గుప్పుమంటున్న గంజాయి

జిల్లాలో గంజాయి వ్యా పారం యథేచ్ఛగా సాగుతున్నది. రాష్ట్ర రాజధాని హైదరాబాద్‌ చుట్టూ జిల్లా విస్తరించి ఉండడంతో వ్యాపారులు పలు ప్రాంతాలను ఎంచుకుని తమ దందాను కొనసాగిస్తున్నారు. ఆంధ్రప్రదేశ్‌తోపాటు తెలంగాణలోని పలు జిల్లాల నుంచి గంజాయిని అవుటర్‌ రంగ్‌ రోడ్డు (ఓఆర్‌ఆర్‌) మీ దుగా హైదరాబాద్‌తోపాటు శివారు ప్రాంతాలకు చేరవేస్తున్నారు.

• రంగారెడ్డి జిల్లాలో యథేచ్ఛగా వ్యాపారం
• అవుటర్‌ రింగ్‌ రోడ్డు కేంద్రంగా అక్రమ బిజినెస్‌ పాన్‌షాపులు, హోటళ్లలో నిల్వచేస్తూ.. ఇంజినీరింగ్‌ విద్యార్థులకు చేరవేస్తూ..
• పోలీసులు చర్యలు తీసుకుంటున్నా ఫలితం నిల్‌

జిల్లాలో గంజాయి వ్యా పారం యథేచ్ఛగా సాగుతున్నది. రాష్ట్ర రాజధాని హైదరాబాద్‌ చుట్టూ జిల్లా విస్తరించి ఉండడంతో వ్యాపారులు పలు ప్రాంతాలను ఎంచుకుని తమ దందాను కొనసాగిస్తున్నారు. ఆంధ్రప్రదేశ్‌తోపాటు తెలంగాణలోని పలు జిల్లాల నుంచి గంజాయిని అవుటర్‌ రంగ్‌ రోడ్డు (ఓఆర్‌ఆర్‌) మీ దుగా హైదరాబాద్‌తోపాటు శివారు ప్రాంతాలకు చేరవేస్తున్నారు. పోలీసు లు ఉక్కుపాదం మోపుతున్నా ఎక్కడో ఒక చోట గంజాయి ముఠా వారికి చిక్కుతూనే ఉన్నది.

ముఖ్యంగా ఎల్బీనగర్‌, మహేశ్వరం, రాజేంద్రనగర్‌ డివిజన్ల పరిధిలో ఇటీవల సుమారు 20 మంది వరకు గంజాయి వ్యాపారులు పోలీసులకు పట్టుపడగా వారి నుంచి వందల కిలోల గంజాయిని స్వాధీనం చేసుకున్నారు. ఇబ్రహీంపట్నం, మహేశ్వరం, చేవెళ్ల, రాజేంద్రనగర్‌ నియోజకవర్గాల్లో ఇంజినీరింగ్‌ కళాశాలలు, హాస్టళ్లు అధికంగా ఉం డడంతో ఈ ప్రాంతాలను ఎంచుకుని వ్యాపారాన్ని కొనసాగిస్తున్నారు. బస్టాండ్లలోని పాన్‌షాపులు, చాయ్‌ హోటళ్లు, ఇంజినీరింగ్‌ కళాశాలల ఎదుట ఉండే పాన్‌షాప్‌లు, హోటళ్లను ఎంచుకుని.. అక్కడ గంజాయిని నిల్వ చేస్తూ విద్యార్థులకు చేరవేస్తున్నారనే ఆరోపణలున్నాయి.

-రంగారెడ్డి, డిసెంబర్‌ 22 (నమస్తే తెలంగాణ)

జిల్లాలో ఇటీవల నమోదైన కేసులు..

ముఖ్యంగా ఆంధ్రప్రదేశ్‌ రాష్ట్రంలోని విశాఖపట్నం అల్లూరి ఏజెన్సీ, తెలంగాణలోని ఖమ్మం తదితర ప్రాంతాల నుంచి గంజాయిని తీసుకొచ్చి విక్రయిస్తున్నట్లు తెలుస్తున్నది.

• ఇటీవల ఆంధ్రప్రదేశ్‌కు చెందిన కొందరు కారులో తరలిస్తున్న 60 కిలోల గంజాయిని మాల్‌ చెక్‌పోస్టు వద్ద యాచారం, మహేశ్వరం ఎస్‌వోటీ పోలీసులు పట్టుకున్నారు.
• మహారాష్ట్రకు చెందిన కొందరు గుట్టుచప్పుడు కాకుండా దండుమైలారం మీదుగా ఇబ్రహీంపట్నానికి తరలిస్తుండగా ఇబ్రహీంపట్నం పోలీసులు తాళ్లపల్లిగూడగేటు వద్ద పట్టుకుని వారి నుంచి 60 కిలోల గంజాయిని స్వాధీనం చేసుకున్నారు.
• ఆదిబట్ల ఠాణా పరిధిలోని కొంగరకలాన్‌ నుంచి తుక్కుగూడ వెళ్లే దారిలో ముంబైకి చెందిన వ్యక్తులను తనిఖీ చేయగా వారి వద్ద 1550 గ్రాము ల గంజాయి లభ్యమైనది.
• ఆదిబట్ల ఠాణా పరిధిలోని బొంగుళూరు గేటు వద్ద జార్ఖండ్‌ రాష్ట్రం నుంచి తీసుకొస్తున్న 142 ప్యాకెట్ల గంజాయిని ఎల్బీనగర్‌ ఎస్‌వోటీ, ఆదిబట్ల పోలీసులు కలిసి పట్టుకున్నారు.
• కొంగరకలాన్‌ కల్వకోలు లక్ష్మీదేవమ్మ ఫంక్షన్‌హాల్‌ సమీపంలో ఒడిశాకు చెందిన వారి నుంచి 5 కిలోల గంజాయిని స్వాధీనం చేసుకున్నారు.
• తుక్కుగూడ సమీపంలోని వండర్‌ లా వద్ద ఇటుక బట్టీల్లో పనిచేస్తున్న వారికి గంజాయిని విక్రయిస్తున్న కొంతమందిని అదుపులోకి తీసుకుని ప్రశ్నించగా 21 కిలోల గంజాయి లభ్యమైనది.
• ఒడిశాకు చెందిన ఓ వ్యక్తి నుంచి రూ. 30 లక్షల విలువ చేసే 3.8 కిలోల గంజాయిని పోలీసులు పట్టుకున్నారు.
• రాజస్థాన్‌కు చెందిన ముగ్గురు వ్యక్తులు నాదర్‌గుల్‌లో నివసిస్తూ నిషేధిత మత్తు పదార్థాలను విక్రయిస్తుండగా గ్రీన్‌ ఫార్మాసిటీ పోలీసులు అదుపులోకి తీసుకున్నారు. అలాగే, నిజామాబాద్‌కు చెందిన ఓ ముఠా, ఆంధ్ర ప్రదేశ్‌ నుంచి 62 కిలోల గంజాయిని ఔటర్‌రింగ్‌రోడ్డు మీదుగా తరలిస్తుండగా తుక్కుగూడ వద్ద మహేశ్వరం పోలీసులు అదుపులోకి తీసుకున్నారు.
• ఖమ్మం నుంచి హైదరాబాద్‌కు కారులో తరలిస్తున్న పది కిలోల గంజాయిని బీఎన్‌రెడ్డినగర్‌ సమీపంలో మహేశ్వరం ఎస్‌వోటీ పోలీసులు స్వాధీనం చేసుకున్నారు.

ఔటర్‌ చుట్టూ యథేచ్ఛగా..

జిల్లాలో ఔటర్‌ రింగ్‌ రోడ్డు విస్తరించి ఉన్న పెద్దఅంబర్‌పేట, శంషాబాద్‌ , హిమాయత్‌సాగర్‌ వరకు ఇరువైపులా ఉన్న ప్రాంతాల్లో గంజాయి వ్యాపారం గుట్టుగా సాగుతున్నది. తుక్కుగూడ, మహేశ్వరం, ఆదిబట్ల, కొంగరకలాన్‌ తదితర ప్రాంతాల్లోని ఇటుక బట్టీల వద్ద ఒడిశా, బీహార్‌ రాష్ర్టాలకు చెందిన అనేక మంది కూలీలు పనిచేస్తున్నారు. వారి కోసం ఆయా ప్రాంతాలకు వ్యాపారులు గంజాయిని తరలించి విక్రయిస్తున్నారు. అలాగే, ఫామ్‌హౌస్‌లు, రిసార్ట్‌లు, హాస్టళ్లు, ఇంజినీరింగ్‌ కళాశాలల్లోనూ ఈ వ్యాపారం పెద్ద ఎత్తున సాగుతున్నది.

గంజాయి కట్టడికి ప్రత్యేక టీంలు

గంజాయి వ్యాపారాన్ని అరికట్టేందుకు ప్రత్యేక బృందాలను ఏర్పాటు చేశాం. మహేశ్వరం డివిజన్‌ పరిధిలోని పలు ఠాణాలను కలుపుకొని ఎస్‌వోటీ బృందాలు పనిచేస్తున్నాయి. ఇటీవల వ్యాపారులను అదుపులోకి తీసుకుని గంజాయిని స్వాధీనం చేసుకున్నాం. వారిపై కేసులు పెడుతున్నాం. ఎక్కువసార్లు గంజాయిని విక్రయిస్తూ పట్టుబడిన వారిపై పీడీయాక్టులు నమోదు చేస్తాం. విద్యార్థులు, యువత గంజాయి వంటి మత్తుపదార్థాలకు దూరంగా ఉండాలి.

-సునీతారెడ్డి, మహేశ్వరం డీసీపీ