కంట్రోల్‌ తప్పిన క్రైం

జిల్లాలో గతేడాదితో పోలిస్తే నేరాలు పెరిగినట్లు వికారాబాద్‌ జిల్లా పోలీసు అధికారి స్నేహ మెహ్రా వెల్లడించారు. బుధవారం ఎస్పీ కార్యాలయంలోని కాన్ఫరెన్స్‌ హాల్‌లో వార్షిక క్రైమ్‌ నివేదికపై ఎస్పీ పత్రికా విలేకరుల సమావేశాన్ని నిర్వహించారు. ఈ సందర్భంగా ఆమె మాట్లాడుతూ.. గతేడాదితో పోలిస్తే ఈ ఏడాది 122 నేరాలు పెరిగినట్లు, వీటిలో అధికంగా దొంగతనాలు, దోపిడీలు, హత్యలు, హత్యాయత్నాలు, చీటింగ్‌ కేసులు పెరిగినట్లు తెలిపారు.

• గతేడాదితో పోలిస్తే 3.31 శాతం పెరిగిన హత్యలు, దోపిడీలు, దొంగతనాలు
• ఈ ఏడాది డయల్‌-100కు 31,255 ఫోన్‌ కాల్స్‌, వీటిలో 166 ఎఫ్‌ఐఆర్‌లు నమోదు
• ఈ ఏడాది ఒకరికి ఉరిశిక్ష, 13 మందికి జీవిత ఖైదు
• గంజాయి అక్రమ రవాణా, రోడ్డు ప్రమాదాల నివారణపై దృష్టి
• మహిళల భద్రతకు అన్ని విధాలా చర్యలు
• వార్షిక క్రైం ప్రెస్‌మీట్‌లో ఎస్పీ స్నేహ మెహ్రా

వికారాబాద్‌, డిసెంబర్‌ 24 (నమస్తే తెలంగాణ): జిల్లాలో గతేడాదితో పోలిస్తే నేరాలు పెరిగినట్లు వికారాబాద్‌ జిల్లా పోలీసు అధికారి స్నేహ మెహ్రా వెల్లడించారు. బుధవారం ఎస్పీ కార్యాలయంలోని కాన్ఫరెన్స్‌ హాల్‌లో వార్షిక క్రైమ్‌ నివేదికపై ఎస్పీ పత్రికా విలేకరుల సమావేశాన్ని నిర్వహించారు. ఈ సందర్భంగా ఆమె మాట్లాడుతూ.. గతేడాదితో పోలిస్తే ఈ ఏడాది 122 నేరాలు పెరిగినట్లు, వీటిలో అధికంగా దొంగతనాలు, దోపిడీలు, హత్యలు, హత్యాయత్నాలు, చీటింగ్‌ కేసులు పెరిగినట్లు తెలిపారు.

జిల్లావ్యాప్తంగా అన్ని నేరాలకు సంబంధించి గతేడాది 3691 కేసులు నమోదుకాగా, ఈ ఏడాది 3813 కేసులు నమోదైనట్లు వెల్లడించారు. గతేడాది 117 తీవ్రమైన కేసులు నమోదైతే, ఈ ఏడాది 122 కేసులు నమోదైనట్లు చెప్పారు. డబ్బుల కోసం హత్యకు సంబంధించిన కేసులు గతేడాది ఒక్క కేసు నమోదు కాగా.. ఈ ఏడాది 4 కేసులకు అన్ని కేసులను ఛేదించామన్నారు. గతేడాది 22 హత్య కేసులు నమోదైతే ఈ ఏడాది 25 కేసులు నమోదయ్యాయన్నారు. అత్యాచార కేసులు 63 నమోదుకాగా, సంబంధిత కేసులన్నింటిలో నిందితులను జుడిషియల్‌ రిమాండ్‌కు పంపామన్నారు. జిల్లా ప్రజలకు అన్ని వేళలా ఎస్పీ కార్యాలయం అందుబాటులో ఉంటుందని ఎస్పీ స్నేహ మెహ్రా వెల్లడించారు.

• మరోవైపు జిల్లాలో రోడ్డు ప్రమాదాల కేసులు గతేడాదితో పోలిస్తే చాలా వరకు తగ్గినట్లు వెల్లడించారు. గతేడాది 154 ఘోర రోడ్డు ప్రమాదాలతో 160 మరణాలు నమోదుకాగా, ఈ ఏడాది 146 ఘోర రోడ్డు ప్రమాదాలు, 156 మరణాలకు సంబంధించి కేసులు నమోదయ్యాయన్నారు. రోడ్డు ప్రమాదాల్లో కొందరు ప్రాణాలు కోల్పోతే, మరికొందరు ప్రాణాపాయ స్థితి నుంచి బయటపడ్డారని, రోడ్డు ప్రమాదాలను తగ్గించేందుకు ప్రజలకు రోడ్డు ప్రమాదాలపై అవగాహన కార్యక్రమాలను నిర్వహించడంతోపాటు 6972 డ్రంక్‌ అండ్‌ డ్రైవ్‌ కేసులు, 1,23,024 ఈ-చలాన్స్‌ కేసులు నమోదు చేసి, రూ.3.61 కోట్ల చలాన్లు విధించామని తెలిపారు. ట్రాఫిక్‌పై అవగాహన కల్పించడంతోపాటు వాహనదారులు హెల్మెట్‌లు ధరించేలా అవగాహన కార్యక్రమాలను చేపడతామని పేర్కొన్నారు. రోడ్డు ప్రమాదాల నివారణే లక్ష్యంగా ముందుకెళ్తామని చెప్పారు.
• సైబర్‌ నేరాలకు సంబంధించి 184 కేసులు నమోదుకాగా, రూ.91.76 లక్షలను సైబర్‌ బాధితులకు రిఫండ్‌ చేసినట్లు పేర్కొన్నారు. నేరాలను తగ్గించేందుకు ప్రత్యేక దృష్టి పెట్టడంతోపాటు జిల్లా పోలీసుల ఆధ్వర్యంలో అవగాహన కార్యక్రమాలను నిర్వహించామన్నారు.
• ఈ ఏడాది 462 నేరారోపణ కేసులు నమోదుకాగా, వీటిలో భార్య, కూతురును హత్య చేసిన కేసులో గురుప్రవీణ్‌ అనే నిందితుడికి వికారాబాద్‌ జిల్లా కోర్టు ఉరి శిక్షను విధించినట్లు తెలిపారు. మరో 13 కేసుల్లో కోర్టు జీవిత ఖైదు విధించినట్లు చెప్పారు.
• టాస్క్‌ఫోర్స్‌ బృందాన్ని మరింత బలోపేతం చేసి జిల్లాలో జరుగుతున్న ఇసుక, కలప అక్రమ రవాణా, మట్కా, జూదం తదితర అసాంఘిక కార్యకలాపాలపై ప్రత్యేక దృష్టి పెట్టామని, ఈ ఏడాది గంజాయి, నకిలీ విత్తనాలు, పీడీఎస్‌ బియ్యం, కల్తీ ఆహార పదార్థాలను స్వాధీనం చేసుకొని కేసులు నమోదు చేశామన్నారు. గంజాయికి సంబంధించి జిల్లాలో 11 కేసులు నమోదు చేసి, 8.923 కిలోల గంజాయిని స్వాధీనం చేసుకోవడంతోపాటు 17 మంది నేరస్తులను అదుపులోకి తీసుకున్నట్లు తెలిపారు. పీడీఎస్‌ రేషన్‌ బియ్యానికి సంబంధించి 24 కేసులు నమోదుకాగా, 604 క్వింటాళ్ల బియ్యాన్ని స్వాధీనం చేసుకున్నామని పేర్కొన్నారు.
• ఇసుక, కలప, ఎర్రమట్టి, ఎర్రరాయి, గ్రావెల్‌ అక్రమ రవాణాకు సంబంధించి 221 కేసులు నమోదయ్యాయన్నారు.
• నేను సైతం, కమ్యూనిటీ పోలిసింగ్‌ ద్వారా పలు కేసులను సీసీ టీవీ ఫుటేజీల ద్వారా ఛేదించడం జరిగిందని, ఈ ఏడాది జిల్లాలో 1741 సీసీ టీవీ కెమెరాలను ఏర్పాటు చేశామని వెల్లడించారు.
• 8 కార్డన్‌ సెర్చ్‌లు నిర్వహించి 378 వాహనాలను సీజ్‌ చేసి, జరిమానా విధించినట్లు తెలిపారు.
• డయల్‌ 100కు 28,830 ఫోన్‌ కాల్స్‌రాగా, వీటిలో 129 ఎఫ్‌ఐఆర్‌లు నమోదు చేయడం జరిగిందని, 955 కాల్స్‌ ఇతర కారణాలతో పరిష్కరించామని, మరో 27,746 కాల్స్‌ రాజీపడ్డారని తెలిపారు.
• మహిళల భద్రతకు ప్రాధాన్యతనిస్తామని, మహిళలెవరూ భయపడొద్దని, ఏ చిన్న సమస్య వచ్చినా నేరుగా ఎస్పీ కార్యాలయానికి వచ్చి ఫిర్యాదు చేయవచ్చని చెప్పారు. మహిళల భద్రతకుగాను షీటీం బృందాలు పనిచేస్తున్నాయని, ఈ ఏడాది 224 అవగాహన కార్యక్రమాలను నిర్వహించారన్నారు. కళాబృందాలు, షీ టీంల ద్వారా ఊరూరా అవగాహన కార్యక్రమాలను చేపడతామని వెల్లడించారు.
• వచ్చే ఏడాది డ్రగ్స్‌ను అరికట్టేందుకు అవగాహన కార్యక్రమాలను నిర్వహించడంతోపాటు గంజాయి డిమా ండ్‌, సైప్లె ఎక్కడ ఉందో తెలుసుకొని ప్రత్యేక దృష్టి సారిస్తామని, గంజాయి ఎక్కువగా రైళ్లు, ప్రజారవాణా ద్వారా జరుగుతున్నదని, ప్రత్యేక దృష్టి సారిస్తామని పేర్కొన్నారు.