ఫోన్‌ పోయిందా? నో టెన్షన్

• పోయిన ఫోన్‌ కోసం ప్రత్యేక వెబ్‌సైట్‌..
• ముఖ్యమైన డాటాను డిలీట్‌ చేయొచ్చు
• ఫోన్‌ పనిచేయకుండా చేయొచ్చు
• టెలికాం శాఖ ప్రత్యేక వెబ్‌సైట్‌
• బ్యాంకు ఖాతా, ఇతర పాస్‌వర్డులు ఇతరుల చేతికి చిక్కకుండా ఏర్పాట్లు

కొన్ని సాంకేతిక విధానాలతో ఫోయిన ఫోన్‌ ఆచూకీతో పాటు సమాచారాన్ని పదిలం చేయవచ్చు. గూగుల్‌ లేదా కేంద్ర ప్రభుత్వ టెలీ కమ్యూనికేషన్‌ సిస్టంతో ఇది సాధ్యమవుతుంది. పోగుట్టుకున్న స్మార్ట్‌ ఫోన్‌లో బ్యాంకు ఖాతా నంబరు, పాస్‌వర్డులు తదితర సమాచారం ఇతరుల చేతికి చిక్కి దుర్వినియోగం అయ్యే ప్రమాదం ఉంటుంది. ఇలాంటి సమస్యలకు చెక్‌ పెడుతూ కేంద్ర ప్రభుత్వం టెలికాం శాఖ ద్వారా సెంట్రల్‌ ఎక్విప్‌మెంట్‌ ఐడెంటిటీ రిజిస్టర్‌ పేరుతో ఇంటర్నెట్‌లో www.ceir.gov.in అనే వెబ్‌సైట్‌ను రూపొందించింది. దీంతో మనం పోగొట్టుకున్న స్మార్ట్‌ ఫోన్‌ను ఎవరూ ఉపయోగించకుండా ఏ నెట్‌వర్క్‌లతో పని చేయకుండా టెలికాం వ్యవస్థ చూసుకుంటుంది. దొంగతనానికి గురైన అన్ని స్మార్ట్‌ ఫోన్లను పనిచేయకుండా చేసేలా ఈ ప్రాజెక్ట్‌ను ప్రభుత్వం చేపట్టింది. దీంతో దొంగతనాలను చెక్‌ పెట్టవచ్చు

కొమురవెల్లి, జూలై 2: నేటి జీవన విధానంలో సెల్‌ఫోన్‌ లేని మనిషి లేడనే చెప్పాలి. నచ్చిన సెల్‌ఫోన్‌ కొనుగోలుకు ఎన్ని వేలు ఖర్చు పెట్టేందుకు వెనకాడటం లేదు. అలా కొన్న ఫోన్‌ ఎక్కడైనా మరిచిపోయినా.. పడేసుకున్నా.. ఎవరైనా దొంగిలించినా.. ఆ సమయంలో పడే బాధ చెప్పలేనిది. పైసల సంగతి పక్కన పెడితే, మనకు సంబంధించిన విలువైన సమాచారం అంతా ఈ స్మార్ట్‌ ఫోన్‌లో ఉండడం వల్ల జరిగే పరిణామాల పరిస్థితి ఊహించలేం. ఈ సమాచారాన్ని ఎవరైనా దుర్వినియోగం చేస్తారేమో అన్న దిగులుతో స్థానిక పోలీస్‌స్టేషన్‌లో ఫిర్యాదు చేస్తాం.

పోయిన ఫోన్‌ను ఇట్టే పట్టేయొచ్చు

• ముందుగా పోలీస్‌ స్టేషన్‌లో ఫిర్యాదు చేయాలి. తర్వాత వెబ్‌సైట్‌లోకి వెళ్లి పోగొట్టుకున్న ఫోన్‌ పని చేయకుండా ఉండేందుకు సహాయం కోరవచ్చు.
• ఇందులో ఐఎంఈఐ నెంబర్‌ సహా స్టార్‌ గుర్తుతో ఉన్న అన్ని బాక్సుల్లో వివరాలు నమోదు చేయాలి.
• ఐఎంఈఐ సంఖ్య సహాయంతో టెలికాం శాఖ వారు పోయిన ఫోన్‌ను పనిచేయకుండా చేస్తారు. దీంతో మన విలువైన సమాచారం ఇతరుల చేతికి చేరకుండా నివారించవచ్చు.
• ఒక వేళ ఎవరైనా ఫోన్‌ను ఉపయోగించాలి చూస్తే వారు ఫోన్‌లో వేసిన సిమ్‌ కార్డు సెల్‌ఫోన్‌ సంఖ్యను సర్వీస్‌ ప్రొవైడర్‌ ద్వారా పోలీసులకు అందుతుంది. వెంటనే పోలీసులు సెల్‌ఫోన్‌ నంబర్‌ వెతికి వివరాలు సేకరిస్తారు.
• ఫోన్‌ పోయిందన్న నిర్ధారణకు రాగానే మొదటగా ఆండ్రాయిడ్‌.కామ్‌, ఫైండ్‌ మై ఫోన్‌ అనే వెబ్‌ పేజీలోకి వెళ్లి గూగుల్‌(జీమెయిల్‌) ఐడీతో లాగిన్‌ కావాలి.
• లాగిన్‌ కాగానే మీ ఫోన్‌ మోడల్‌? చార్జింగ్‌ ఎంత ఉంది? చివరిసారిగా ఎప్పుడు ఉపయోగించారో చూడవచ్చు.
• ఫోన్‌ మోడల్‌ పక్కనే ఉన్న సర్కిల్‌పై క్లిక్‌ చేస్తే మీ ఫోన్‌ ఐఎంఈఐ కనిపిస్తుంది. ఇందులో ప్లేసౌండ్‌, సెక్యూర్‌ డేటా, ఎరేజ్‌ డివైస్‌ అనే మూడు ఆప్షన్లు గూగుల్‌ కల్పించింది.
• ప్లే సౌండ్‌ ఆప్షన్‌తో పోయిన మన స్మార్ట్‌ ఫోన్‌ ఎక్కడ ఉన్నా.. చివరకు సిమ్‌కార్డు మార్చినా.. ఆ ఫోన్‌లో మన ఈ-మెయిల్‌ లాగిన్‌ ఉండి ఇంటర్నెట్‌ అందుబాటులో ఉంటే సెల్‌ నెంబర్‌ సంక్షిప్త సందేశం రూపంలో మనకు అందుతుంది. దీంతో పోయిన ఫోన్‌ను మన చేతులతోనే రింగ్‌ చేయవచ్చు. ఇది క్లిక్‌ చేసిన ఐదు నిమిషాల వరకు ఆపే ప్రయత్నం చేసినప్పటికి చివరికి సైలెంట్‌ మోడ్‌లో పెట్టిన రింగ్‌ అవుతూనే ఉంటుంది. ఒక వేళ మన పోయిన ఫోన్‌ దగ్గర్లో ఉంటే ఇట్టే పట్టేయవచ్చు.

మనం ఏం చేయాలి

ఇలా కాకుండా పోయిన ఫోన్‌ మనకు దొరకనప్పుడు మన విలువైన సమాచారం ఇతరుల చేతికి చిక్కకూడదు అనుకుంటే చివరి ఆప్షన్‌గా ఎరేజ్‌ డివైజ్‌ ద్వారా పోయిన ఫోన్‌లోని మొత్తం సమాచారాన్ని మనం ఉన్న వద్ద నుంచే శాశ్వతంగా తొలిగించవచ్చు. అయితే అలా చేసిన తర్వాత మన ఫోన్‌ ఎక్కడుందో తెలుసుకునే అవకాశం కోల్పోవాల్సి వస్తుంది. ఇవన్నీ జరగాలంటే పోయిన ఫోన్‌లో లొకేషన్‌ ఆన్‌ ఉండటంతో పాటు ఇంటర్నెట్‌ అనుసంధానమై ఉండటమే గాక ఫైండ్‌ మై ఫోన్‌ అనే ఆప్షన్‌ ఆన్‌ చేసి ఉండాలి