గణతంత్ర వేడుకలు ఘనం

నవ భారత రాజ్యాంగ నిర్మాత డాక్టర్‌ బీఆర్‌ అంబేద్కర్‌ రచించిన రాజ్యాంగాన్ని అమలు చేసుకుంటూ, ఆయన స్ఫూర్తితో సామాజిక అభివృద్ధికి బాటలు వేసుకున్నామని.. ప్రణాళికలు రచించుకొని ప్రగతి మార్గాన పయనిస్తున్నాం అని రంగారెడ్డి కలెక్టర్‌ అమయ్‌కుమార్‌ అన్నారు.

• మువ్వన్నెల పతాకాలతో శోభిల్లిన ఉమ్మడి రంగారెడ్డి జిల్లా కలెక్టరేట్ల సముదాయం
• రంగారెడ్డి, వికారాబాద్‌ జిల్లాల్లో జెండాలు ఎగురవేసిన కలెక్టర్లు అమయ్‌కుమార్‌, నిఖిల
• ఉమ్మడి రంగారెడ్డి జిల్లాలో జరిగిన అభివృద్ధిపై ఉపన్యాసాలు
• ఉత్తమ సేవలందించిన ఉద్యోగులకు ప్రశంసాపత్రాలు

రంగారెడ్డి, జనవరి 26 (నమస్తే తెలంగాణ) : నవ భారత రాజ్యాంగ నిర్మాత డాక్టర్‌ బీఆర్‌ అంబేద్కర్‌ రచించిన రాజ్యాంగాన్ని అమలు చేసుకుంటూ, ఆయన స్ఫూర్తితో సామాజిక అభివృద్ధికి బాటలు వేసుకున్నామని.. ప్రణాళికలు రచించుకొని ప్రగతి మార్గాన పయనిస్తున్నాం అని రంగారెడ్డి కలెక్టర్‌ అమయ్‌కుమార్‌ అన్నారు. 74వ భారత గణతంత్ర దిన వేడుకలు రంగారెడ్డి కలెక్టరేట్‌ కార్యాలయంలో గురువారం ఘనంగా జరిగాయి. ఈ సందర్భంగా కలెక్టర్‌ అమయ్‌కుమార్‌ మాట్లాడారు.

రైతులకు అందుబాటులో సేవలు

రాష్ట్ర ప్రభుత్వం అందిస్తున్న రైతు బంధు పథకం దేశవ్యాప్తంగా ప్రశంసలు అందుకుంటున్నదని పేర్కొన్నారు. రాష్ట్ర ప్రభుత్వమే ప్రీమియం చెల్లించి అమలు చేస్తున్న రైతు బీమా పథకం మరణించిన రైతు కుటుంబాలకు ఎంతో అండగా నిలుస్తున్నదని పేర్కొన్నారు. రైతులకు లక్ష రూపాయలలోపు పంట రుణాలను ప్రభుత్వం మాఫీ చేస్తున్నదని తెలిపారు. మొదట విడుతగా జిల్లాలో పదివేల 940 మంది రైతులకు రూ.25వేల లోపు ఉన్న పంట రుణాలు మొత్తం రూ.16కోట్ల73 లక్షలు, రెండో విడుతలో రూ.50వేల వరకున్న పంట రుణాలు మొత్తం రూ.31కోట్ల14 లక్షల పంట రుణాలను 9 వేల 579 మంది రైతులకు మాఫీ చేసిందని ఆయన పేర్కొన్నారు. రైతు సంక్షేమంలో భాగంగా జిల్లాలో 83 రైతు వేదికల నిర్మాణాలను పూర్తి చేసుకున్నట్లు కలెక్టర్‌ తెలిపారు.

రాష్ట్రానికి కేంద్ర బిందువుగా.. ఉద్యాన పంటలు

• 72,426 ఎకరాల్లో ఉద్యాన పంటలు, పట్టు పరిశ్రమ సాగు చేస్తూ రాష్ట్రంలోనే జిల్లా కేంద్ర బిందువుగా గుర్తించబడిందని పేర్కొన్నారు. సమీకృత ఉద్యాన అభివృద్ధి పథకం ద్వారా కొత్తగా పండ్ల తోటలు వేయదలచిన రైతులకు సబ్సిడీలు, కూరగాయల నారు, మల్చింగ్‌, నీటి కుంటల నిర్మాణాలు, శీతల గదులు, రైతులకు శిక్షణ తరగతులు చేపట్టినట్లు కలెక్టర్‌ తెలిపారు.
• యావత్తు దళిత జాతి స్వశక్తితో, స్వావలంబనతో జీవించాలనే సంకల్పంతో ప్రభుత్వం దళిత బంధు పథకాన్ని అమలు చేస్తున్నదని తెలిపారు. ఇంకా ‘ధరణి’తో రాష్ట్ర ప్రభుత్వం భూ రికార్డులను ప్రక్షాళన చేసి రైతులకు కొత్త పాస్‌ పుస్తకాలను అందించినదని తెలిపారు.
• జిల్లాలోని గ్రామీణ, పట్టణ ప్రాంతాల్లో ఇప్పటివరకు 6,645 డబుల్‌ బెడ్రూం ఇండ్లు మంజూరు కాగా.. 2,061 ఇండ్ల నిర్మాణం త్వరలో పూర్తి చేయుటకు తగిన చర్యలు తీసుకున్నట్లు చెప్పారు. అర్హులైన లబ్ధిదారులను ఎంపిక చేసే ప్రక్రియ కొనసాగుతున్నదని తెలిపారు.
• మిషన్‌ భగీరథ, కాకతీయ, హరితహారం, పల్లె ప్రగతి, పట్టణ ప్రగతి, క్రీడా ప్రాంగణాలు, విద్య, వైద్యం – ఆరోగ్యం, కంటి వెలుగు, విద్యుత్‌, పరిశ్రమలు, ఆసరా పెన్షన్లు, కల్యాణలక్ష్మి, షాదీ ముబారక్‌, గ్రామీణాభివృద్ధి, పశు సంవర్ధకం, మత్స్య శాఖ, మహిళా శిశు సంక్షేమం, షెడ్యూల్డ్‌ కులాల సంక్షేమం, గిరిజన సంక్షేమం, వెనుకబడిన తరగతుల సంక్షేమం, మైనార్టీ సంక్షేమం, బతుకమ్మ చీరల పంపిణీ, రోడ్ల అభివృద్ధి, పంచాయతీరాజ్‌, పౌర సరఫరాలు, మార్కెటింగ్‌ శాఖ, గనులు – భూగర్భ శాఖ, పౌర పఠన మందిరాలు లాంటి ఎన్నో సంక్షేమ కార్యక్రమాలు, మౌలిక వసతులను జిల్లావ్యాప్తంగా చేపట్టాం. ఇదంతా ఒక్క తెలంగాణ రాష్ట్ర అవతరణతోనే సాధ్యమైనదని పేర్కొన్నారు. కార్యక్రమంలో అదనపు కలెక్టర్లు తిరుపతిరావు, ప్రతీక్‌జైన్‌, అసిస్టెంట్‌ కలెక్టర్‌ కదివరన్‌ ఫలణి, జిల్లా రెవెన్యూ అధికారి హరిప్రియ, అధికారులు, సిబ్బంది ఉన్నారు.

రంగారెడ్డి, వికారాబాద్‌ జిల్లాల కలెక్టరేట్లలో గణతంత్ర వేడుకలు ఘనంగా జరిగాయి. ఈ సందర్భంగా కలెక్టర్లు అమయ్‌కుమార్‌, నిఖిల జాతీయ పతాకాలను ఆవిష్కరించారు. అనంతరం, పోలీసుల నుంచి గౌరవ వందనం స్వీకరించారు. జాతీయ గీతాలాపన చేశారు. వివిధ శాఖల ద్వారా జిల్లాల్లో అమలవుతున్న సంక్షేమ, అభివృద్ధి కార్యక్రమాలు, సాధించిన ప్రగతి గురించి కీలకోపన్యాసం చేశారు. రిపబ్లిక్‌ డే వేడుక సందర్భంగా చిన్నారుల సాంస్కృతిక ప్రదర్శనలు ఆహుతులను అలరించాయి. ఎదనిండా దేశభక్తి భావాన్ని నింపుకొని తమ ప్రదర్శనలతో గణతంత్ర వేడుకలకు వన్నెలద్దారు. ఈ సందర్భంగా ఉత్తమ సేవలందించిన ఉద్యోగులకు కలెక్టర్లు ప్రశంసాపత్రాలు అందజేశారు.