, 8 ఫోర్లు, 1 సిక్స్‌), మార్కో యాన్సెన్‌ (39 బంతుల్లో 70, 2 ఫోర్లు, 3 సిక్స్‌లు), కార్బిన్‌ బాష్‌ (51 బంతుల్లో 67, 5 ఫోర్లు, 4 సిక్స్‌లు) పోరాడినా ఆ జట్టుకు పరాభవం తప్పలేదు. ఇరుజట్ల మధ్య రెండో వన్డే డిసెంబర్‌ 3న విశాఖపట్నంలో జరుగుతుంది.
ఆస్ట్రేలియా పర్యటనలో తమ విలువను చాటుకున్న రోహిత్‌, కోహ్లీ.. స్వల్ప విరామం అనంతరం బరిలోకి దిగి ఆ ఫామ్‌ను కొనసాగించారు. గిల్‌ గైర్హాజరీలో ఓపెనర్‌గా స్థానం దక్కించుకున్న జైస్వాల్‌ (18) నిరాశపరిచినా రోకో ద్వయం మాత్రం మరోమారు తమదైన ఆటతో అలరించింది. తనకు అచ్చొచ్చిన రాంచీలో ఎదుర్కున్న తొలి బంతినే బౌండరీకి తరలించి పరుగుల వేటను ఆరంభించిన కోహ్లీ ఇన్నింగ్స్‌ ఆసాంతం దూకుడుగా సాగింది. బర్గర్‌ 8వ ఓవర్లో 6,4తో కోహ్లీ తన ఉద్దేశాన్ని చెప్పకనే చెప్పగా.. బాష్‌ 9వ ఓవర్లో రోహిత్‌ రెండు బౌండరీలు కొట్టాడు. ఈ ఇద్దరి జోరుతో 13.3 ఓవర్లకే భారత్‌ వంద పరుగుల మార్కును అందుకుంది. సుబ్రయెన్‌ 15వ ఓవర్లో రోహిత్‌ రెండు భారీ సిక్సర్లు బాదాడు. మరో ఎండ్‌లో కోహ్లీ.. బాష్‌ 18వ ఓవర్లో మిడ్‌వికెట్‌ మీదుగా బంతిని స్టాండ్స్‌లోకి పంపి అర్ధ శతకాన్ని పూర్తిచేశాడు. ఆ తర్వాతి ఓవర్లో రోహిత్‌.. తన వన్డే కెరీర్‌లో 60వ ఫిఫ్టీ సాధించాడు. కానీ యాన్సెన్‌ ఓవర్లో రోహిత్‌ ఎల్బీగా వెనుదిరగడంతో 136 పరుగుల రెండో వికెట్‌ భాగస్వామ్యానికి తెరపడింది.
రోహిత్‌ నిష్క్రమించినా కోహ్లీ దూకుడు తగ్గలేదు. మిడిలార్డర్‌లో రుతురాజ్‌ (8), వాషింగ్టన్‌ (13) నిరాశపరిచినా రాహుల్‌ అండతో కోహ్లీ.. రన్‌రేట్‌ పడిపోకుండా ఆడాడు. యాన్సెన్‌ ఓవర్లో బౌండరీతో శతకానికి చేరువైన విరాట్‌.. అతడే వేసిన 38వ ఓవర్లో థర్డ్‌ మ్యాన్‌ దిశగా బంతిని బౌండరీకకి తరలించి అంతర్జాతీయ కెరీర్‌లో 83వ శతకాన్ని నమోదుచేశాడు. సెంచరీ తర్వాత జోరు పెంచిన విరాట్‌.. సుబ్రయెన్‌ ఓవర్లో 4, 6, 6, 4 బాదాడు. దూకుడుగా ఆడే క్రమంలో అతడు ఔట్‌ అయినా రాహుల్‌, జడేజా (32) భారత్‌కు భారీస్కోరునందించారు.
11/3. రికార్డు ఛేదనలో సఫారీల స్కోరిది. ఇదే స్థితి కొనసాగుంటే ఆ జట్టు కనీసం 150 పరుగుల మార్కునైనా అందుకుంటుందా? అనుకున్న దశ నుంచి సఫారీలు బలంగా పుంజుకున్నారు. ఆరంభంలో హర్షిత్‌ రాణా, అర్ష్‌దీప్‌ టాపార్డర్‌ను దెబ్బతీశారు. మిడిలార్డర్‌లో బ్రీట్జ్‌కే, టోని డి జోర్జి (39) దక్షిణాఫ్రికా ఇన్నింగ్స్‌ను గాడిలో పెట్టారు. ఈ జోడీ నాలుగో వికెట్‌కు 66 రన్స్‌ జోడించింది. మిడిల్‌ ఓవర్లలో కుల్దీప్‌.. జోర్జిని ఔట్‌ చేసి భారత్‌కు బ్రేక్‌ ఇచ్చాడు. బ్రెవిస్‌ (28 బంతుల్లో 37, 8 ఫోర్లు, 3 సిక్స్‌లు) ధాటిగా ఆడినా ఎక్కువసేపు నిలువలేకపోయాడు. కానీ బ్రీట్జ్‌కే, యాన్సెన్‌ జోడీ 69 బంతుల్లోనే 97 రన్స్‌ జతచేయడంతో భారత శిబిరంలో ఆందోళన నెలకొంది. యాన్సెన్‌ ఎడాపెడా బాదేశాడు. అయితే కుల్దీప్‌.. 34వ ఓవర్లో ఈ ఇద్దర్నీ ఔట్‌ చేయడంతో భారత్‌ ఊపిరి పీల్చుకుంది. కానీ 8వ స్థానంలో వచ్చిన బాష్‌.. లోయరార్డర్‌ అండ ఆ జట్టును గెలిపించినంత పనిచేశాడు. ఓవర్లో 17 పరుగులు కావల్సి ఉండగా మ్యాచ్‌లో ఉత్కంఠ నెలకొంది. కానీ ప్రసిద్ధ్‌ వేసిన రెండో బంతికి అతడు రోహిత్‌కు క్యాచ్‌ ఇవ్వడంతో భారత విజయం ఖరారైంది.
భారత్‌: 50 ఓవర్లలో 349/8 (కోహ్లీ 135, రాహుల్‌ 60, బార్ట్‌మన్‌ 2/60, బర్గర్‌ 2/65);
దక్షిణాఫ్రికా: 49.2 ఓవర్లలో 332 (బ్రీట్జ్‌కే 72, యాన్సెన్‌ 70, కుల్దీప్‌ 4/68, రాణా 3/65)
వన్డేల్లో రోహిత్‌ శర్మ అరుదైన ఘనతను సొంతం చేసుకున్నాడు. ఈ మ్యాచ్‌లో 3 సిక్సర్లు కొట్టిన హిట్‌మ్యాన్‌.. 50 ఓవర్ల ఫార్మాట్‌లో అత్యధిక సిక్సర్లు (352) బాదిన ఆటగాడిగా రికార్డులకెక్కాడు. యాన్సెన్‌ వేసిన 20వ ఓవర్లో నాలుగో బంతిని లాంగ్‌ లెగ్‌ మీదుగా స్టాండ్స్‌లోకి తరలించి షాహిద్‌ అఫ్రిది (పాకిస్థాన్‌-351) రికార్డును అధిగమించాడు.
6 దక్షిణాఫ్రికాపై వన్డేల్లో కోహ్లీకి ఇది 6వ సెంచరీ. అతడు సచిన్‌, వార్నర్‌ (5)ను అధిగమించాడు.
2 సౌతాఫ్రికాపై వన్డేల్లో భారత్‌కు ఇది రెండో అత్యధిక స్కోరు (మొదటిది 401/3)
